തിരുവനന്തപുരം: അപരിചിതരില് നിന്നുള്ള വീഡിയോ കോളുകള് സ്വീകരിക്കുമ്പോള് സൂക്ഷിക്കണമെന്ന മുന്നറിയിപ്പുമായി കേരള പോലീസ്. ഫോണ്കോള് വഴിയുള്ള തട്ടിപ്പുകളും വീഡിയോ കൈക്കലാക്കിയ ശേഷമുള്ള ബ്ലാക്ക്മെയിലിംഗും സംസ്ഥാനത്ത് വര്ധിച്ചുവരുന്ന സാഹചര്യത്തിലാണ് മുന്നറിയിപ്പുമായി സോഷ്യല് മീഡിയയിലൂടെ പോലീസ് രംഗത്തെത്തിയത്.
വാട്സ്ആപ്, മെസഞ്ചര് തുടങ്ങിയവയിലെ വീഡിയോ കോളിലൂടെ കെണിയൊരുക്കി തട്ടിപ്പ് നടത്തുന്ന സംഭവങ്ങള് അടുത്തിടെയായി റിപ്പോര്ട്ട് ചെയ്തുവരുന്നു. മൊബൈല് ഫോണിലേക്ക് വരുന്ന വീഡിയോ കോള് അറ്റന്ഡ് ചെയ്താല് മറുവശത്തു അശ്ലീല വീഡിയോ പ്രത്യക്ഷപ്പെടുകയും, വിന്ഡോ സ്ക്രീനില് ഫോണ് അറ്റന്ഡ് ചെയ്യുന്ന ആളുടെ മുഖം ഉള്പ്പെടെ റെക്കോര്ഡ് ചെയ്തെടുത്തതിന് ശേഷം പണം ആവശ്യപ്പെടുകയും ചെയ്യുന്നതാണ് രീതി. നമ്മുടെ സുഹൃത്തുക്കള്ക്കും ബന്ധുക്കള്ക്കും ഈ വീഡിയോ അയച്ചു കൊടുക്കുമെന്ന് ഭീഷണിപ്പെടുത്തിയാകും പണം ആവശ്യപ്പെടുക.
വീഡിയോ സാമൂഹിക മാധ്യമങ്ങളിലും യുട്യൂബിലും ഇടുമെന്നും അല്ലെങ്കില് പണം വേണമെന്നുമാകും ആവശ്യം. ചിലര് മാനഹാനി ഭയന്ന് പണം അയച്ചു നല്കിയെങ്കിലും ഇത്തരം തട്ടിപ്പു സംഘങ്ങള് കൂടുതല് പണം ആവശ്യപ്പെട്ടുകൊണ്ട് വീണ്ടും ഭീഷണിപ്പെടുത്തുകയായിരുന്നുവെന്ന പരാതിയും പോലീസിന് ലഭിച്ചിട്ടുണ്ട്. ലിങ്ക് സാമൂഹിക മാധ്യമം വഴി സുഹൃത്തുക്കള്ക്ക് അയക്കുമെന്ന് ഭീഷണി മുഴക്കുന്നതോടെ, ഭൂരിഭാഗം പേരും തട്ടിപ്പുകാര്ക്ക് വഴങ്ങും.
ഫേസ്ബുക്ക് പോലുള്ള സമൂഹ മാധ്യമങ്ങളിലൂടെ നമ്മുടെ പൂര്ണ വിവരങ്ങള് നേരത്തെ തന്നെ ഇവര് കൈവശപ്പെടുത്തിയിട്ടുണ്ടാകും. അതിനാല് ഇവരെ ബ്ലോക്ക് ചെയ്തത് കൊണ്ടോ, നമ്മുടെ അക്കൗണ്ട് ഡി ആക്ടിവേറ്റ് ചെയ്തത് കൊണ്ടോ ഫലം ഇല്ലെന്നര്ത്ഥം. ഫിലിപ്പൈന്സ്, ഇന്തോനേഷ്യ തുടങ്ങിയ രാജ്യങ്ങളിലെ റാക്കറ്റുകളാണ് ഇതില് സജീവമായിരിക്കുന്നത്. വാട്സ്ആപ്പിലൂടെയാ മറ്റോ അപരിചിതരുടെ വീഡിയോ കോളുകള് വന്നാല് സ്വീകരിക്കുന്നതിന് മുമ്പ് ഇത്തരം കെണിയെക്കുറിച്ചു ആലോചിക്കണമെന്ന് പോലീസ് മുന്നറിയിപ്പ് നല്കി.
Kerala Police warn against fraud phone calls