തിരുവനന്തപുരം: പാറശ്ശാല ഷാരോണ് വധക്കേസില് റിമാണ്ടില് കഴിയുന്ന പ്രതി ഗ്രീഷ്മയെ കോടതി 7 ദിവസത്തെ പൊലീസ് കസ്റ്റഡിയില് വിട്ടു. കൂടുതല് ചോദ്യം ചെയ്യുന്നതിനും തെളിവെടുപ്പുകള്ക്കുമാണ് പൊലീസ് കസ്റ്റഡിയില് വിട്ടത്. 7 ദിവസം കസ്റ്റഡിയില് വേണമെന്ന ആവശ്യം പ്രോസിക്യൂഷന് ഉന്നയിച്ചപ്പോള് പ്രതിഭാഗം ശക്തമായി എതിര്ത്തു. ഷാരോണും ഗ്രീഷ്മയും തമിഴ്നാട്ടില് പലയിടത്തും പോയിട്ടുണ്ടെന്നും അവിടെ കൊണ്ടുപോയി തെളിവെടുക്കാന് 7 ദിവസം വേണമെന്നുമുള്ള പ്രോസിക്യൂഷന്റെ ആവശ്യം കോടതി അംഗീകരിക്കുകയായിരുന്നു. ഗ്രീഷ്മയ്ക്ക് വൈദ്യസഹായം ഉറപ്പാക്കണമെന്നും കോടതി നിര്ദേശിച്ചു.
അതേസമയം വിഷം കൊടുത്തു കൊന്നുവെന്ന എഫ്ഐആര് പോലും പൊലീസിന്റെ പക്കലില്ലെന്ന് ഗ്രീഷ്മയ്ക്ക് വേണ്ടി ഹാജരായ അഭിഭാഷകന് വാദിച്ചു. ഗൂഢാലോചന ഉണ്ടായിട്ടില്ല. ഇല്ലാത്ത തെളിവുകള് സൃഷ്ടിക്കാനാണ് ശ്രമം. മുറിക്കുള്ളില് എന്താണ് സംഭവിച്ചതെന്ന് ആര്ക്കുമറിയില്ല. വിഷം കൊണ്ടുവന്നത് ഷാരോണ് ആയിക്കൂടെ എന്നും പ്രതിഭാഗം ചോദിച്ചു. ഷാരോണിന്റെ മരണമൊഴിയില് ഗ്രീഷ്മയെ കുറിച്ചൊന്നും പറയുന്നില്ലെന്ന വാദവും പ്രതിഭാഗം ഉന്നയിച്ചു. ഗ്രീഷ്മയെ ക്രിമിനലാക്കി മാറ്റിയത് ഷാരോണാണ്. ഗ്രീഷ്മയുടെ സ്വകാര്യ ചിത്രങ്ങള് ഷാരോണിന്റെ പക്കലുണ്ടായിരുന്നു. ഇതേക്കുറിച്ചും അന്വേഷണം വേണം. ഗ്രീഷ്മയുടെ ഭാഗത്തു നിന്നു കൂടി ചിന്തിക്കണമെന്നും പ്രതിഭാഗം അഭിഭാഷകന് പറഞ്ഞു. ഗ്രീഷ്മയുടെ മാതാപിതാക്കള്ക്ക് ഒറ്റ മകളേ ഉള്ളൂവെന്നത് കണക്കിലെടുക്കണമെന്നും ഗ്രീഷ്മയുടെ അഭിഭാഷകന് വാദിച്ചു.