അസ്ഫാക് ആലം നേരത്തെയും പീഡനക്കേസിലെ പ്രതി; പരേഡില്‍ പ്രതിയെ താജുദ്ദീന്‍ തിരിച്ചറിഞ്ഞു

കൊച്ചി: ആലുവയില്‍ അഞ്ചു വയസ്സുകാരി അതിക്രൂര ബലാത്സംഗത്തിനിരയായി കൊല ചെയ്യപ്പെട്ട സംഭവത്തില്‍ നിര്‍ണായക വെളിപ്പെടുത്തല്‍ പുറത്ത്. കേസിലെ പ്രതി അസ്ഫാക് ആലം നേരത്തെയും പീഡനക്കേസില്‍ പ്രതിയാണെന്നും 10 വയസ്സുള്ള പെണ്‍കുട്ടിയെ പീഡിപ്പിക്കാന്‍ ശ്രമിച്ചതിന്റെ പേരില്‍ ഇയാള്‍ ജയിലില്‍ കിടന്നിരുന്നുവെന്നും പൊലീസ് കണ്ടെത്തി. 2018ല്‍ ഇയാളെ ഗാസിപൂര്‍ പൊലീസ് അറസ്റ്റ് ചെയ്തിരുന്നു. ഡല്‍ഹിയില്‍ ഒരു മാസം തടവില്‍ കഴിഞ്ഞശേഷം ജാമ്യത്തിലിറങ്ങി മുങ്ങുകയായിരുന്നു.
അതിനിടെ ഇന്ന് രാവിലെ നടന്ന തിരിച്ചറിയല്‍ പരേഡില്‍ പ്രതി അസ്ഫാക്കിനെ പ്രധാന സാക്ഷി താജുദ്ദീന്‍ തിരിച്ചറിഞ്ഞു. കുഞ്ഞുമായി പ്രതി ആലുവ മാര്‍ക്കറ്റിലേക്ക് നടന്ന് പോകുന്നത് താജുദ്ദീന്‍ കണ്ടിരുന്നു. ആരുടെ കുഞ്ഞാണിതെന്നും എന്തിനാണ് മാര്‍ക്കറ്റിലേക്ക് വന്നതെന്നും ചോദിച്ച് താജുദ്ദീന്‍ പ്രതിയെ ചോദ്യം ചെയ്യുകയുമുണ്ടായി. എന്നാല്‍ തന്റെ കുഞ്ഞാണെന്നും മദ്യപിക്കാന്‍ വന്നതാണെന്നുമായിരുന്നു പ്രതിയുടെ മറുപടി. ഇത് സത്യമെന്ന് താജുദ്ദീന്‍ വിശ്വസിച്ചു. പിറ്റേദിവസം മാധ്യമങ്ങളില്‍ നിന്നാണ് കുഞ്ഞിനെ തട്ടിക്കൊണ്ടുപോയെന്ന വിവരം താജുദ്ദീന്‍ അറിഞ്ഞത്. കുഞ്ഞുമായി പോകുന്നത് കണ്ടെങ്കിലും തടയാന്‍ കഴിയാതെ പോയതില്‍ അതിയായ ദു:ഖമുണ്ടെന്നും അപ്പോഴത്തെ സാഹചര്യം അതായിരുന്നുവെന്നും താജുദ്ദീന്‍ മാധ്യമങ്ങളോട് പറഞ്ഞു.
താജുദ്ദീന് പുറമെ പ്രതി കുഞ്ഞുമായി കയറിയ ബസിലെ കണ്ടക്ടര്‍ സന്തോഷ്, ബസിലെ യാത്രക്കാരി സുസ്മിത എന്നീ സാക്ഷികളും തിരിച്ചറിയല്‍ പരേഡിന് എത്തിയിരുന്നു. സാക്ഷികളെ സബ് ജയിലിലെത്തിച്ചാണ് തിരിച്ചറിയല്‍ പരേഡ് നടത്തിയത്.