ബ്രിട്ടന്റെ ഇതിഹാസ ഓട്ടക്കാരന്‍ മോ ഫറ ടോക്യോ ഒളിമ്പിക്‌സിനില്ല; യോഗ്യത നേടാനാകാതെ മുഹമ്മദ് ഫറ

മാഞ്ചസ്റ്റര്‍: ഇതിഹാസ ദീര്‍ഘദൂര ഓട്ടക്കാരന്‍ മോ ഫറ (മുഹമ്മദ് ഫറ) ടോക്യോ ഒളിമ്പിക്‌സിനുണ്ടാകില്ല. നാലുതവണ ഒളിമ്പിക്‌സ് ജേതാവായ ബ്രിട്ടന്റെ മോ ഫറക്ക് ഇത്തവണത്തെ ഒളിമ്പിക്‌സിന് യോഗ്യത നേടാനായില്ല. മാഞ്ചസ്റ്ററില്‍ നടക്കുന്ന ബ്രിട്ടീഷ് അത്‌ലറ്റിക് ചാമ്പ്യന്‍ഷിപ്പിലെ മോശം പ്രകടനത്തെ തുടര്‍ന്നാണ് അയോഗ്യനായത്.

ഞായറാഴ്ചയാണ് യോഗ്യത തെളിയിക്കാനുള്ള അവസാന ദിവസം. അതേസമയം 38 കാരനായ ഫറക്ക് ഇനി മറ്റൊരു അവസരമില്ല. 10,000 മീറ്റര്‍ 27 മിനിറ്റിനും 28 സെക്കന്‍ഡിനും താഴെയുള്ള സമയത്തിനുള്ളില്‍ ഫിനിഷ് ചെയ്താലേ യോഗ്യത നേടാനാകുമായിരുന്നുള്ളൂ. പക്ഷേ 27 മിനിറ്റും 47.04 സെക്കന്‍ഡും കൊണ്ടാണ് ഫറ ഓടിത്തീര്‍ത്തത്. 2012ലും 2016ലും ഈയിനത്തില്‍ ഫറക്കായിരുന്നു ഒളിംപിക്‌സ് സ്വര്‍ണം. 50,000 മീറ്ററിലും ഫറ ഇരട്ട സ്വര്‍ണം നേടിയിട്ടുണ്ട്.

ബിര്‍മിങ്ഹാമില്‍ ഈ മാസം നടന്ന മീറ്റിലും യോഗ്യത തെളിയിക്കാനാകാത്തതിനെ തുടര്‍ന്നാണ് മാഞ്ചസ്റ്ററില്‍ നടന്ന മീറ്റിലേക്ക് ഫറയെ ക്ഷണിച്ചത്. "തന്റെ പരമാവധി ശ്രമിച്ചു. പക്ഷേ ഏറ്റവും മികച്ചവരുമായി മത്സരിക്കാന്‍ താന്‍ യോഗ്യനല്ല. എനിക്ക് അവിസ്മരണീയമായ ഒരു കരിയര്‍ ഉണ്ടായിരുന്നു. അതില്‍ ഞാന്‍ സന്തോഷവാനാണ്" -മത്സരശേഷം ഫറ പ്രതികരിച്ചു.