സ്‌കൂട്ടറുകളില്‍ കടത്തുന്നതിനിടെ 54 ഗ്രാം എം.ഡി.എം.എയുമായി പിടിയിലായ അഞ്ചംഗ സംഘം റിമാണ്ടില്‍

മഞ്ചേശ്വരം: രണ്ട് സ്‌കൂട്ടറുകളിലായി കടത്താന്‍ ശ്രമിച്ച 54 ഗ്രാം എം.ഡി.എം.എ മയക്കുമരുന്നുമായി മഞ്ചേശ്വരം പൊലീസ് അറസ്റ്റ് ചെയ്ത പ്രതികളെ കോടതി റിമാണ്ട് ചെയ്തു. കര്‍ണാടക ബണ്ട്വാള്‍ സ്വദേശികളായ ബഷീര്‍ (27), മടക്കൂര്‍ ഹൗസിലെ കലന്തര്‍ ഷാഫി (29), തലപ്പാടി സ്വദേശികളായ പ്രീതം (29), കിരണ്‍ ഡിസൂസ (30) കോട്ടക്കാര്‍ തലപ്പാടിയിലെ അക്ഷയ് (30) എന്നിവരാണ് റിമാണ്ടിലായത്. മഞ്ചേശ്വരം സ്റ്റേഷന്‍ ഹൗസ് ഓഫീസറുടെ നേതൃത്വത്തില്‍ എസ്.ഐ എന്‍. അന്‍സാറും സംഘവുമാണ് ഇവരെ അറസ്റ്റ് ചെയ്തത്. കണ്വതീര്‍ത്ഥ തൂമിനാട് വെച്ച് ബഷീറും കലന്തര്‍ ഷാഫിയും സഞ്ചരിച്ച സ്‌കൂട്ടര്‍ തടഞ്ഞ് പരിശോധിച്ചപ്പോഴാണ് 43 ഗ്രാം എം.ഡി. എം. എ കണ്ടെത്തിയത്. മറ്റൊരു സ്‌കൂട്ടറില്‍ എം.ഡി.എം.എ കടത്തുന്നുണ്ടെന്ന വിവരത്തെ തുടര്‍ന്ന് മഞ്ചേശ്വരം ദേശിയപാതയില്‍ വാഹന പരിശോധന നടത്തിയപ്പോഴാണ് 12 ഗ്രാം എം.ഡി.എം.എയുമായി മറ്റ് മൂന്നുപേരെ പിടിച്ചത്.