മംഗളൂരു വിമാനത്താവളത്തില്‍ നിന്ന് ബോംബ് പിടികൂടിയ കേസിലെ പ്രതിക്ക് 25 വര്‍ഷം കഠിനതടവ്

മംഗളൂരു: മംഗളൂരു വിമാനത്താവളത്തില്‍ നിന്ന് ബോംബ് പിടികൂടിയ കേസിലെ പ്രതിയായ ആദിത്യ റാവുവിനെ ജില്ലാ അഡീഷണല്‍ (നാല്) കോടതി 25 വര്‍ഷം കഠിനതടവിനും 20,000 രൂപ പിഴയടക്കാനും ശിക്ഷിച്ചു. 1908ലെ സ്‌ഫോടകവസ്തു നിയമത്തിലെ സെക്ഷന്‍ 4 പ്രകാരം അഞ്ച് വര്‍ഷം തടവും 10,000 രൂപ പിഴയും അടക്കാത്ത പക്ഷം ആറ് മാസം കൂടി അധിക തടവും അനുഭവിക്കണമെന്ന് കോടതി ഉത്തരവിട്ടു. 1967ലെ നിയമവിരുദ്ധ പ്രവര്‍ത്തനങ്ങള്‍ തടയല്‍ നിയമത്തിലെ സെക്ഷന്‍ 16 പ്രകാരം 10,000 രൂപ പിഴയും 20 വര്‍ഷത്തെ തടവും വിധിച്ചിട്ടുണ്ട്. പിഴയടച്ചില്ലെങ്കില്‍ ആറ് മാസം അധിക തടവ് അനുഭവിക്കണം. രണ്ട് ശിക്ഷകളും ഒരുമിച്ചനുഭവിച്ചാല്‍ മതി.
2020 ജനുവരി 20ന് ആദിത്യറാവു മംഗളൂരു എയര്‍പോര്‍ട്ട് ടെര്‍മിനല്‍ കെട്ടിടത്തിന്റെ ടിക്കറ്റ് കൗണ്ടറിന് സമീപം ബോംബ് അടങ്ങിയ ബാഗ് വെച്ച ശേഷം ഓട്ടോറിക്ഷയില്‍ കയറി രക്ഷപ്പെടുകയായിരുന്നു. ഇവിടെ നടത്തിയ പരിശോധനയിലാണ് ബോംബ് കണ്ടെത്തിയത്. ബോംബ് പിന്നീട് ഒഴിഞ്ഞ സ്ഥലത്ത് കൊണ്ടുപോയി നിര്‍വീര്യമാക്കുകയായിരുന്നു. സംഭവത്തില്‍ പൊലീസ് കേസെടുത്ത് അന്വേഷണമാരംഭിച്ചതോടെയാണ് ബോംബ് കൊണ്ടുവെച്ചത് ആദിത്യറാവുവാണെന്ന് വ്യക്തമായത്. ആദിത്യ പിന്നീട് ബംഗളൂരുവിലെ സംസ്ഥാന പോലീസ് ഡയറക്ടര്‍ ജനറലിന്റെ ഓഫീസില്‍ കീഴടങ്ങുകയായിരുന്നു.