തിരുവനന്തപുരം: ബലാത്സംഗമടക്കമുള്ള ക്രിമിനല് കേസുകളില് പ്രതിയായ ഇന്സ്പെക്ടര് പി.ആര് സുനുവിനെ അന്വേഷണ റിപ്പോര്ട്ടിന്റെ അടിസ്ഥാനത്തില് പൊലീസ് സേനയില് നിന്നും പിരിച്ചു വിട്ടു. 15 പ്രാവശ്യം വകുപ്പുതല നടപടിയും ആറ് സസ്പെന്ഷനും നേരിട്ട ഉദ്യോഗസ്ഥനാണ് സുനു. പൊലീസ് ആക്ടിലെ വകുപ്പ് 86 പ്രകാരം ഡിജിപിയാണ് സുനുവിനെതിരെ നടപടി സ്വീകരിച്ചത്. ആദ്യമായാണ് ഈ വകുപ്പ് ഉപയോഗിച്ച് ഒരു പൊലീസ് ഉദ്യോഗസ്ഥനെ സേനയില് നിന്നും പിരിച്ചുവിടുന്നത്. തുടര്ച്ചയായി കുറ്റകൃത്യം ചെയ്യുന്ന, ബലാല്സംഗം ഉള്പ്പെടെ ക്രിമിനല് കേസില് പ്രതിയ വ്യക്തിക്ക് പൊലീസില് തുടരാന് യോഗ്യതയില്ലെന്ന് ഡിജിപിയുടെ ഉത്തരവില് വ്യക്തമാക്കി. തൃക്കാക്കര കൂട്ടബലാത്സംഗ കേസില് പ്രതിയായതോടെ ബേപ്പൂര് കോസ്റ്റല് സിഐ ആയിരുന്ന പി.ആര് സുനു സസ്പെന്ഷനിലായിരുന്നു. കൊച്ചി സിറ്റി പൊലീസ് കമ്മീഷണറുടെ റിപ്പോര്ട്ട് പരിഗണിച്ചായിരുന്നു സസ്പെന്ഷന് നടപടി. തൃക്കാക്കര കൂട്ടബലാത്സംഗ കേസിലെ മൂന്നാം പ്രതിയാണ് പി.ആര് സുനു. എറണാകുളം സ്വദേശിയായ യുവതിയുടെ പരാതിയെ തുടര്ന്നാണ് ഇയാളെ പ്രതിചേര്ത്തത്. പിരിച്ചുവിട്ട ഉത്തരവിനെതിരെ കോടതിയെ സമീപിക്കുമെന്ന് സുനു പ്രതികരിച്ചു.