ഈ ഭക്ഷണങ്ങള്‍ കാന്‍സറിന് കാരണമാകാം; ഏതൊക്കെയെന്ന് അറിയാം!
ജങ്ക് ഫുഡ്- ഫാസ്റ്റ് ഫുഡ് ഭക്ഷണങ്ങളെല്ലാം കഴിക്കുന്നത് കാന്‍സറിന് കാരണമാകുമെന്നാണ് വിദഗ്ധരുടെ മുന്നറിയിപ്പ്;
ദശലക്ഷക്കണക്കിന് ആളുകളുടെ മരണത്തിന് ഇടയാക്കുന്ന ഏറ്റവും വലിയ രോഗങ്ങളില്‍ ഒന്നാണ് കാന്‍സര്‍. കാന്‍സര്‍ ബാധിച്ചവര്‍ക്ക് ഒരുപാട് വേദനയും കഷ്ടപ്പാടും സഹിക്കേണ്ടി വരുന്നു. എന്നാല്‍ കാന്‍സറില്‍ നിന്ന് ശരീരത്തെ സംരക്ഷിക്കാന്‍ ചില കാര്യങ്ങള്‍ തീര്‍ച്ചയായും അറിഞ്ഞിരിക്കണം. അക്കാര്യങ്ങള്‍ പിന്തുടര്‍ന്നാല്‍ കാന്‍സര്‍ രോഗത്തില്‍ നിന്നും നമുക്ക് രക്ഷപ്പെടാം.
ചില ഭക്ഷണങ്ങളിലൂടെയും നമുക്ക് കാന്‍സര്‍ വരാന്‍ സാധ്യതയുണ്ടെന്നാണ് ആരോഗ്യരംഗത്തെ വിദഗ്ധര്‍ നല്‍കുന്ന മുന്നറിയിപ്പ്. അത്തരം ഭക്ഷണങ്ങള്‍ ഏതെന്ന് മനസിലാക്കി അവ നമ്മുടെ ജീവിതത്തില്‍ നിന്നും ഒഴിവാക്കിയാല്‍ രോഗം വരാതെ ശരീരത്തെ സംരക്ഷിക്കാം. അത്തരത്തില്‍ കാന്‍സര്‍ ഉണ്ടാക്കുന്ന ഭക്ഷണങ്ങള്‍ ഏതെന്ന് അറിയാം.
കാര്‍സിനോജെനിക് ഭക്ഷണങ്ങള്‍ എന്തൊക്കെയാണ്?
കാര്‍സിനോജെനിക് ഭക്ഷണങ്ങള്‍ ഒരാളുടെ ആരോഗ്യത്തിന് ഹാനികരമായ ഏതെങ്കിലും ഭക്ഷണമല്ല. അവ കാന്‍സറിന് കാരണമായേക്കാവുന്ന ഭക്ഷണങ്ങളാണ്. നാഷണല്‍ കാന്‍സര്‍ ഇന്‍സ്റ്റിറ്റ്യൂട്ട് അവയെ 'മനുഷ്യരില്‍ കാന്‍സറിന് കാരണമാകുമെന്ന് വിദഗ്ധര്‍ തിരിച്ചറിഞ്ഞ ഭക്ഷണങ്ങള്‍' എന്ന് നിര്‍വചിക്കുകയും ചെയ്യുന്നു.
കാര്‍സിനോജെനുകള്‍ ഡിഎന്‍എയെ ആക്രമിക്കുകയും അത് മ്യൂട്ടേറ്റ് ചെയ്യുകയും ചെയ്യുന്നു. ഈ മ്യൂട്ടേഷന്‍ പിന്നീട് കാന്‍സറിലേക്ക് നയിച്ചേക്കാം. അര്‍ബുദകാരികളായ ഭക്ഷണങ്ങളുടെ പട്ടിക സമഗ്രമല്ല, മാംസമോ പച്ചക്കറികളോ മറ്റേതെങ്കിലും ഭക്ഷണമോ തമ്മില്‍ വേര്‍തിരിച്ചറിയുന്നില്ല. ഇത്തരത്തില്‍ അര്‍ബുദത്തിന് കാരണമാകുന്ന ഭക്ഷണങ്ങള്‍ ഏതൊക്കെയാണെന്ന് അറിയാം.
1. മദ്യം
ലോകാരോഗ്യസംഘടനയുടെയും അമേരിക്കയിലെ ആരോഗ്യരംഗത്തെ പ്രസിദ്ധീകരണങ്ങളുടെയും റിപ്പോര്‍ട്ട് പ്രകാരം ദിവസവും മദ്യപിക്കുന്നവരില്‍ ക്യാന്‍സര്‍ സാധ്യത മറ്റുള്ളവരെ അപേക്ഷിച്ച് മൂന്നിരട്ടിയാണ്. മദ്യപാനികളില്‍ വായ്, തൊണ്ട, കരള്‍ എന്നീ കാന്‍സറുകളാണ് പൊതുവെ കണ്ടുവരുന്നത്.
2. സോഡ
സോഡ കുടിക്കുന്നത് ഭാരം കൂടാന്‍ ഇടയാക്കിയേക്കും. എന്നാല്‍ സോഡ കാന്‍സറിന് കാരണമാകുമെന്ന കാര്യം അധികം ആര്‍ക്കും അറിയില്ല. 2012ല്‍ സ്വീഡിഷ് ഗവേഷകര്‍ പ്രസിദ്ധീകരിച്ച പഠനത്തില്‍ പ്രതിദിനം ഒരു സോഡ കുടിക്കുന്നവരില്‍ 40 ശതമാനത്തിനും പ്രോസ്‌ടേറ്റ് കാന്‍സര്‍ കണ്ടെത്തിയെന്നാണ് പഠനത്തില്‍ പറയുന്നത്. 45 വയസിന് മുകളില്‍ പ്രായമുള്ളവരില്‍ ഇതിനുള്ള സാധ്യത കൂടുതലാണെന്നും പഠനം വ്യക്തമാക്കുന്നു.
3. ചൂടുള്ള ചായയും കോഫിയും
ചായയും കോഫിയും നമ്മുടെ സ്ഥിരം പാനീയങ്ങളാണ്. എന്നാല്‍ തിളയ്ക്കുന്ന ചായയും കോഫിയും കുടിക്കുന്നത് അപകടകരമാണെന്നാണ് ലോകാരോഗ്യസംഘടന പറയുന്നത്. ഇത് അന്നനാളത്തില്‍ കാന്‍സറുണ്ടാകാന്‍ കാരണമാകുമെന്ന മുന്നറിയിപ്പും നല്‍കുന്നുണ്ട്.
4. ജങ്ക് ഫുഡ്- ഫാസ്റ്റ് ഫുഡ്
ജങ്ക് ഫുഡ്- ഫാസ്റ്റ് ഫുഡ് മാംസം കഴിക്കുന്നതും ചുവന്ന മാംസം ദിവസവും കഴിക്കുന്നതും കാന്‍സറിന് കാരണമാകുമെന്നും ലോകാരോഗ്യ സംഘടന മുന്നറിയിപ്പ് നല്‍കുന്നു. ഉദര കാന്‍സറിന് കാരണമാകുമെന്നാണ് മുന്നറിയിപ്പ്.
5. സംസ്‌ക്കരിച്ച മാംസം- മാംസാഹാരം
സംസ്‌ക്കരിച്ച മാംസവും- മാംസാഹാരവും വാങ്ങിച്ചയുടന്‍ പാകം ചെയ്തു കഴിക്കുന്നതില്‍ അപാകതയില്ല. എന്നാല്‍ മാംസം സംസ്‌ക്കരിച്ച് പാക്കറ്റിലാക്കിയും, മറ്റു ഭക്ഷണത്തിനൊപ്പവും(പഫ്‌സ്, ബര്‍ഗര്‍, പിസ, സാന്‍ഡ്വിച്ച്) കഴിക്കുന്നത് കാന്‍സറിന് കാരണമാകും. അതുകൊണ്ടുതന്നെ, ശീതീകരിച്ച് സൂക്ഷിക്കുന്ന പാക്കറ്റിലുള്ള സംസ്‌ക്കരിച്ച മാംസവും, ഇറച്ചിയുള്ള പഫ്‌സ്, ബര്‍ഗര്‍, സാന്‍ഡ് വിച്ച് എന്നിവ ഒഴിവാക്കുന്നത് നല്ലതാണ്.
6. ചുവന്ന മാംസം
ബീഫ്, മട്ടന്‍ എന്നിവ ചുവന്ന മാംസങ്ങളില്‍ പെടുന്നു. ഇത് ദിവസവും കഴിക്കുന്നവര്‍ക്ക് കാന്‍സര്‍ പിടിപെടാനുള്ള സാധ്യത മറ്റുള്ളവരെ അപേക്ഷിച്ച് 17 ശതമാനം അധികമായിരിക്കുമെന്ന് ലോകാരോഗ്യ സംഘടനയുടെ റിപ്പോര്‍ട്ടില്‍ പറയുന്നുണ്ട്.
7. കനലില്‍ ചുട്ടെടുക്കുന്ന മാംസാഹാരം
കനലില്‍ ചുട്ടെടുക്കുന്ന മാംസാഹാരം അമിതമായി കഴിക്കുന്നതും കാന്‍സറിന് കാരണമാകുമെന്നാണ് വിദഗ്ധര്‍ നല്‍കുന്ന മുന്നറിയിപ്പ്.
8. അമിതമായാല്‍ പാലും
ഒരു സമ്പൂര്‍ണാഹാരമാണ് പാല്. ദിവസവും ഒന്നോ രണ്ടോ ഗ്ലാസ് പാല് കുടിക്കുന്നത് ആരോഗ്യത്തിന് നല്ലതാണ്. എന്നാല്‍ പാല് അമിതമായി കുടിക്കുന്നത് പ്രോസ്റ്റേറ്റ് കാന്‍സര്‍ ഉണ്ടാകാനുള്ള സാധ്യത 68 ശതമാനം അധികമാണെന്നാണ് പഠനത്തില്‍ നിന്നും വ്യക്തമാകുന്നത്.
9. പഞ്ചസാര
പഞ്ചസാര നമ്മുടെ നിത്യജീവിതത്തിലെ ഒരു ഭാഗമാണ്. ചായയ്ക്കും മറ്റും പഞ്ചസാര കുറവാണെങ്കില്‍ പലര്‍ക്കും അത് പ്രയാസമായിരിക്കും. എന്നാല്‍ അമിതമായാല്‍ പഞ്ചസാരയും അപകടകരമാണ്. അമിതമായി പഞ്ചസാര ഉപയോഗിച്ചാല്‍, കാന്‍സര്‍ കോശങ്ങളുടെ വളര്‍ച്ച ത്വരിതപ്പെടുമെന്നാണ് പഠനം പറയുന്നത്.
10. പോപ്പ് കോണ്‍
സിനിമ കാണാന്‍ തിയറ്ററുകളില്‍ പോകുമ്പോള്‍ പോപ്പ് കോണ്‍ കഴിക്കുന്നതും പൊട്ടറ്റോ ഭക്ഷണങ്ങള്‍ കഴിക്കുന്നതും കുട്ടികളുടെ മാത്രമല്ല, മുതിര്‍ന്നവരുടേയും ശീലമാണ്. എന്നാല്‍ അതിലെ രാസപദാര്‍ത്ഥങ്ങള്‍ കാന്‍സറിന് വഴിയൊരുക്കും.
11.കോളകള്‍
കോളകള്‍ മിക്കവര്‍ക്കും ഇഷ്ടമാണ്. അമിത മധുരവും മറ്റു രാസവസ്തുക്കളും അടങ്ങിയിട്ടുള്ള കോളകള്‍, കാന്‍സറിന് കാരണമാകുന്ന പാനീയമാണ്.
12. പാസ്റ്റ
പാസ്റ്റ പലരുടേയും ഇഷ്ട ഭക്ഷണമാണ്. എന്നാല്‍ കൂടുതല്‍ വെളള പാസ്റ്റ കഴിക്കുന്നത് ശ്വാസകോശ കാന്‍സറിനുള്ള സാധ്യത വര്‍ധിപ്പിക്കും.
13. വൈറ്റ് ബ്രഡ്
നമ്മള്‍ സാധാരണയായി കഴിക്കുന്ന ഒന്നാണ് ബ്രഡ്. എന്നാല്‍ മൈദ ഉപയോഗിച്ച് ഉണ്ടാക്കുന്ന വൈറ്റ് ബ്രഡ് അധികം കഴിക്കുന്നത് ശരീരത്തിന് നല്ലതല്ലെന്ന് മാത്രമല്ല, കാന്‍സറിന് കാരണമാകുമെന്നാണ് ഡോക്ടര്‍മാരുടെ മുന്നറിയിപ്പ്. എന്നാല്‍ ബ്രഡ് കഴിച്ചേ മതിയാകൂ എന്നുള്ളവര്‍ക്ക് ബ്രൗണ്‍ ബ്രഡ് അഥവാ ഗോതമ്പിന്റെ ബ്രഡ് കഴിക്കാവുന്നതാണ്.
14. ടൊമാറ്റോ സോസ്
ഹോട്ടലുകളില്‍ നിന്നുമൊക്കെ ഭക്ഷണം കഴിക്കുമ്പോള്‍ ടൊമാറ്റോ സോസും നല്‍കാറുണ്ട്. എന്നാല്‍ ഇത്തരത്തില്‍ സംസ്‌ക്കരിച്ച് പാക്കറ്റിലാക്കി വരുന്ന ടൊമാറ്റോ സോസ് കാന്‍സറിന് കാരണമാകും. അതുപോലെ തന്നെ തക്കാളി കഴിക്കുന്നതും കാന്‍സറിന് കാരണമാകുന്നുവെന്നാണ് പഠനങ്ങള്‍ സൂചിപ്പിക്കുന്നത്.