തിരുവനന്തപുരം: കിഫ്ബി വായ്പയില് പുതിയ ബസ്സുകള് നിരത്തിലിറക്കുന്നതിനും ദീര്ഘദൂര സര്വ്വീസുകള് ഓപ്പറേറ്റ് ചെയ്യുന്നതിനും കെ.എസ്.ആര്.ടി.സി-സ്വിഫ്റ്റ് എന്ന സ്വതന്ത്ര കമ്പനി രൂപീകരിക്കാന് മന്ത്രിസഭ അനുമതി നല്കി. നിയമപരമായി സ്വിഫ്റ്റ് സ്വതന്ത്ര കമ്പനിയാവുമെങ്കിലും കെ.എസ്.ആര്.ടി.സിയുടെ സൗകര്യങ്ങള് ഉപയോഗിച്ചായിരിക്കും പ്രവര്ത്തിക്കുക.
ദീര്ഘദൂര ബസ്സുകളുടെ സര്വീസ് കാര്യക്ഷമമാക്കുന്നതിന് കേന്ദ്രീകൃത നിയന്ത്രണസംവിധാനമുണ്ടാകും. ഹൈക്കോടതി വിധിപ്രകാരം പിരിച്ചുവിടപ്പെട്ട എംപാനല്ഡ് ജീവനക്കാരെ പുനരധിവസിപ്പിക്കാന് കൂടിയാണ് ഇങ്ങനെയൊരു കമ്പനി രൂപീകരിക്കുന്നത്. കെ.എസ്.ആര്.ടി.സി ചെയര്മാനും മാനേജിംഗ് ഡയറക്ടറും തന്നെയായിരിക്കും പുതിയ കമ്പനിയുടെ എം.ഡി.യും.
പാലക്കാട് ജില്ലയില് അട്ടപ്പാടി ആസ്ഥാനമാക്കി ട്രൈബല് താലൂക്ക് രൂപീകരിക്കാന് തീരുമാനിച്ചു. ദീര്ഘകാലമായി കുടിശ്ശികയുള്ള മോട്ടോര്വാഹന നികുതി തവണകളായി അടയ്ക്കുന്നതിന് അനുമതി നല്കും. തദ്ദേശസ്വയംഭരണ സ്ഥാപനങ്ങള്ക്കുള്ള ഓംബുഡ്സ്മാനായി മുന് ഹൈക്കോടതി ജഡ്ജി പി.എസ്. ഗോപിനാഥനെ നിയമിക്കാന് തീരുമാനിച്ചു.
വയനാട് പാക്കേജിന്റെ ഭാഗമായി വയനാട്ടിലെ കാപ്പിക്കുരുവിന്റെ സംഭരണവും സംസ്ക്കരണവും താല്ക്കാലികമായി ബ്രഹ്മഗിരി ഡവലപ്മെന്റ് സൊസൈറ്റിയെ ഏല്പ്പിക്കാന് തീരുമാനിച്ചു. സംസ്കരണ സംവിധാനങ്ങള് മെച്ചപ്പെടുത്തുന്നതിന് ബ്രഹ്മഗിരി സൊസൈറ്റിക്ക് അഞ്ച് കോടി രൂപ ഉടനെ നല്കും. കുടുംബശ്രീ മുഖേന 600 കോഫി വെന്ഡിംഗ് പോയന്റുകള് സ്ഥാപിക്കാനും തീരുമാനിച്ചു.