കുഞ്ചത്തൂരില്‍ വീടിന്റെ രണ്ടാം നിലയിലെ വാതില്‍ തകര്‍ത്ത് 20 പവന്‍ സ്വര്‍ണ്ണവും പണവും കവര്‍ന്നു

മഞ്ചേശ്വരം: ഉപ്പളയിലും മഞ്ചേശ്വരത്തും കവര്‍ച്ച സംഘം തമ്പടിച്ചതോടെ ജനം ഭീതിയില്‍. കുഞ്ചുത്തൂരില്‍ വീടിന്റെ രണ്ടാം നിലയിലെ വാതില്‍ തകര്‍ത്ത് 20 പവന്‍ സ്വര്‍ണ്ണാഭരണങ്ങളും 1000 രൂപയും കവര്‍ന്നു. യത്തീംഖാന റോഡില്‍ താമസിക്കുന്ന പരേതനായ പി.ഡി.പി അബ്ബാസിന്റെ വാടക വീട്ടിലാണ് കവര്‍ച്ച നടന്നത്. ഇന്നലെ രാത്രി 9 മണിയോടെ അബ്ബാസിന്റെ ഭാര്യയും മക്കളും വീട് പൂട്ടി ബന്ധുവിന്റെ കല്ല്യാണ ചടങ്ങിന് പോയിരുന്നു. പിന്നീട് 12.30ന് തിരിച്ചെത്തിയപ്പോഴാണ് കവര്‍ച്ച നടന്നതായി അറിയുന്നത്. അകത്തെ രണ്ട് അലമാരകള്‍ തകര്‍ത്താണ് സ്വര്‍ണ്ണാഭരണങ്ങളും പണവും കവര്‍ന്നത്. കവര്‍ച്ചാ സംഘം വീട്ടിനകത്ത് മുളക് പൊടി വിതറിയിട്ടുണ്ട്. മുളക് പൊടിയുടെ ഒരു കവര്‍ വീടിന് സമീപം കണ്ടെത്തി. കഴിഞ്ഞ മൂന്ന് മാസത്തിനിടെ ഉപ്പളയിലും മഞ്ചേശ്വരത്തുമായി പത്തോളം കവര്‍ച്ചകളാണ് നടന്നത്. നാല് ദിവസം മുമ്പ് ഹൊസങ്കടിയില്‍ കടയില്‍ കയറിയ കവര്‍ച്ചാ സംഘം 15,000 രൂപ കവരുകയും കടക്ക് തീ വെക്കുകയും ഉണ്ടായി. ഉപ്പളയില്‍ പൂട്ടിയിട്ട വീട്ടില്‍ നിന്ന് 8 പവന്‍ സ്വര്‍ണ്ണാഭരണങ്ങളും 1,36,000 രൂപയും കവരുകയും ഉണ്ടായി. കവര്‍ച്ചാസംഘം പ്രദേശത്ത് തമ്പടിച്ചതായി പൊലീസിന് വിവരം ലഭിച്ചിട്ടുണ്ട്. കവര്‍ച്ച വ്യാപകമായതോടെ രാത്രി കാല പരിശോധ ശക്തമാക്കിയിട്ടുണ്ട്.