കുട്ടികള്‍ ഓടിച്ച സ്‌കൂട്ടറുകള്‍ പൊലീസ് പിടികൂടി; ആര്‍.സി ഉടമകളായ രണ്ട് പേര്‍ക്കെതിരെ കേസ്
മുള്ളേരിയയില്‍ നിന്നും ബോവിക്കാനത്തുനിന്നുമാണ് പ്രായപൂര്‍ത്തിയാകാത്തവര്‍ ഓടിച്ച ഇരുചക്ര വാഹനങ്ങള്‍ പൊലീസ് കസ്റ്റഡിയിലെടുത്തത്;
By : Online correspondent
Update: 2025-11-08 06:09 GMT
ആദൂര്‍: കുട്ടികള്‍ ഓടിച്ച രണ്ട് സ്‌കൂട്ടറുകള്‍ ആദൂര്‍ പൊലീസ് പിടികൂടി. മുള്ളേരിയയില്‍ നിന്നും ബോവിക്കാനത്തുനിന്നുമാണ് പ്രായപൂര്‍ത്തിയാകാത്തവര്‍ ഓടിച്ച ഇരുചക്ര വാഹനങ്ങള്‍ പൊലീസ് കസ്റ്റഡിയിലെടുത്തത്. മുള്ളേരിയയില്‍ പൊലീസ് വാഹന പരിശോധന നടത്തുമ്പോള്‍ 17 കാരന്‍ ഓടിച്ചു വരികയായിരുന്ന സ്‌കൂട്ടര്‍ തടഞ്ഞ് നിര്‍ത്തി ചോദ്യം ചെയ്തപ്പോള്‍ മുള്ളേരിയയിലെ എം.കെ. പ്രഭാകരന്‍ (41) ആണ് സ്‌കൂട്ടര്‍ ഓടിക്കാന്‍ നല്‍കിയതെന്ന് വെളിപ്പെടുത്തി.
സ്‌കൂട്ടര്‍ കസ്റ്റഡിയിലെടുത്ത പൊലീസ് പ്രഭാകരനെതിരെ കേസെടുത്തു. ബോവിക്കാനത്ത് വാഹന പരിശോധന നടത്തുകയായിരുന്ന പൊലീസ് 17 കാരന്‍ ഓടിച്ചു വരികയായിരുന്ന സ്‌കൂട്ടര്‍ പിടികൂടുകയും ബന്ധുവായ ആര്‍.സി. ഉടമ മുളിയാര്‍ ബാലനടുക്കയിലെ മിസ്രിയ(33)ക്കെതിരെ കേസെടുക്കുകയും ചെയ്തു.