മഞ്ചേശ്വരം: മഞ്ചേശ്വരത്തെ ഫ്‌ളാറ്റിലെ താമസക്കാരിയും പാവൂര്‍ സ്വദേശിനിയുമായ സാഹിദ(38)യെ കാണാതായ സംഭവത്തില്‍ അന്വേഷണത്തിന് സൈബര്‍ സെല്ല് ഉദ്യോഗസ്ഥര്‍ ഇന്നലെ മഞ്ചേശ്വരം പൊലീസ് സ്റ്റേഷനിലെത്തി. സാഹിദക്ക് വന്ന ഫോണ്‍ കോളുകളുടെ വിവരങ്ങള്‍ ശേഖരിച്ചു. രണ്ട് മാസത്തിനിടെ 3300 ഓളം നെറ്റ് കോളുകള്‍ വന്നതായാണ് കണ്ടെത്തിയത്. ഇത് മുംബൈയില്‍ നിന്നെന്നാണ് സൂചന. ഏക മകന്‍ അയാനെ 17ന് സ്‌കൂളിലേക്ക് അയച്ചതിന് ശേഷം മംഗളൂരു ആയൂര്‍വേദ ആസ്പത്രിയിലേക്ക് പുറപ്പെട്ട സാഹിദയെ പിന്നീട് കാണാതാവുകയായിരുന്നു. ഇത് സംബന്ധിച്ച് അന്നേ ദിവസം തന്നെ ബന്ധുക്കള്‍ മഞ്ചേശ്വരം പൊലീസില്‍ പരാതി നല്‍കിയിരുന്നു. മഞ്ചേശ്വരം അഡി.എസ്.ഐ സജിമോന്റെ നേതൃത്വത്തില്‍ കര്‍ണാടകയിലെ പല സ്ഥലങ്ങളിലും പരിശോധന നടത്തിയെങ്കിലും കണ്ടെത്താനായില്ല. ഇതേ തുടര്‍ന്നാണ് സൈബര്‍ സെല്ലിന്റെ സഹായം തേടിയത്.
മഞ്ചേശ്വരം പൊലീസ് കൂടുതല്‍ അന്വേഷണം നടത്തി വരുന്നു.
