മാണ്ഡ്യ: പ്രായപൂര്ത്തിയാകാത്ത പെണ്കുട്ടിയുടെ അശ്ലീല വീഡിയോകള് നിര്മ്മിക്കുകയും ബ്ലാക്ക് മെയില് ചെയ്ത് ലൈംഗികമായി പീഡിപ്പിക്കുകയും ചെയ്ത കേസില് പ്രതിയായ യുവാവിനെ കര്ണാടക പൊലീസ് അറസ്റ്റ് ചെയ്തു. 25 കാരനായ യൂനുസ് പാഷയാണ് അറസ്റ്റിലായത്. വിവാഹിതനായ യൂനുസ് പാഷ പ്രായപൂര്ത്തിയാകാത്ത പെണ്കുട്ടിയുമായി സൗഹൃദം സ്ഥാപിക്കുകയും മൊബൈല് ഫോണ് സമ്മാനമായി നല്കുകയും ചെയ്തിരുന്നതായി പൊലീസ് പറഞ്ഞു. പിന്നീട് ഫോണില് സംസാരിക്കുകയും പെണ്കുട്ടിയുടെ നഗ്ന ഫോട്ടോകളും വീഡിയോകളും ആവശ്യപ്പെടുകയും ചെയ്തു. പെണ്കുട്ടി തന്റെ നഗ്നരംഗങ്ങള് യൂനുസിന് അയച്ചുകൊടുത്തു. ഇതുപയോഗിച്ച് യൂനുസ് പെണ്കുട്ടിയുടെ അശ്ലീല വീഡിയോ നിര്മ്മിക്കുകയായിരുന്നു. പെണ്കുട്ടിയുടെ വീഡിയോ കോളുകള് റെക്കോര്ഡ് ചെയ്തു. പെണ്കുട്ടി വീട്ടില് തനിച്ചായിരുന്നപ്പോള് യൂനുസ് വീടിനുള്ളില് അതിക്രമിച്ചു കയറുകയും സ്വകാര്യ വീഡിയോകളും ഫോട്ടോകളും സോഷ്യല് മീഡിയയില് പങ്കുവെക്കുമെന്ന് ഭീഷണിപ്പെടുത്തുകയും മുത്തശ്ശിക്ക് ഉറക്ക ഗുളിക നല്കാന് ആവശ്യപ്പെടുകയും ചെയ്തു. മുത്തശി ഉറങ്ങിപ്പോയപ്പോള് യൂനുസ് പെണ്കുട്ടിയെ ലൈംഗികമായി പീഡിപ്പിച്ചെന്നാണ് പരാതി. വീട്ടില് തിരിച്ചെത്തിയ മാതാപിതാക്കള് പെണ്കുട്ടിയുടെ മാനസികനില തെറ്റിയതുപോലുള്ള പെരുമാറ്റം മനസിലാക്കി ചോദിച്ചപ്പോഴാണ് പെണ്കുട്ടി പീഡനവിവരം വെളിപ്പെടുത്തിയത്. പിന്നീട് ഇത് സംബന്ധിച്ച് നല്കിയ പരാതിയില് പൊലീസ് കേസെടുക്കുകയായിരുന്നു.