എം.ഡി.എം.എ മയക്കുമരുന്ന് വേട്ട; 4 പേര്‍ അറസ്റ്റില്‍

മഞ്ചേശ്വരം/കാഞ്ഞങ്ങാട്: എം.ഡി.എം.എ മയക്കുമരുന്നുമായി രണ്ട് പേരെ മഞ്ചേശ്വരം പൊലീസും രണ്ട് പേരെ ഹൊസ്ദുര്‍ഗ് പൊലീസും അറസ്റ്റ് ചെയ്തു. ഉപ്പള പച്ചിലംപാറയിലെ ഫൈസല്‍ (29), കര്‍ണാടക സാലത്തൂര്‍ കോളനാടിലെ അബൂബക്കര്‍ സിദ്ധിഖ് (33 )എന്നിവരെയാണ് മഞ്ചേശ്വരം പൊലീസ് അറസ്റ്റ് ചെയ്തത്. 5 ഗ്രാം എം.ഡി.എം.എയുമായി സിദ്ധിഖിനെ തലക്കിയില്‍ വെച്ചും 4.72 ഗ്രാം എം.ഡി .എം.എയുമായി ഫൈസലിനെ ഉപ്പളയില്‍ വെച്ചുമാണ് പിടികൂടിയത്.
മാലോം മൈക്കയത്തെ സി.ജെ.ആല്‍ബിന്‍ (21), കോഴിക്കോട് സ്വദേശിയും അശോകച്ചാലില്‍ താമസിക്കുന്ന കോഴിക്കോട് സ്വദേശി സനല്‍ ചാക്കോ(20) എന്നിവരെയാണ് കാഞ്ഞങ്ങാട് ഡി.വൈ.എസ്.പി പി. ബാലകൃഷ്ണന്‍ നായരുടെ നിര്‍ദ്ദേശത്തെത്തുടര്‍ന്ന് പൊലീസ് നടത്തിയ പരിശോധനയില്‍ പിടികൂടിയത്. ആല്‍ബിനില്‍ നിന്ന് 1.140 ഗ്രാം, സനല്‍ ചാക്കോയില്‍ നിന്ന് 2.970 ഗ്രാം എം.ഡി.എം.എയുമാണ് പിടികൂടിയത്. ഇരുവരും ബംഗളൂരുവില്‍ ജോലി ചെയ്യുകയാണ്. വെള്ളരിക്കുണ്ട് പൊലീസാണ് അറസ്റ്റ് ചെയ്തത്. എസ്.ഐ എം.പി വിജയകുമാര്‍, ടി.ടി റെജികുമാര്‍, എം.ആര്‍ ബിജു, പ്രിയേഷ് കുമാര്‍ മനോജ് എന്നിവര്‍ പൊലീസ് സംഘത്തിലുണ്ടായിരുന്നു.