ട്രോളിങ്ങ് നിരോധനം വന്നതോടെ മത്സ്യത്തിന് വലിയ ഡിമാന്റാണ്. ഇത് മുതലെടുത്ത് അന്യസംസ്ഥാനങ്ങളില് നിന്ന് അഴുകിയതും രാസപദാര്ത്ഥങ്ങള് ഇട്ടതുമായ മത്സ്യം സംസ്ഥാനത്ത് എത്തിക്കൊണ്ടിരിക്കയാണ്. കഴിഞ്ഞ ദിവസം കൊല്ലത്ത് നിന്ന് 10,750 കിലോ ചീഞ്ഞ മത്സ്യമാണ് ഭക്ഷ്യസുരക്ഷ വകുപ്പ് പിടികൂടിയത്. ആഴ്ചകള് പഴക്കമുള്ള മീന് വേണ്ടത്ര ഐസിടാതെ രാസവസ്തുക്കള് കലര്ത്തി മൊത്ത വ്യാപാരികള്ക്ക് എത്തിച്ചു നല്കുകയാണ്. തമിഴ്നാട്ടിലെ തൂത്തുക്കുടി, കടവൂര് എന്നിവിടങ്ങളില് നിന്ന് ലോറികളില് കൊണ്ടു വന്ന മീന് തിരുവനന്തപുരം, കൊല്ലം, പത്തനംതിട്ട ജില്ലകളിലെ മൊത്ത വ്യാപാരികള്ക്ക് എത്തിച്ചുകൊടുക്കാനുള്ളതായിരുന്നു. ട്രോളിങ്ങ് നിരോധനത്തിന് ശേഷം കര്ണ്ണാടക, ഗുജറാത്ത്, ആന്ധ്ര സംസ്ഥാനങ്ങളില് നിന്ന് വന്തോതില് മീന് കൊണ്ടുവരുന്നുണ്ട്. ഇവിടങ്ങളില് വിലക്കുറവും ലഭ്യത കൂടുതലുമുള്ള ദിവസങ്ങളില് അശാസ്ത്രീയമായി സംഭരിക്കുന്ന മീനാണ് കേരളത്തിലേക്ക് കടത്തുന്നത്. വലിയ വിലക്കുറവില് ലഭിക്കുന്നതിനാല് ഇവിടത്തെ ചില വ്യാപാരികള് ഇതിന്റെ കച്ചവടത്തിന് പ്രാമുഖ്യം നല്കുകയും ചെയ്യുന്നു. മൂന്നു നാലു ടണ് കയറ്റാവുന്ന വലിയ കവചിത ലോറികളില് മീന് പിടിത്ത തുറമുഖങ്ങളുള്ള സ്ഥലങ്ങളിലേക്കാണ് മീന് എത്തിക്കുന്നത്. തുറമുഖത്തിന് പുറത്ത് വെച്ച് കച്ചവടക്കാര്ക്ക് വില്ക്കുകയാണ് പതിവ്. 17 ദിവസമായി ട്രോളിങ്ങ് നിരോധനം തുടങ്ങിയിട്ട്. ഇതോടെ കേരളത്തിലെ തുറമുഖങ്ങളില് നിന്ന് ചെറുകിട മത്സ്യത്തൊഴിലാളികള് മാത്രമാണ് മീന് പിടിക്കാന് പോകുന്നത്. കഴിഞ്ഞ ദിവസം പിടികൂടിയതില് നത്തോലി, ചെറിയ അയല, ചെറിയ ചൂര, മാന്തള് തുടങ്ങിയ മത്സ്യങ്ങളാണ് എത്തിക്കുന്നത്. ട്രോളിങ്ങ് നിരോധനത്തിന് മുമ്പ് തമിഴ്നാട്ടില് നിന്നുള്ള ബോട്ടുകളില് എത്തിക്കുന്ന മീന് ഉള്ക്കടലില് വെച്ചും കമ്മീഷന് ഏജന്റ്മാര്ക്ക് വിറ്റിരുന്നു. അപ്പോള് പിടിച്ച മീന് എന്ന മട്ടില് ഇത് നമ്മുടെ തുറമുഖങ്ങളിലെത്തിച്ച് വിറ്റഴിക്കുകയായിരുന്നു. ഇത് മത്സ്യത്തൊഴിലാളികളും ഏജന്റ്മാരും തമ്മിലുള്ള തര്ക്കത്തിനും കാരണമായിരുന്നു. മീനില് ഫോര്മാലിനാണ് കോടുകൂടാതിരിക്കാന് ചേര്ക്കുന്നത്. ഏതാനും ദിവസം മുമ്പ് വാളയാര് ചെക്ക് പോസ്റ്റില് വെച്ച് 6,000 കിലോ ചെമ്മീന് പിടികൂടിയിരുന്നു. രാസവസ്തു കലര്ത്തിയതായിരുന്നു മീന്. 45 ലോഡുകളായാണ് ഇവ കേരളത്തിലെത്തിച്ചത്. മിതമായ തോതില് രാസവസ്തു ഉപയോഗിക്കുന്നതില് തെറ്റില്ല. എന്നാല് സംസ്ഥാനത്തെത്തുന്ന മത്സ്യങ്ങളില് ഫോര്മാലിന്, അമോണിയ തുടങ്ങിയവയുടെ അമിത ഉപയോഗമാണ് കണ്ടെത്തിയിട്ടുള്ളത്. ഫോര്മാലിന് പ്രധാനമായും ഉപയോഗിക്കുന്നത് മൃതദേഹങ്ങള് കേടുകൂടാതെ സൂക്ഷിക്കാനാണ്. ഇവ മനുഷ്യ ശരീരത്തിലെത്തിയാല് വിഷമായി പ്രവര്ത്തിക്കും. ആന്തരാവയവങ്ങളുടെ പ്രവര്ത്തനത്തെ പ്രതികൂലമായി ബാധിക്കുകയും മാരകമായ അസുഖങ്ങള്ക്ക് കാരണമാവുകയും ചെയ്യും. മീനില് ഉപയോഗിക്കുന്ന ഐസ് പെട്ടെന്ന് അലിഞ്ഞുതീരാതിരിക്കാനാണ് അമോണിയ ഉപയോഗിക്കുന്നത്. സോഡിയം ബെന്സോസൈറ്റാണ് മറ്റൊരു രാസസാന്നിധ്യം. കേരളത്തിലെ കച്ചവടക്കാരില് പലരും ഇതിന്റെയൊക്കെ ദൂഷ്യഫലങ്ങള് അറിയാതെയാണ് ഇവ ഉപയോഗിക്കുന്നത്. മീനില് ഈച്ച വരാതിരിക്കാനും പഴക്കം തോന്നാതിരിക്കാനും ബെന്സോസൈറ്റ് ഉപയോഗിക്കുന്നത് വഴി സാധിക്കും. എന്തായാലും മനുഷ്യരെ മാറാരോഗികളാക്കി മാറ്റുകയാണ് ഇത്തരം മത്സ്യവില്പനയിലൂടെ. അന്യസംസ്ഥാനങ്ങളില് നിന്ന് എത്തുന്ന മത്സ്യം തടയാന് കര്ശന നടപടി ഉണ്ടാവണം.