തിരുവനന്തപുരം: ഐക്യകേരളത്തിന് ഇന്ന് അറുപത്തിയേഴാം പിറന്നാള്. കേരളപ്പിറവി ആഘോഷത്തിന്റെ ഭാഗമായുള്ള സംസ്ഥാന സര്ക്കാരിന്റെ കേരളീയം ആഘോഷങ്ങള്ക്ക് തുടക്കമായി. തലസ്ഥാനത്ത് 41 വേദികളിലായി 7 ദിവസം നീളുന്ന ആഘോഷ പരിപാടിയാണ് നടക്കുന്നത്. ഇന്ന് രാവിലെ പത്ത് മണിക്ക് സെന്ട്രല് സ്റ്റേഡയിത്തില് മുഖ്യമന്ത്രി പിണറായി വിജയന് കേരളീയം ആഘോഷം ഉദ്ഘാടനം ചെയ്തു. കമലഹാസനും മമ്മൂട്ടിയും മോഹന്ലാലും അടക്കം വന് താരനിരയാണ് ഉദ്ഘാടന ചടങ്ങില് പങ്കെടുത്തത്. ഇനിയുള്ള ഏഴ് ദിവസം തലസ്ഥാനത്താകെ ഉത്സവമാവും.
കേരളം ഇതുവരെ കൈവരിച്ച നേട്ടങ്ങള്, ഭാവി കേരളത്തെ കുറിച്ചുള്ള സ്വപ്നങ്ങള് തുടങ്ങിയ എല്ലാം ഒരു കുടക്കീഴില് അവതരിപ്പിക്കുന്നതാണ് കേരളീയം. കേരളീയം ആഘോഷത്തിന്റെ ഭാഗമായി ദീപാലങ്കാരങ്ങളാല് നിറഞ്ഞു. ശോഭനയടക്കമുള്ള പ്രമുഖരെത്തുന്ന കലാപരിപാടികള് കേരളീയത്തിന്റെ ഭാഗമായി നടക്കും. വ്യാപാരമേള, ചലച്ചിത്രമേള, പുഷ്പമേള തുടങ്ങിയവയും നടക്കും. കേരളീയത്തിനൊപ്പം നിയമസഭാമന്ദിരത്തില് പുസ്തകോത്സവവും നടക്കുന്നുണ്ട്. കവടിയാര് മുതല് കിഴക്കേകോട്ട വരെ നീളുന്ന ദീപാലങ്കാരങ്ങളാണ് ഒരുക്കിയിട്ടുള്ളത്. ഇതിനുപുറമെ വ്യത്യസ്ത രുചികളുമായി ഫുഡ് ഫെസ്റ്റിവലുമുണ്ട്. അതേസമയം സാമ്പത്തിക പ്രതിസന്ധിക്കിടെ കേരളീയം പരിപാടി ധൂര്ത്താണെന്ന് ആരോപിച്ച് പ്രതിപക്ഷം ചടങ്ങില് നിന്ന് വിട്ടുനില്ക്കുകയാണ്.
