ന്യൂഡല്ഹി: ദേശീയ സൈക്കിള് പോളോ ചാമ്പ്യന്ഷിപ്പില് പങ്കെടുക്കാന് നാഗ്പൂരിലെത്തിയ കേരളാ താരം നിദ ഫാത്തിമ(10)യുടെ മരണവുമായി ബന്ധപ്പെട്ട് അന്വേഷണം ആവശ്യപ്പെട്ട് ലോക്സഭയില് അടിയന്തര പ്രമേയത്തിന് നോട്ടീസ്. എ.എം ആരിഫ് എം.പിയാണ് ലോക്സഭയില് നോട്ടീസ് നല്കിയത്. ദേശീയ സൈക്കിള് പോളോ ചാമ്പ്യന്ഷിപ്പില് പങ്കെടുക്കാന് കേരളത്തില് നിന്നും നാഗ്പൂരിലെത്തിയ നിദ ഇന്നലെയാണ് മരിച്ചത്.
കേരള സൈക്കിള് പോളോ അസോസിയേഷനും സൈക്കിള് പോളോ ഫെഡറേഷന് ഓഫ് ഇന്ത്യയും തമ്മിലുള്ള കിട മത്സരത്തിനിടെയിലാണ് നിദ ഫാത്തിമയുടെ ജീവന് പൊലിഞ്ഞത്. ദേശീയ ഫെഡറേഷന്റെ അംഗീകാരമില്ലെന്ന പേരില് താരങ്ങള്ക്ക് നാഗ്പൂരില് താമസ സൗകര്യവും ഭക്ഷണവും ദേശീയ ഫെഡറേഷന് ഒരുക്കിയിരുന്നില്ല.
നിദ ഫാത്തിമയടക്കം കേരള സൈക്കിള് പോളോ അസോസിയേഷന്റെ 24 താരങ്ങള് നാഗ്പൂരിലെത്തിയത് കേരള സ്പോട്സ് കൗണ്സിലിന്റെ അംഗീകാരത്തിലും സാമ്പത്തിക സഹായത്തിലുമാണ്. എന്നാല് സൈക്കിള്പോളോ ഫെഡറേഷന് ഓഫ് ഇന്ത്യയുടെ അംഗീകാരമുള്ളത് സൈക്കിള് ഫോളോ അസോസിയേഷന് ഓഫ് കേരളയ്ക്കാണ്. ഇതിന്റെ പേരിലാണ് കേരളത്തില് നിന്നുള്ള സംഘത്തിന് അവഗണന നേരിടേണ്ടി വന്നത്.
അതിനിടെ നിദ ഫാത്തിമ മരിച്ച സംഭവത്തില് കേരള അസോസിയേഷന് ഹൈക്കോടതിയെ സമീപിക്കാന് ഒരുങ്ങുന്നു. കോടതി ഉത്തരവുമായി എത്തിയിട്ടും താമസവും ഭക്ഷണവുമടക്കം സൗകര്യങ്ങള് സംഘാടകര് ഒരുക്കിയില്ലെന്ന് കാണിച്ചാണ് കോടതിയെ സമീപിക്കുന്നത്. നിദാ ഫാത്തിമയുടെ പിതാവ് ശിഹാബ് രാത്രിയോടെ നാഗ്പൂരിലെത്തി. പോസ്റ്റ്മോര്ട്ടം നടപടികള് പൂര്ത്തിയാക്കിയ ശേഷം ഇന്ന് തന്നെ മൃതദേഹം നാട്ടിലെത്തിക്കാനാണ് ശ്രമം.