സ്കൂളുകളില് വായന ഒരു പിരീഡാകേണ്ട സമയം
സിലബസുകളും പരീക്ഷാരീതികളും സാങ്കേതികവിദ്യയും എല്ലാം പുതുക്കപ്പെടുമ്പോഴും കുട്ടികളുടെ അടിസ്ഥാന വളര്ച്ചയ്ക്ക് ഏറ്റവും ആവശ്യമായ ചില ശീലങ്ങള് പിന്നിലേക്കു പോകുന്നുവെന്നത് ഒരു വസ്തുതയാണ്. അവയില് ഏറ്റവും പ്രധാനപ്പെട്ട ഒന്നാണ് വായന.
ഇന്നത്തെ വിദ്യാഭ്യാസ രംഗം വലിയ മാറ്റങ്ങളിലൂടെ കടന്നുപോകുന്ന ഘട്ടത്തിലാണ്. സിലബസുകളും പരീക്ഷാരീതികളും സാങ്കേതികവിദ്യയും എല്ലാം പുതുക്കപ്പെടുമ്പോഴും കുട്ടികളുടെ അടിസ്ഥാന വളര്ച്ചയ്ക്ക് ഏറ്റവും ആവശ്യമായ ചില ശീലങ്ങള് പിന്നിലേക്കു പോകുന്നുവെന്നത് ഒരു വസ്തുതയാണ്. അവയില് ഏറ്റവും പ്രധാനപ്പെട്ട ഒന്നാണ് വായന. പാഠപുസ്തകങ്ങളിലൊതുങ്ങുന്ന പഠനരീതിക്കപ്പുറം പത്രവും പുസ്തകവും കുട്ടികളുടെ ജീവിതത്തിന്റെ ഭാഗമാക്കേണ്ട സമയം അതിക്രമിച്ചിരിക്കുന്നു.
സ്കൂളുകളില് പത്രവും പുസ്തകവും വായിക്കാന് പ്രത്യേക ഒരു പിരീഡ് അനുവദിച്ചാല്, അത് കുട്ടികളുടെ അറിവില് മാത്രമല്ല, അവരുടെ ചിന്താശേഷിയിലും ഭാഷാപരമായ കഴിവുകളിലും വലിയ മാറ്റങ്ങള് ഉണ്ടാക്കും. വായന ദിനത്തില് മാത്രം ഓര്മ്മിക്കുന്ന ഒരു ചടങ്ങായി വായനയെ ചുരുക്കാതെ, കുട്ടികളുടെ ദിനചര്യയുടെ ഭാഗമാക്കേണ്ടതുണ്ട്. കാരണം, വായന ഒരു ദിനാഘോഷമല്ല; അത് ജീവിതം മുഴുവന് കൂട്ടായി നില്ക്കുന്ന ഒരു ശീലമാണ്. ഒരു കുട്ടി പത്രം വായിക്കുമ്പോള്, അവന് ചുറ്റുപാടുകളില് നടക്കുന്ന സംഭവങ്ങളെ കുറിച്ച് ബോധവാനാകുന്നു. വാര്ത്തകളിലൂടെ സമൂഹത്തിലെ പ്രശ്നങ്ങളും നേട്ടങ്ങളും അവന് തിരിച്ചറിയുന്നു. അതുവഴി അവനില് വിമര്ശനാത്മകമായ ചിന്തയും അഭിപ്രായങ്ങള് രൂപപ്പെടുത്താനുള്ള കഴിവും വളരുന്നു. ഇത് ജനാധിപത്യ സമൂഹത്തിന് ആവശ്യമായ ഉത്തരവാദിത്വമുള്ള പൗരന്മാരെ സൃഷ്ടിക്കുന്നതില് വലിയ പങ്ക് വഹിക്കുന്നു.
പുസ്തകവായനയാകട്ടെ, കുട്ടികളുടെ മാനസികവും മാനുഷികവുമായ വളര്ച്ചയ്ക്ക് അനിവാര്യമാണ്. കഥകളും കവിതകളും നോവലുകളും കുട്ടികളുടെ മനസ്സില് കരുണയും സഹാനുഭൂതിയും സ്നേഹവും വളര്ത്തുന്നു. മറ്റുള്ളവരുടെ ജീവിതാനുഭവങ്ങള് വായനയിലൂടെ മനസ്സിലാക്കുന്ന കുട്ടി, സമൂഹത്തില് കൂടുതല് മാനുഷിക സമീപനം സ്വീകരിക്കുന്ന വ്യക്തിയായി വളരുന്നു. ഇത് പരീക്ഷാമാര്ക്കുകളില് അളക്കാന് കഴിയാത്ത, പക്ഷേ ജീവിതത്തില് ഏറെ വിലമതിക്കപ്പെടുന്ന ഒരു നേട്ടമാണ്.
ഇന്നത്തെ കാലത്ത് കുട്ടികള് കൂടുതലായി മൊബൈല് ഫോണുകളുടെയും സോഷ്യല് മീഡിയയുടെയും ലോകത്താണ്. അവിടെ നിന്നും ലഭിക്കുന്ന വിവരങ്ങള് പലപ്പോഴും അസ്ഥിരവും ആഴമില്ലാത്തതുമാണ്. എന്നാല് വായനയിലൂടെ ലഭിക്കുന്ന അറിവ് ക്രമബദ്ധവും ചിന്തയെ ഉണര്ത്തുന്നതുമാണ്. ദിവസേന കുറച്ചുസമയം വായനയ്ക്കായി മാറ്റിവെച്ചാല്, കുട്ടികളുടെ ഭാഷാപരമായ കഴിവുകളും ആശയവിനിമയ ശേഷിയും സ്വാഭാവികമായി മെച്ചപ്പെടും. സ്കൂളുകളില് വായനയ്ക്കായി ഒരു പിരീഡ് നിശ്ചയിക്കുന്നത് പഠനസമയം നഷ്ടപ്പെടുത്തുന്നതായി കാണേണ്ടതില്ല. മറിച്ച്, അത് പഠനത്തെ കൂടുതല് അര്ത്ഥവത്താക്കുന്ന ഒരു നടപടിയായാണ് കാണേണ്ടത്. വായനയിലൂടെ ലഭിക്കുന്ന ബോധ്യവും ചിന്താശേഷിയും എല്ലാ വിഷയങ്ങളിലെയും പഠനത്തിന് സഹായകരമാണ്. അതുകൊണ്ടുതന്നെ, വായന പാഠ്യപദ്ധതിക്ക് പുറത്തുള്ള ഒരു അധികപ്രവര്ത്തനമല്ല; വിദ്യാഭ്യാസത്തിന്റെ അവിഭാജ്യഘടകമാണ്. വായന ദിനങ്ങളില് പുസ്തകപ്രദര്ശനങ്ങളും പ്രസംഗങ്ങളും സംഘടിപ്പിക്കുന്നത് നല്ല കാര്യമാണ്. എന്നാല് ആ ഒരുദിവസത്തെ ആവേശം പിന്നീട് നിലനില്ക്കാതെ പോകുന്ന സാഹചര്യം പല സ്കൂളുകളിലും കാണാം.
വായന ഒരു ദിനത്തില് ഒതുങ്ങുമ്പോള്, അതിന്റെ യഥാര്ത്ഥ ലക്ഷ്യം നഷ്ടപ്പെടുന്നു. വായന ദിനങ്ങള് ഓര്മ്മപ്പെടുത്തലുകള് മാത്രമാകണം; വായന കുട്ടികളുടെ സ്ഥിരശീലമാകണം. അതിനാല്, ഓരോ സ്കൂളിലും ഓരോ ക്ലാസ്സിലും ആഴ്ചയില് കുറച്ചെങ്കിലും ഒരു പിരീഡ് പത്രത്തിനും പുസ്തകത്തിനുമായി മാറ്റിവെക്കേണ്ടതുണ്ട്. കുട്ടികള്ക്ക് ഇഷ്ടമുള്ള പുസ്തകങ്ങള് തിരഞ്ഞെടുക്കാന് അവസരം നല്കുകയും അധ്യാപകര് വായനയ്ക്ക് പ്രചോദനമാകുകയും ചെയ്താല്, അതിന്റെ ഫലം വര്ഷങ്ങള്ക്കിപ്പുറം സമൂഹം അനുഭവിക്കും.
വായനാ ദിനത്തില് മാത്രം കുട്ടികളെ വായനയ്ക്ക് പ്രോത്സാഹിപ്പിച്ചാല് മതിയാവില്ല. വായന അവരെ പരീക്ഷാ വിജയത്തിനുള്ള ഉപകരണമല്ല, ജീവിതത്തെ മനസ്സിലാക്കാനുള്ള വഴിയാണെന്ന് പഠിപ്പിക്കണം. സ്കൂളുകളില് വായന ഒരു പിരീഡാകുമ്പോള്, അറിവുള്ളതും ബോധമുള്ളതുമായ ഒരു തലമുറ വളര്ന്നുവരും.
