എയിംസ് പി.ജി പരീക്ഷയിലും പ്രവേശനം നേടി ഡോ. സുലൈഖ തളങ്കര

കാസര്‍കോട്: ഓള്‍ ഇന്ത്യ ഇന്‍സ്റ്റിറ്റ്യൂട്ട് ഓഫ് മെഡിക്കല്‍ സയന്‍സിന്റെ 2023 മെയ് മാസം നടന്ന പി.ജി പ്രവേശന പരീക്ഷയിലും തളങ്കര സ്വദേശിനി ഡോ. സുലൈഖക്ക് മികച്ച വിജയം. എയിംസ് മെഡിക്കല്‍ പ്രവേശന പരീക്ഷയിയില്‍ 2017ല്‍ മികച്ച റാങ്കോടെ പ്രവേശനം നേടിയ സുലൈഖ ഒഡീഷയിലെ ഭൂവനേശ്വര്‍ എയിംസ് മെഡിക്കല്‍ കോളേജില്‍ കഴിഞ്ഞ ഡിസംബറിലാണ് എം.ബി.ബി.എസ് പഠനം പൂര്‍ത്തിയാക്കിയത്. തുടര്‍ന്ന് ഈ വര്‍ഷം മെയില്‍ നടന്ന എയിംസിന്റെ പി.ജി പ്രവേശന പരീക്ഷയിലും ആദ്യ ശ്രമത്തില്‍ തന്നെ ഡോ. സുലൈഖ മികച്ച നേട്ടത്തോടെ പ്രവേശനം നേടി. എയിംസ് റായ്പൂരില്‍ ഗൈനക്കോളജി വിഭാഗത്തിലാണ് ഡോ. സുലൈഖ സീറ്റ് കരസ്ഥമാക്കിയത്. എയിംസില്‍ പി.ജി സീറ്റ് കരസ്ഥമാക്കിയ കാസര്‍കോട്ടെ ആദ്യ ഡോക്ടര്‍ എന്ന പ്രത്യേകതയും ഈ നേട്ടത്തിനുണ്ട്. തളങ്കര പടിഞ്ഞാറിലെ എം.എച്ച് അബൂബക്കറിന്റെയും ഫോര്‍ട്ട് റോഡിലെ ഹസീന കരിപ്പൊടിയുടെയും മകളാണ്.