പേവിഷ പ്രതിരോധ വാക്സിന് ഫലപ്രദമാകണം
തെരുവ് നായ്ക്കളുടെ കടിയേല്‍ക്കുന്നവര്‍ മൂന്ന് തവണ പേവിഷ പ്രതിരോധവാക്‌സിനെടുത്താല്‍ പോലും മരണപ്പെടുന്ന സംഭവങ്ങള്‍ തികച്ചും ആശങ്കാജനകമാണ്. കഴിഞ്ഞ കുറച്ചുനാളുകളായി ഇത്തരം സംഭവങ്ങള്‍ ആവര്‍ത്തിക്കപ്പെടുന്നത് ആരോഗ്യരംഗത്ത് ജനങ്ങള്‍ അര്‍പ്പിച്ചിരിക്കുന്ന വിശ്വാസത്തെ കൂടി ബാധിക്കുന്ന പ്രശ്‌നമാണ്. പ്രതിരോധ കുത്തിവെപ്പ് എടുത്തിട്ടും പേവിഷബാധ സ്ഥിരീകരിച്ച് ആസ്പത്രിയില്‍ ചികിത്സയില്‍ ആയിരുന്ന ഏഴുവയസുകാരി മരിച്ച സംഭവം വലിയ തോതിലുള്ള വിമര്‍ശനങ്ങള്‍ക്കാണ് ഇടവരുത്തിയത്. കൊല്ലം കുന്നിക്കോട് ജാസ്മിന്‍ മന്‍സിലില്‍ നിയാ ഫൈസലാണ് പേവിഷപ്രതിരോധ വാക്‌സിനെടുത്തിട്ടും മരിച്ചത്. വെന്റിലേറ്ററിന്റെ സഹായത്തോടെ ദിവസങ്ങളോളം ജീവന്‍ നിലനിര്‍ത്തിയ ശേഷമാണ് കുട്ടി മരണത്തിന് കീഴടങ്ങിയത്. മൂന്ന് ഡോസ് വാക്സിന് എടുത്തിട്ടും പേവിഷബാധയുണ്ടായതില്‍ ആരോഗ്യവകുപ്പിനെതിരെ വിമര്‍ശനം ശക്തമാകുന്നതിനിടയിലാണ് കുട്ടിയുടെ മരണം സംഭവിച്ചത്. കഴിഞ്ഞ ഏപ്രില്‍ എട്ടിനാണ് വീട്ടുമുറ്റത്ത് കളിച്ചുകൊണ്ടിരുന്ന കുട്ടിക്ക് നായയുടെ കടിയേറ്റത്. മുറ്റത്തെ താറാവിനെ ലക്ഷ്യമിട്ട് വന്നതായിരുന്നു തെരുവുനായ. താറാവിനെ രക്ഷിക്കാന്‍ കുട്ടി അടുത്തേക്ക് ഓടിയെത്തിയതോടെ കൈമുട്ടിന് കടിയേല്‍ക്കുകയായിരുന്നു. ഉടന്‍ തന്നെ വീടിന് സമീപത്തെ വിളക്കുടി പ്രാഥമികാരോഗ്യകേന്ദ്രത്തിലെത്തിച്ച് പ്രതിരോധ കുത്തിവെപ്പ് എടുത്തിരുന്നു. തുടര്‍ന്ന് ഏപ്രില്‍ 11, 15 തിയതികളിലായി രണ്ടും മൂന്നും ഡോസ് കുത്തിവെപ്പും എടുത്തു. അവസാന ഡോസ് മേയ് ആറിന് എടുക്കാനിരിക്കെയാണ് കുട്ടിക്ക് പനി ബാധിച്ചത്. കടിയേറ്റ കൈമുട്ടിന്റെ ഭാഗത്ത് വേദനയും അനുഭവപ്പെട്ടു. തുടര്‍ന്ന് പുനലൂര്‍ താലൂക്കാസ്പത്രിയിലും വിദഗ്ധചികിത്സയ്ക്കായി എസ്.എ.ടിയിലും പ്രവേശിപ്പിക്കുകയായിരുന്നു. സംസ്ഥാനത്ത് പേവിഷ ബാധയേറ്റ് ഈ വര്‍ഷം മരണപ്പെട്ടത് മൂന്ന് കുട്ടികളാണ്.
കഴിഞ്ഞ ഏപ്രില്‍ 9നാണ് പത്തനംതിട്ട പുല്ലാട് സ്വദേശി ഭാഗ്യലക്ഷ്മി (13) പേ വിഷബാധയേറ്റ് മരിച്ചത്. വാക്സിന് എടുത്തിട്ടും പേവിഷബാധ ഉണ്ടാകുകയായിരുന്നു. ഏപ്രില്‍ 29ന് മലപ്പുറം തേഞ്ഞിപ്പലം സ്വദേശി സിയ ഫാരിസും (ആറ്) സമാനമായ പേവിഷ ബാധയേറ്റ് മരിച്ചിരുന്നു. കഴിഞ്ഞ ഡിസംബറില്‍ നായയുടെ കടിയേറ്റ് കോഴഞ്ചേരിയിലെ ജില്ലാ ആസ്പത്രിയില്‍ നിന്ന് കുത്തിവെയ്‌പ്പെടുത്ത ഭാഗ്യലക്ഷ്മിയുടെ മരണം മൂന്നുമാസത്തിന് ശേഷമായിരുന്നു. കുട്ടി അവസാനം ചികിത്സയില്‍ കഴിഞ്ഞ സ്വകാര്യ ആസ്പത്രിയില്‍ നിന്ന് ശേഖരിച്ച സാമ്പിളുകള്‍ സ്റ്റേറ്റ് പബ്ലിക് ഹെല്‍ത്ത് ലാബില്‍ പരിശോധിച്ചപ്പോഴാണ് പേവിഷബാധ സ്ഥിരീകരിച്ചത്. പേവിഷബാധക്കുള്ള വാക്‌സിനുകള്‍ ഗുണനിലവാരമില്ലാത്തതാണെന്നാണ് തുടര്‍ച്ചയായ മരണങ്ങള്‍ തെളിയിക്കുന്നത്. ഇത് ആളുകളുടെ ജീവന്റെ പ്രശ്‌നമാണ്. തെരുവ് നായ്ക്കളുടെ ശല്യം തടയാന്‍ അധികാരികള്‍ക്ക് സാധിക്കുന്നില്ല. നായ്ക്കളുടെ കടിയേല്‍ക്കുന്നവരെ മരണത്തിന് വിട്ടുകൊടുക്കാതെ പ്രതിരോധ വാക്‌സിനുകളുടെ ഗുണനിലവാരം ഉറപ്പുവരുത്താന്‍ അടിയന്തിര നടപടി സ്വീകരിക്കണം.
