തിരുവനന്തപുരം: ദുരിതാശ്വാസ ഫണ്ട് വകമാറ്റിയെന്ന കേസില് മുഖ്യമന്ത്രിക്ക് താല്ക്കാലിക ആശ്വാസം. മൂന്നംഗ വിശാല ബെഞ്ചിന് ലോകായുക്ത കേസ് വിട്ടു. രണ്ടംഗ ബെഞ്ചില് വ്യത്യസ്ത അഭിപ്രായ വ്യത്യാസമുണ്ടെന്നും അതിനാല് കേസ് മൂന്നംഗ ബെഞ്ചിന് വിടുകയാണെന്നും ലോകായുക്ത ജസ്റ്റിസ് സിറിയക് ജോസഫ് അറിയിച്ചു. കേസില് മൂന്നംഗ ബെഞ്ച് വീണ്ടും വിശമായ വാദം കേള്ക്കും. ഇതിനുള്ള തീയതി പിന്നീട് പ്രഖ്യാപിക്കും. ലോകായുക്ത ജസ്റ്റിസ് സിറിയക്ക് ജോസഫും ഉപലോകായുക്ത ജസ്റ്റിസ് ഹാറൂണ് അല് റഷീദും വ്യത്യസ്ത അഭിപ്രായമാണ് പ്രകടിപ്പിച്ചത്. തുടര്ന്നാണ് മൂന്നംഗ വിശാലബെഞ്ചിന് വിടാന് തീരുമാനിച്ചത്.
കഴിഞ്ഞ വര്ഷം മാര്ച്ച് 18ന് വാദം പൂര്ത്തിയായി ഒരു വര്ഷം പിന്നിട്ടിട്ടും വിധി വൈകിയതിനാല് പരാതിക്കാരന് ഹൈക്കോടതിയെ സമീപിച്ചതോടെയാണ് ഇന്ന് വിധി പ്രഖ്യാപിക്കാന് കേസെടുത്തത്. അഴിമതിയും സ്വജനപക്ഷപാതവും തെളിഞ്ഞാല് പൊതുപ്രവര്ത്തകന് വഹിക്കുന്ന പദവി ഒഴിയേണ്ടിവരുമെന്ന ലോകായുക്ത നിയമത്തിലെ പതിനാലാം വകുപ്പ് പ്രകാരമുള്ള കേസാണിത്. എന്.സി.പി നേതാവായിരുന്ന ഉഴവൂര് വിജയന്റെ കുടുംബത്തിന് 25 ലക്ഷവും അന്തരിച്ച എം.എല്.എ. കെ.കെ രാമചന്ദ്രന്റെ കുടുംബത്തിന് എട്ടരലക്ഷം രൂപയും കോടിയേരി ബാലകൃഷ്ണന്റെ പൈലറ്റ് വാഹനം അപകടത്തില്പെട്ട് മരിച്ച സിവില് പൊലീസ് ഓഫീസറുടെ കുടുംബത്തിന് 20 ലക്ഷവും അനുവദിച്ചത് ചോദ്യം ചെയ്തായിരുന്നു പരാതി.