വനിതകളുടെ അക്കൗണ്ടില്‍ മാസം 2500 രൂപ; രജിസ്‌ട്രേഷന്‍ ആരംഭിച്ചു; വാഗ്ദാനം പാലിച്ച് ഡല്‍ഹി സര്‍ക്കാര്‍
ന്യൂഡല്‍ഹി: വനിതകള്‍ക്ക് മാസം 2500 രൂപ നല്‍കുന്ന ഡല്‍ഹി സര്‍ക്കാരിന്റെ മഹിളാ സമൃദ്ധി യോജന പദ്ധതിയുടെ രജിസ്‌ട്രേഷന്‍ ആരംഭിച്ചു. വാര്‍ഷിക വരുമാനം മൂന്ന് ലക്ഷത്തില്‍ താഴെയുള്ള സ്ത്രീകള്‍ക്കാണ് പദ്ധതിയുടെ ആനുകൂല്യം ലഭിക്കുക. തിരഞ്ഞെടുപ്പില്‍ ബിജെപിയുടെ പ്രധാന പ്രചാരണ വാഗ്ദാനമായിരുന്നു മഹിളാ സമൃദ്ധി യോജന. അതാണ് ഇപ്പോള്‍ നടപ്പാക്കാന്‍ പോകുന്നത്.
പദ്ധതിയുടെ നടത്തിപ്പിനെ കുറിച്ച് ചര്‍ച്ച ചെയ്യാന്‍ ഡല്‍ഹി സര്‍ക്കാര്‍ ക്യാബിനറ്റ് യോഗം ചേരുന്നുണ്ട്. ഗുണഭോക്താക്കളായ വനിതകളുടെ ബാങ്ക് അക്കൗണ്ടിലേക്ക് പണം നേരിട്ട് എത്തും. ഓണ്‍ലൈന്‍ പോര്‍ട്ടലിലൂടെയാണ് പദ്ധതിയിലേക്കുള്ള രജിസ്‌ട്രേഷന്‍ നടത്തുന്നത്.
യോഗ്യരായ സ്ത്രീകളെ കണ്ടെത്താന്‍ എല്ലാ ഫോമുകളുടെയും പരിശോധന നടത്തുന്നതിനായി ഐടി വകുപ്പ് ഈ പോര്‍ട്ടലിനൊപ്പം ഒരു പ്രത്യേക സോഫ് റ്റ് വെയറും വികസിപ്പിക്കുന്നുണ്ടെന്നുള്ള റിപ്പോര്‍ട്ടുകള്‍ പുറത്തുവന്നിരുന്നു.
അധികാരത്തില്‍ എത്തിയിട്ടും പദ്ധതി നടപ്പാക്കാന്‍ വൈകിയത് ജനങ്ങളോടുള്ള വഞ്ചനയാണെന്ന വിമര്‍ശനവുമായി മുഖ്യ പ്രതിപക്ഷമായ എഎപി രംഗത്തെത്തിയിരുന്നു. പിന്നാലെയാണ് പദ്ധതി ആരംഭിക്കാനുള്ള സര്‍ക്കാരിന്റെ നീക്കം.
ഗുണഭോക്താക്കളെ തിരിച്ചറിയുന്നതിനായി വിവിധ വകുപ്പുകളില്‍ നിന്ന് സര്‍ക്കാര്‍ ഡാറ്റ തേടിയിട്ടുണ്ട്. മധ്യപ്രദേശിലെ 'ലാഡ്ലി ബെഹ്ന യോജന', മഹാരാഷ്ട്രയിലെ 'ലാഡ്കി ബഹിന്‍ യോജന' തുടങ്ങിയ ബിജെപി ഭരിക്കുന്ന മറ്റ് സംസ്ഥാനങ്ങളില്‍ നിലവിലുള്ള പദ്ധതികള്‍ക്ക് സമാനമാണ് മഹിളാ സമൃദ്ധി യോജന.