രാജ്യതലസ്ഥാനത്ത് കനത്ത മഴ; വീടിന് മുകളില്‍ മരം വീണ് 4 മരണം; നൂറിലധികം വിമാനങ്ങള്‍ വൈകി
പല ഭാഗങ്ങളിലും വെള്ളക്കെട്ട്;
ന്യൂഡല്‍ഹി: രാജ്യതലസ്ഥാനത്ത് കനത്ത മഴ. വീടിന് മുകളില്‍ മരം വീണ് മൂന്ന് കുട്ടികള്‍ അടക്കം 4 പേര്‍ മരിച്ചു. വെള്ളിയാഴ്ച രാവിലെ പെയ്ത കനത്ത മഴ വിമാന പ്രവര്‍ത്തനങ്ങളെ ബാധിക്കുകയും, നഗരത്തിലെ പല ഭാഗങ്ങളിലും വെള്ളം കെട്ടിനില്‍ക്കുകയും ഗതാഗതം തടസ്സപ്പെടുത്തുകയും ചെയ്തു. ശക്തമായ കാറ്റില്‍ മരങ്ങള്‍ വൈദ്യുത കമ്പിയില്‍ വീണതിനെ തുടര്‍ന്ന് ഡെല്‍ഹി ഡിവിഷനിലെ റെയില്‍വേ പ്രവര്‍ത്തനങ്ങളെ ബാധിച്ചു. 20ഓളം ട്രെയിനുകള്‍ വൈകി. ഡെല്‍ഹിയുടെ പല ഭാഗങ്ങളിലും വെള്ളക്കെട്ട് റിപ്പോര്‍ട്ട് ചെയ്തു.
ശക്തമായ കാറ്റും പൊടിക്കാറ്റും കനത്ത മഴയും മൂലം ഇന്ന് 200 ഓളം വിമാനങ്ങളാണ് വൈകിയത്. ദ്വാരകയില്‍ കനത്ത മഴയിലും കാറ്റിലും മരം വീടിന് മുകളില്‍ വീണ് ഒരു സ്ത്രീയും മൂന്ന് കുട്ടികളും ആണ് മരിച്ചത്. ഡല്‍ഹി ഇന്ദിരാഗാന്ധി അന്താരാഷ്ട്ര വിമാനത്താവളത്തില്‍ എത്തേണ്ട മൂന്ന് വിമാനങ്ങള്‍ അഹമ്മദാബാദിലേക്കും ജയ്പൂരിലേക്കും തിരിച്ചുവിട്ടു. ബെംഗളൂരു-ഡല്‍ഹി വിമാനവും പൂനെ-ഡല്‍ഹി വിമാനവും ജയ്പൂരിലേക്ക് തിരിച്ചുവിട്ടു. ഫ് ളൈറ്റ് റഡാര്‍ പ്രകാരം ഡല്‍ഹി വിമാനത്താവളത്തില്‍ എത്തേണ്ട വിമാനങ്ങള്‍ ശരാശരി 21 മിനിറ്റും പുറപ്പെടേണ്ട വിമാനങ്ങള്‍ 61 മിനിറ്റും വൈകി.
ഡല്‍ഹിയിലേക്കും തിരിച്ചുമുള്ള ചില വിമാനങ്ങള്‍ വൈകുകയോ വഴിതിരിച്ചുവിടുകയോ ചെയ്യുന്നുണ്ട്. ഇത് മൊത്തത്തിലുള്ള വിമാന ഷെഡ്യൂളിനെ ബാധിച്ചേക്കാം. തടസ്സങ്ങള്‍ പരമാവധി കുറയ്ക്കാന്‍ പരമാവധി ശ്രമിക്കുന്നതായി എയര്‍ ഇന്ത്യ പ്രസ്താവനയില്‍ പറഞ്ഞു.
ദ്വാരക, ഖാന്‍പൂര്‍, സൗത്ത് എക്സ്റ്റന്‍ഷന്‍ റിംഗ് റോഡ്, മിന്റോ റോഡ്, ലജ്പത് നഗര്‍, മോത്തി ബാഗ് തുടങ്ങിയ പ്രദേശങ്ങളിലാണ് കനത്ത വെള്ളക്കെട്ടുണ്ടായത്. കഴിയുന്നത്ര വീടിനുള്ളില്‍ തന്നെ തുടരാന്‍ അധികൃതര്‍ ജനങ്ങള്‍ക്ക് നിര്‍ദ്ദേശം നല്‍കിയിട്ടുണ്ട്.
ഡല്‍ഹിയില്‍ താപനില 19.8 ഡിഗ്രി സെല്‍ഷ്യസായി താഴ്ന്നു. ഡല്‍ഹിയിലുടനീളം കനത്ത മഴയും മണിക്കൂറില്‍ 70-80 കിലോമീറ്റര്‍ വേഗതയില്‍ കാറ്റ് വീശാനും സാധ്യതയുണ്ടെന്ന് ഇന്ത്യന്‍ കാലാവസ്ഥാ വകുപ്പ് അറിയിച്ചു. ശനിയാഴ്ച വരെ യെല്ലോ അലേര്‍ട്ട് പ്രഖ്യാപിച്ചു. ഇത്തവണ വടക്കേ ഇന്ത്യയില്‍ മഴ സാധാരണയേക്കാള്‍ കൂടുതലായിരിക്കുമെന്ന് പ്രതീക്ഷിക്കുന്നു. ദീര്‍ഘകാല ശരാശരിയായ 64.1 മില്ലിമീറ്ററിന്റെ 109 ശതമാനത്തിലധികമാണ് പ്രതീക്ഷിക്കുന്നത്.
ഡല്‍ഹിയില്‍ കാലാവസ്ഥാ വകുപ്പ് റെഡ് അലേര്‍ട്ട് പുറപ്പെടുവിച്ചു, ജനങ്ങള്‍ അതീവ ജാഗ്രത പാലിക്കണമെന്നും ആവശ്യമായ മുന്‍കരുതലുകള്‍ സ്വീകരിക്കണമെന്നും മുന്നറിയിപ്പ് നല്‍കി.
ഡല്‍ഹി-എന്‍സിആറിന്റെ ചില ഭാഗങ്ങളില്‍ മിതമായതോ ശക്തമോ ആയ ഇടിമിന്നലോടുകൂടിയ മഴയും മണിക്കൂറില്‍ 70-80 കിലോമീറ്റര്‍ വേഗതയില്‍ കാറ്റിന്റെ വേഗതയും ഉണ്ടാകുമെന്ന് ഐഎംഡി പ്രവചിച്ചു. മേഖലയിലെ മറ്റ് ചില പ്രദേശങ്ങളില്‍ നേരിയ മഴയ്ക്ക് സാധ്യതയുണ്ട്.
ഈര്‍പ്പവും കാറ്റിന്റെ രീതികളും ഉള്‍പ്പെടുന്ന ഘടകങ്ങളുടെ സംയോജനമാണ് പെട്ടെന്നുള്ള കാലാവസ്ഥാ വ്യതിയാനത്തിന് കാരണമെന്ന് ഇന്ത്യന്‍ കാലാവസ്ഥാ വകുപ്പ് (ഐഎംഡി) വിശദീകരിച്ചു.