ആരോഗ്യം നല്ലരീതിയില്‍ പരിപാലിക്കേണ്ടത് ഓരോരുത്തരുടേയും കടമയാണ്. എന്നാല്‍ പലരും ഇക്കാര്യത്തില്‍ വേണ്ടത്ര ശ്രദ്ധ കൊടുക്കുന്നില്ല. ഇതുകാരണം അമിത വണ്ണവും മറ്റ് രോഗങ്ങളും എപ്പോഴും അലട്ടിക്കൊണ്ടിരിക്കും. അത്തരത്തില്‍ ചിലര്‍ കൂടെ കൊണ്ടുപോകുന്ന ഒരു മോശം ശീലമാണ് മധുരത്തോട് അമിതമായ കൊതി കാണിക്കുന്നത്.
പ്രമേഹം വരുമെന്ന് ബോധ്യം ഉണ്ടായിട്ടും ഇത്തരക്കാര്‍ തങ്ങളുടെ ഈ ശീലം നിയന്ത്രിക്കാനൊന്നും പോകാറില്ല. ഇത്തരത്തില്‍ അമിതമായി മധുരം ശരീരത്തിലേക്ക് കടന്നുചെന്നാല്‍ അത് നിരവധി ആരോഗ്യ പ്രശ്നങ്ങള്‍ക്ക് വഴിവെക്കും. മധുരം കഴിക്കാതിരിക്കാന്‍ തീരെ പറ്റുന്നില്ലെങ്കില്‍ ഈ ഭക്ഷണശീലം തുടരാവുന്നതാണ്.
കാര്‍ബോഹൈഡ്രേറ്റ്
മധുരപ്രേമം കുറയ്ക്കാന്‍ ഏറ്റവും നല്ലത് കാര്‍ബ്സ് അടങ്ങിയ ആഹാരങ്ങള്‍ ചെറിയ അളവിലെങ്കിലും ഡയറ്റില്‍ ഉള്‍പ്പെടുത്താന്‍ ശ്രദ്ധിക്കണം എന്നതുതന്നെ. ഇത്തരം ആഹാരങ്ങള്‍ തിരഞ്ഞെടുക്കുമ്പോള്‍ പൊരിച്ചതും വറുത്തതുമായവ ഒഴിവാക്കുക. പകരം ധാന്യങ്ങള്‍ തിരഞ്ഞെടുക്കാം. പ്രത്യേകിച്ച്, ഗോതമ്പ്, ചോളം, അരി എന്നിവ കൃത്യമായ അളവില്‍ ഡയറ്റില്‍ ചേര്‍ക്കാവുന്നതാണ്.
അതുപോലെ കാര്‍ബ്സ് അടങ്ങിയ പച്ചക്കറികളും ഡയറ്റിന്റെ ഭാഗമാക്കാം. ഇത്തരത്തില്‍ കാര്‍ബ്സ് ഡയറ്റില്‍ ചേര്‍ത്താല്‍ മധുരം കഴിക്കാനുള്ള ആസക്തി കുറയ്ക്കാന്‍ കഴിയുമെന്ന് ആരോഗ്യ വിദഗ്ധര്‍ പറയുന്നു. കാര്‍ബ്സ് ഡയറ്റില്‍ ചേര്‍ക്കുമ്പോള്‍ ബാലന്‍സ് ചെയ്യുന്നരീതിയില്‍ എടുക്കാന്‍ ശ്രദ്ധിക്കണം. മറിച്ചായാല്‍ അത് മറ്റ് ആരോഗ്യ പ്രശ്നങ്ങള്‍ക്ക് കാരണമാകും.
നട്സ്
മധുരം കഴിക്കാന്‍ അമിതമായി ആഗ്രഹിക്കുമ്പോള്‍ നട്സ് കഴിക്കാവുന്നതാണ്. പ്രത്യേകിച്ച് ബദാം, ഉണക്കമുന്തിരി എന്നിവ ആഹാരത്തിന്റെ ഭാഗമാക്കാവുന്നതാണ്. ഇടയ്ക്ക് വിശക്കുമ്പോഴോ മധുരം കഴിക്കാന്‍ തോന്നുമ്പോഴോ ഇവ കഴിച്ചാല്‍ മധുരം കഴിച്ച അതേ സംതൃപ്തി തന്നെ ലഭിക്കും. അതുപോലെ ഈന്തപ്പഴം കുതിര്‍ത്തത് ഒരു ദിവസം രണ്ട് എണ്ണം വീതം കഴിക്കാവുന്നതാണ്. നല്ലപോലെ വെള്ളം കുടിക്കുന്നതും മധുരത്തോടുള്ള കൊതി കുറയ്ക്കാന്‍ സഹായിക്കുന്നു.
നാരുകള്‍ അടങ്ങിയ ആഹാരം
നാരുകള്‍ അടങ്ങിയ ആഹാരങ്ങള്‍ ഡയറ്റിന്റെ ഭാഗമാക്കുന്നത് വഴിയും മധുരത്തോടുള്ള കൊതി കുറയ്ക്കാം. കാരണം, നാരുകള്‍ അടങ്ങിയ ആഹാരം കഴിക്കുമ്പോള്‍ വളരെ വേഗത്തില്‍ വയര്‍ നിറഞ്ഞ പ്രതീതി ഉണ്ടാകുന്നു. ഇതുകാരണം കൂടുതല്‍ ആഹാരങ്ങള്‍ കഴിക്കാന്‍ തോന്നുകയില്ല. ഇത് സാവധാനത്തല്‍ മധുരം കഴിക്കാനുള്ള കൊതിയും കുറയ്ക്കുന്നു. അതുകൊണ്ടുതന്നെ നാരുകളടങ്ങിയ പഴം, പച്ചക്കറികള്‍ എന്നിവ ആഹാരത്തിന്റെ ഭാഗമാക്കാവുന്നതാണ്.
പ്രോട്ടീന്‍
ഡയറ്റ് എടുക്കുമ്പോള്‍ പ്രോട്ടീന്‍ അടങ്ങിയ ആഹാരങ്ങള്‍ കഴിക്കാന്‍ പലരും മറക്കുന്നു. നല്ലപോലെ പ്രോട്ടീന്‍ അടങ്ങിയ ആഹാരങ്ങള്‍ ഡയറ്റില്‍ ചേര്‍ത്താല്‍ മധുരം കഴിക്കാനുള്ള കൊതി കുറയുന്നു. ഡയറ്റില്‍ ഇരിക്കുമ്പോള്‍ ഒരിക്കല്‍ ചോറ് അല്ലെങ്കില്‍ മറ്റ് എന്തെങ്കിലും പലഹാരങ്ങള്‍ കഴിച്ചാല്‍ പലര്‍ക്കും അത് നിര്‍ത്താന്‍ സാധിക്കാറില്ല. ഇതിന് പ്രധാന കാരണം ശരീരത്തില്‍ കൃത്യമായ അളവില്‍ പ്രോട്ടീന്‍ എത്താത്തതാണ്. അതിനാല്‍ പ്രോട്ടീന്‍ അടങ്ങിയ ആഹാരങ്ങളും ഡയറ്റിന്റെ ഭാഗമാക്കാന്‍ ശ്രദ്ധിക്കണം. പ്രത്യേകിച്ച്, നട്സ്, തൈര്, കൊഴുപ്പ് കുറഞ്ഞ ഇറച്ചികള്‍, പാല്‍ ഉല്‍പന്നങ്ങള്‍ എന്നിവയെല്ലാം തന്നെ ഡയറ്റിന്റെ ഭാഗമാക്കാവുന്നതാണ്.
ഡാര്‍ക്ക് ചോക്ലേറ്റ്
മധുരം കഴിക്കാന്‍ കൊതി തോന്നിയാല്‍ ഡാര്‍ക്ക് ചോക്ലേറ്റ് കഴിക്കാവുന്നതാണ്. ഇത് മധുരത്തോടുള്ള കൊതി കുറയ്ക്കാന്‍ സഹായിക്കുന്നതിനൊപ്പം മധുരം കഴിച്ച അതേ സംതൃപ്തി നേടാനും സഹായിക്കുന്നു.
ഡയറ്റില്‍ ഇരിക്കുമ്പോള്‍ മധുരം കഴിക്കാന്‍ തോന്നിയാല്‍ തയ്യാറാക്കാന്‍ പറ്റിയ റെസിപ്പി ഇതാ;
ഇത് തയ്യാറാക്കാന്‍ ചിയ സീഡ്സ് എടുക്കുക. ഇതിലേക്ക് കുറച്ച് ഉപ്പ് ചേര്‍ക്കണം. അതുപോലെ, കുറച്ച് തേങ്ങാപ്പാലും കുറച്ച് കാപ്പിപ്പൊടിയും ചേര്‍ത്ത് നല്ലപോലെ മിക്സ് ചെയ്ത് ഫ്രിഡ്ജില്‍ സൂക്ഷിക്കുക. ചിയ സീഡ്സ് സോക്ക് ആയി എല്ലാം നല്ല തിക്ക് ആകുമ്പോള്‍ ഇതിലേക്ക് ഈന്തപ്പഴത്തിന്റെ സിറപ്പ് ചേര്‍ക്കണം. അത് മിക്സ് ചെയ്യുക. ഇതിന്റെ മുകളില്‍ ഉരുക്കിയ ഡാര്‍ക്ക് ചോക്ലേറ്റ് ഒഴിച്ച് തണുപ്പിച്ച് കഴിക്കാവുന്നതാണ്. ഇത് വളരെ രുചികരവും അതുപോലെ തന്നെ ഹെല്‍ത്തിയുമാണ്.