കോട്ടയം: കേരളം സുരക്ഷിതമല്ലെന്ന് സൂചിപ്പിക്കുന്ന കേന്ദ്ര ആഭ്യന്തരമന്ത്രി അമിത് ഷായുടെ പരാമര്ശത്തിന് എതിരെ മുഖ്യമന്ത്രി പിണറായി വിജയന്. എന്താണ് കേരളത്തെ കുറിച്ച് നിങ്ങള്ക്ക് പറയാനുള്ളതെന്ന് ചോദിച്ച മുഖ്യമന്ത്രി, മതനിരപേക്ഷ ചിന്തയോടെ ജനങ്ങള് താമസിക്കുന്ന നാടാണ് കേരളമെന്ന് മുഖ്യമന്ത്രി പറഞ്ഞു. എന്താണ് കേരളത്തെ കുറിച്ച് അമിത് ഷാ അര്ധോക്തിയില് പറഞ്ഞ് നിര്ത്തിയത് എന്നായിരുന്നു പിണറായി വിജയന്റെ ചോദ്യം.
ഭരണം അതിസമ്പന്നര്ക്ക് വേണ്ടിയാവരുത്. പാവപ്പെട്ടവന് വേണ്ടിയാവണം. പട്ടിണിയും ദാരിദ്ര്യവും കൊടികുത്തി വാഴുകയാണ്. ഇതിനെതിരെ ജനങ്ങള് പ്രതിഷേധിക്കാനിറങ്ങും. ആ കാര്യങ്ങള് ജനങ്ങള് ചിന്തിക്കാതിരിക്കാന് വര്ഗീയ സംഘര്ഷമുണ്ടാക്കാനാണ് ബി.ജെ.പി ശ്രമിക്കുന്നതെന്നും അതിനാലാണ് ബി.ജെ.പി ഭരണം ഉള്ളിടത്തും ഇല്ലാത്തിടത്തും സംഘപരിവാര് വര്ഗീയ കലാപങ്ങള്ക്കും വര്ഗീയ ചേരിതിരിവിനും ശ്രമിക്കുന്നതെന്നും മുഖ്യമന്ത്രി കുറ്റപ്പെടുത്തി. ബിജെപിയുടെ ഇത്തരം നീക്കങ്ങള് നടക്കാത്ത ഒരിടം കേരളമാണ്. മറ്റ് പ്രദേശങ്ങളെ പോലെ ഈ പ്രദേശത്തെ മാറ്റാന് ഈ നാടും ജനങ്ങളും സമ്മതിക്കില്ലെന്നും വര്ഗീയതയ്ക്കെതിരെ ജീവന് കൊടുത്തു പോരാടിയവരാണ് ഈ മണ്ണിലുള്ളതെന്നും മുഖ്യമന്ത്രി പറഞ്ഞു.