പതിനാലാമത്തെ കുട്ടി പിറന്ന സന്തോഷം പങ്കുവച്ച് ഇലോണ്‍ മസ്‌ക്
വാഷിങ്ടന്‍: പതിനാലാമത്തെ കുട്ടി പിറന്ന സന്തോഷം പങ്കുവച്ച് ശതകോടീശ്വരനും ടെക് മുതലാളിയുമായ ഇലോണ്‍ മസ്‌ക്. സമൂഹ മാധ്യമമായ എക്‌സിലൂടെയാണ് മസ്‌ക് ഈ സന്തോഷവാര്‍ത്ത പങ്കുവച്ചത്. സെല്‍ഡന്‍ ലൈക്കര്‍ഗസ്സ് എന്നാണ് കുട്ടിക്ക് പേര് നല്‍കിയിരിക്കുന്നത് എന്നും മസ്‌ക് അറിയിച്ചു.
മസ്‌കിന്റെ പങ്കാളിയും ന്യൂറാലിങ്ക് എക്‌സിക്യൂട്ടീവുമായ ഷിവോണ്‍ സിലിസാണ് കുട്ടിക്ക് ജന്മം നല്‍കിയത്. ഷിവോണ്‍ സിലിസുമായുള്ള ബന്ധത്തില്‍ മസ്‌കിന് മറ്റ് മൂന്ന് കുട്ടികള്‍ കൂടിയുണ്ട്. 2021ലാണ് ഇവര്‍ക്ക് ആദ്യമായി കുഞ്ഞ് ജനിച്ചത്. അത് ഇരട്ടകളായിരുന്നു. 2024ല്‍ ജനിച്ച അര്‍ക്കേഡിയയുടെ പിറന്നാള്‍ ദിവസം തന്നെയാണ് നാലാമത്തെ കുട്ടിയും ജനിച്ചത്. അതിന്റെ സന്തോഷം കൂടി ഷിവോണ്‍ എക്‌സിലൂടെ പങ്കുവച്ചു.
മസ്‌കിന് മൂന്ന് പങ്കാളികളിലായി 12 മക്കളുണ്ട്. ആദ്യ ഭാര്യയായ ജസ്റ്റിന്‍ വില്‍സണില്‍ ആറ് കുട്ടികളും കനേഡിയന്‍ ഗായികയായ ഗ്രിംസില്‍ മൂന്ന് കുട്ടികളുമുണ്ട്. ജസ്റ്റിന്‍ വില്‍സണില്‍ ജനിച്ച ആദ്യ കുട്ടി മരിച്ചിരുന്നു. അടുത്തിടെ തന്റെ കുട്ടികള്‍ക്കും അവരുടെ അമ്മമാര്‍ക്കും വേണ്ടി ടെക്സസില്‍ 295 കോടി രൂപ വിലമതിക്കുന്ന ആഡംബര ബംഗ്ലാവ് മസ്‌ക് വാങ്ങിയിരുന്നു.
നേരത്തെ മസ്‌കിന്റെ 13-ാമത്തെ കുഞ്ഞിന്റെ അമ്മയാണെന്ന് അവകാശപ്പെട്ട് എഴുത്തുകാരിയും ഇന്‍ഫ്‌ലുവന്‍സറുമായ ആഷ്ലി സെയ്ന്റ് ക്ലയര്‍ രംഗത്തെത്തിയിരുന്നു. ഇത് ഏറെ ചര്‍ച്ചയാകുകയും ചെയ്തു. എന്നാല്‍ ആഷ്ലിയുടെ വാദങ്ങളെ ഇതുവരെ മസ്‌ക് അംഗീകരിക്കുകയോ തള്ളുകയോ ചെയ്തിട്ടില്ല. വാര്‍ത്ത ശരിയാണെങ്കില്‍ ഈ കുഞ്ഞിനേയും കൂട്ടി മസ്‌കിനെ 14 കുഞ്ഞുങ്ങളുണ്ട്.