കൊച്ചി: ഏറെ വിവാദമായ മാസപ്പടി വിഷയത്തില് മുഖ്യമന്ത്രി അടക്കമുള്ളവര്ക്ക് നോട്ടീസ് അയക്കാന് ഹൈക്കോടതിയുടെ നിര്ദ്ദേശം. കരിമണല് കമ്പനിയില് നിന്ന് മുഖ്യമന്ത്രി പിണറായി വിജയനും മകള് വീണാ വിജയനും രമേശ് ചെന്നിത്തല, കുഞ്ഞാലിക്കുട്ടി അടക്കം രാഷ്ട്രീയ നേതാക്കളും പണം വാങ്ങിയതില് വിജിലന്സ് അന്വേഷണം ആവശ്യപ്പെട്ടുള്ള ഹര്ജിയിലാണ് നിര്ണായക നീക്കവുമായി ഹൈക്കോടതി രംഗത്തെത്തിയത്.
കേസില് സ്വമേധയാ കക്ഷിചേര്ന്ന കോടതി, മുഖ്യമന്ത്രിയടക്കമുള്ളവര്ക്ക് നോട്ടീസ് അയക്കാന് നിര്ദ്ദേശിക്കുകയായിരുന്നു. ഹര്ജിയില് എല്ലാവരെയും കേള്ക്കണമെന്നും എതിര്കക്ഷികളെ കേള്ക്കാതെ തീരുമാനം എടുക്കാനാകില്ലെന്നും ജസ്റ്റിസ് കെ. ബാബു ചൂണ്ടിക്കാട്ടി.
അന്വേഷണം ആവശ്യപ്പെട്ടുള്ള ഹര്ജി മൂവാറ്റുപുഴ വിജിലന്സ് കോടതി തള്ളിയത് ചോദ്യം ചെയ്ത് കളമശേരി സ്വദേശി ഗിരീഷ് ബാബു നല്കിയ ഹര്ജിയിലാണ് ഹൈക്കോടതിയുടെ നിര്ണായക നീക്കം.
വിജിലന്സ് കോടതി ഉത്തരവ് തെറ്റെന്ന് ഹൈക്കോടതി നിയോഗിച്ച അമിക്കസ് ക്യൂറി നേരത്തെ അറിയിച്ചിരുന്നു. കേസില് തെളിവില്ലെന്ന വിജിലന്സ് കോടതി കണ്ടെത്തല് പ്രഥമദൃഷ്ട്യാ ശരിയല്ലെന്നും രാഷ്ട്രീയ നേതാക്കള്ക്ക് പണം നല്കിയെന്നതിന് സാക്ഷിമൊഴികളുള്ള സാഹചര്യത്തില് പ്രാഥമിക അന്വേഷണത്തിന് ഉത്തരവിടാമായിരുന്നുവെന്നുമാണ് അമിക്കസ് ക്യൂറിയുടെ റിപ്പോര്ട്ട്.
ഹര്ജിക്കാരനായ ഗിരീഷ് ബാബുവിന്റെ മരണത്തെ തുടര്ന്നാണ് കേസില് കോടതി അമിക്കസ് ക്യൂറിയെ നിയോഗിച്ചത്. 2023 ഓഗസ്റ്റ് 9നാണ് പിണറായി വിജയന്റെ മകള് വീണയ്ക്ക് സ്വകാര്യ കമ്പനി 1.72 കോടി നല്കിയത് നിയമവിരുദ്ധമെന്ന് ആദായനികുതി തര്ക്കപരിഹാര ബോര്ഡ് കണ്ടെത്തിയിരുന്നു.
