ദൈഗോളിയിലെ ബാങ്ക് കവര്‍ച്ചാശ്രമത്തിന് പിന്നില്‍ പെര്‍വാഡ് ബാങ്ക് കൊള്ളയടിക്കാന്‍ ശ്രമിച്ച സംഘമെന്ന് സംശയം

മഞ്ചേശ്വരം: ദൈഗോളിയില്‍ ബാങ്ക് കവര്‍ച്ചക്ക് ശ്രമിച്ചത് പെര്‍വാഡ് ബാങ്ക് കൊള്ളയടിക്കാന്‍ ശ്രമിച്ച സംഘമാണെന്ന് സംശയം. ദൈഗോളിയിലെ കൊടലമൊഗറു സര്‍വീസ് സഹകരണ ബാങ്കിലാണ് ഇന്നലെ പുലര്‍ച്ചെ കവര്‍ച്ചാ ശ്രമം നടന്നത്. ബാങ്കിന്റെ ഷട്ടര്‍ തകര്‍ത്ത് അകത്ത് കയറിയ സംഘം ലോക്കര്‍ തകര്‍ക്കാന്‍ ശ്രമം നടത്തിയെങ്കിലും പരാജയപ്പെടുകയായിരുന്നു. ഒരു അലമാര തകര്‍ത്തനിലയില്‍ കാണപ്പെട്ടു. സി.സി.ടി.വി. ക്യാമറ തിരിച്ചുവെച്ച നിലയിലാണ്. ഇതിന്റെ ഹാര്‍ഡ് ഡിസ്‌ക്ക് കവര്‍ച്ച ചെയ്യാന്‍ ശ്രമം നടന്നിരുന്നു. ഇന്നലെ രാവിലെ പത്ത് മണിയോടെയാണ് സംഭവം പുറത്തറിയുന്നത്. മൂന്നാഴ്ച്ച മുമ്പ് കുമ്പള പെര്‍വാഡ് സൊസൈറ്റി സര്‍വ്വീസ് കോപ്പറേറ്റീവ് ബാങ്കില്‍ കവര്‍ച്ചാശ്രമം നടന്നിരുന്നു. അതും ഒരു ഞായറാഴ്ച്ച രാത്രിയായിരുന്നു. അന്ന് ബാങ്കിനകത്ത് കയറിയ സംഘം ലോക്കര്‍ തകര്‍ക്കാന്‍ ശ്രമം നടത്തിയെങ്കിലും പരാജയപ്പെടുകയാണുണ്ടായത്. ഇതേ സംഘമാണ് ദൈഗോളിയില്‍ ബാങ്ക് കവര്‍ച്ചക്ക് ശ്രമിച്ചതിന് പിന്നിലെന്നാണ് പൊലീസിന്റെ സംശയം. വിരലടയാളവിദഗ്ധര്‍ സ്ഥലത്തെത്തി പ്രതികളുടേതെന്ന് സംശയിക്കുന്ന വിരലടയാളങ്ങള്‍ ശേഖരിച്ചു. രണ്ട് ബാങ്കുകളില്‍ കവര്‍ച്ചാശ്രമം നടന്നത് പൊലീസിന് ഏറെ തലവേദന സൃഷ്ടിച്ചിരിക്കുകയാണ്.
ബാങ്ക് കവര്‍ച്ചക്ക് ശ്രമിച്ചവരെ കണ്ടെത്താന്‍ കുമ്പള, മഞ്ചേശ്വരം പൊലീസ് സംഘങ്ങള്‍ അന്വേഷണം ഊര്‍ജിതമാക്കിയിട്ടുണ്ട്. രാത്രികാല പരിശോധന പൊലീസ് കര്‍ശനമാക്കി.