വാല്‍പാറയിലേക്ക് ഒരു യാത്ര പോയാലോ? ചുരം കയറിയുള്ള ഈ യാത്രയില്‍ ആസ്വദിക്കാം മനോഹരമായ പ്രകൃതി ഭംഗി
സഞ്ചാരികള്‍ക്ക് താമസിക്കാന്‍ മനോഹരമായ നിരവധി സ്ഥലങ്ങള്‍ ഇവിടെ ഒരുക്കിയിട്ടുണ്ട്;
ഒരു യാത്ര ചെയ്യാനുള്ള തയാറെടുപ്പിലാണെങ്കില്‍ എന്തുകൊണ്ടും കാണേണ്ട ഒരു സ്ഥലമാണ് വാല്‍പാറ. തമിഴ്നാട്ടിലെ കോയമ്പത്തൂര്‍ ജില്ലയിലെ ഒരു താലൂക്കും ഹില്‍സ്റ്റേഷനുമാണ് വാല്‍പ്പാറ. സമുദ്ര നിരപ്പില്‍ നിന്നും ഏകദേശം 3500 അടി ഉയരത്തില്‍ പശ്ചിമഘട്ട മലനിരകളിലെ ആനമലൈ കുന്നുകളില്‍, കോയമ്പത്തൂരില്‍ നിന്നും ഏകദേശം 100 കിലോമീറ്റര്‍ അകലെയും പൊള്ളാച്ചിയില്‍ നിന്ന് 65 കിലോമീറ്ററുകള്‍ ദൂരത്തിലുമാണ് ഈ ഹില്‍സ്റ്റേഷന്‍ സ്ഥിതി ചെയ്യുന്നത്.
സഞ്ചാരികളുടെ മനം കവരുന്ന, കാഴ്ചയുടെ വിരുന്നൊരുക്കുന്ന താഴ് വരകളും പുല്‍മേടുകളും തടാകങ്ങളും പൂമരങ്ങളും കൊണ്ട് നിറഞ്ഞ പ്രകൃതി രമണീയമായ ഒരു സ്ഥലമാണ് വാല്‍പാറ. വിവിധ സസ്യ, ജന്തു, പക്ഷി വിഭാഗങ്ങള്‍ കൊണ്ട് സമ്പന്നമാണ് ഈ പ്രദേശം. പ്രകൃതിയുടെ വരദാനമായ ഈ പ്രദേശത്ത് കൂടി ഒരിക്കലെങ്കിലും കടന്നുപോകുക എന്നത് ഏതൊരു പ്രകൃതി സ്‌നേഹിയുടെയും ആഗ്രഹമായിരിക്കും.
ഇവിടെയുള്ള ഭൂരിഭാഗം പ്രദേശങ്ങളും സ്വകാര്യവ്യക്തികളുടെ തോട്ടങ്ങളാണ്. വനഭൂമിയില്‍ സന്ദര്‍ശകര്‍ക്ക് പ്രവേശനമില്ല. അഴിയാറില്‍ നിന്ന് വാല്‍പ്പാറയിലേയ്ക്കുള്ള റോഡില്‍ 40 ഹെയര്‍ പിന്‍ വളവുകളുണ്ട്. വലിയ വനമേഖലകള്‍ തൊട്ടംമേഖലയുടെ പരിധിക്കപ്പുറവും തുടരുന്നു. തമിഴ് നാട് സര്‍ക്കാര്‍ റിസോര്‍ട്ടുകളും മറ്റുമുണ്ടാക്കി ഇവിടെ ടൂറിസം വികസിപ്പിക്കാനുള്ള ശ്രമത്തിലാണ്.
മനോഹരമായ തേയില തോട്ടങ്ങള്‍ ഇവിടുത്തെ മറ്റൊരു പ്രത്യേകതയാണ്. ഇന്ന് കാണുന്ന തേയില തോട്ടങ്ങള്‍ പലതും വര്‍ഷങ്ങള്‍ക്ക് മുമ്പ് വനമേഖലയായിരുന്നു. ഈ വന സമ്പത്ത് പിഴുതെടുത്ത് ഒരുക്കിയതാണ് ഇന്ന് കാണുന്ന ഈ തേയില തോട്ടങ്ങള്‍.
റോഡ് ഗതാഗതം മാത്രമേ ഈ പ്രദേശത്ത് സാധ്യമാകൂ. തമിഴ് നാട്ടിലെ പൊള്ളാച്ചിയില്‍ നിന്നും 64 കിലോ മീറ്റര്‍ അകലെയാണ് വാല്‍പ്പാറ. 40 കൊടും വളവുകള്‍ നിറഞ്ഞ ചുരം കയറി വേണം ഈ റോഡിലൂടെ വാല്‍പാറയില്‍ എത്തിച്ചേരാന്‍. കേരളത്തിലെ ചാലക്കുടിയില്‍ നിന്നും സംസ്ഥാനപാത 21-ലൂടെ അതിരപ്പിള്ളി -വാഴച്ചാല്‍- മലക്കപ്പാറ വഴിയും വാല്‍പ്പാറയില്‍ എത്തിച്ചേരാം.
പൊള്ളാച്ചി ബസ് ടെര്‍മിനലില്‍ നിന്ന് ഓരോ 30 മിനിറ്റിലും പൊതു ബസുകള്‍ ലഭ്യമാണ്. കോയമ്പത്തൂര്‍ വിമാനത്താവളമാണ് വാല്‍പ്പാറയ്ക്ക് ഏറ്റവും അടുത്തുള്ള അന്താരാഷ്ട്ര വിമാനത്താവളം. ഏകദേശം 124 km. കോയമ്പത്തൂര്‍ ജംഗ്ഷനാണ് ഏറ്റവും അടുത്തുള്ള റെയില്‍വേ സ്റ്റേഷന്‍ ഏകദേശം 105 km.
വാല്‍പാറയില്‍ മുക്കാലും ഷോളയാര്‍ റിസര്‍വ്ട് ഫോറസ്റ്റ് ആണ്. സമയമെടുത്ത് ആസ്വദിച്ചു പോകാന്‍ പറ്റിയ റോഡ്. നിറയെ വളവുകളും തിരിവുകളും കുണ്ടും കുഴികളും എല്ലാം ഉണ്ട്. കാട്ടിലൂടെയുള്ള യാത്രയ്ക്കിടെ വന്യജീവികളെയും കാണാം. ആന, മാന്‍, കുരങ്ങു, സിംഹവാലന്‍ കുരങ്ങു, പലതരം പക്ഷികള്‍ എന്നിവ ഇവിടെ സുലഭമാണ്.
റിസോര്‍ട്ടുകള്‍, ഹോട്ടലുകള്‍, കോട്ടേജുകള്‍, ഹോം സ്റ്റേകള്‍, ടീ എസ്റ്റേറ്റ് ബംഗ്ലാവുകള്‍ തുടങ്ങി സഞ്ചാരികള്‍ക്ക് താമസിക്കാന്‍ ഒരുപാട് താമസ സൗകര്യങ്ങളും ഇവിടെ ഒരുക്കിയിട്ടുണ്ട്. ഒക്ടോബര്‍ മുതല്‍ നവംബര്‍ വരെയും മാര്‍ച്ച് മുതല്‍ മെയ് വരെയുമാണ് വാല്‍പ്പാറ സന്ദര്‍ശിക്കാന്‍ പറ്റിയ സമയം.
വൈകിട്ട് അഞ്ചു മണി കഴിഞ്ഞാല്‍ വാഴച്ചാല്‍ നിന്നും ചെക്ക് പോസ്റ്റ് വഴി വണ്ടികള്‍ കടത്തിവിടില്ല. വാല്‍പാറ കാണേണ്ട മറ്റൊരു കാഴ്ചയാണ് ആതിരപ്പള്ളി വെള്ളച്ചാട്ടം. വാല്‍പാറയില്‍ നിന്നും പൊള്ളാച്ചിക്ക് പോകുന്ന വഴിയാണ് വാല്‍പാറ ചുരം. 40 കൊടും വളവുകളിലൂടെ വളഞ്ഞു പുളഞ്ഞു കയറുകയും ഇറങ്ങുകയും ചെയ്യുന്ന ചുരം. ഊട്ടിയെ പോലെ വന്‍തോതില്‍ നഗരവല്‍ക്കരണം നടന്നിട്ടില്ല എന്നതു തന്നെയാണ് വാല്‍പാറയുടെ ദൃശ്യ മനോഹാരിത.
മഴപെയ്യുന്ന വഴികള്‍, പച്ചപ്പിനകത്തു തുളുങ്ങുന്ന തേയിലത്തോട്ടങ്ങള്‍, കനമായ മൂടല്‍മഞ്ഞ് എല്ലാം ചേര്‍ന്ന് അത്യന്തം മനോഹരമായ ഒരു യാത്രാനുഭവം തന്നെ ഇവിടെ ഒരുക്കുന്നു. ഒരിക്കല്‍ ഈ യാത്ര തുടങ്ങുമ്പോള്‍ തന്നെ പ്രകൃതിയുടെ കയ്യൊപ്പുള്ള അതിസുന്ദര കാഴ്ചകളുടെ ഒരു പ്രപഞ്ചത്തിലേക്കാണ് പ്രവേശനം.
വാല്‍പാറയിലെ പ്രധാന ആകര്‍ഷണങ്ങളില്‍ ഒന്നാണ് മങ്കി ഫാള്‍സ്. ഇവിടെ എന്നും കുരങ്ങന്മാരെ കാണാം. ഇവര്‍ വെള്ളത്തില്‍ കുളിക്കുന്നതും ആസ്വാദ്യകരമായ കാഴ്ചയാണ്. അതിനുശേഷം എത്തുന്ന ഗ്രാസ് ഹില്‍സ് ദേശീയോദ്യാനം, ചിന്നകല്ലാര്‍ വെള്ളച്ചാട്ടം എന്നിവ സഞ്ചാരികളെ ആകര്‍ഷിപ്പിക്കുന്നു. ഇടയ്ക്കിടെ കാണപ്പെടുന്ന ഹൈറിപ്പിന്‍ വളവുകള്‍ വഴി സഞ്ചരിക്കുമ്പോള്‍, ഓരോ വളവും ഓരോ പുതുമയാണ് സമ്മാനിക്കുന്നത്.
വാല്‍പാറയുടെ അന്തരീക്ഷം തന്നെ അതിശൈത്യവും തണുപ്പും നിറഞ്ഞതാണ്. നാടിന്റെ സമതല പ്രദേശങ്ങളില്‍ നിന്നുള്ളവര്‍ക്ക് ഒരു പുതിയ അനുഭവമാണ് ഇത്. തേയിലത്തോട്ടങ്ങള്‍, നദീതീരങ്ങള്‍, ഹില്‍-ടോപ്പ് വ്യൂ പോയിന്റുകള്‍ തുടങ്ങി പ്രകൃതിയുമായി ചേര്‍ന്ന നിരവധി ദര്‍ശനമേഖലകള്‍ ഇവിടെയുണ്ട്. ലോംസ്യൂ, കൊല്ലിങ്കല്‍ നദി തുടങ്ങിയവയില്‍ നിന്നുള്ള കാഴ്ചകള്‍ ആസ്വദിക്കാം.
സൗകര്യപ്രദമായ റോഡ് കണക്ഷനുകള്‍, റൂട്ടുകള്‍, ട്രാവല്‍ ടിപ്പുകള്‍ എന്നിവ തയ്യാറാക്കി ആസൂത്രിതമായി സഞ്ചരിച്ചാല്‍, വാല്‍പാറ സഞ്ചാരം വളരെ നന്നായി ആസ്വാദ്യകരമാക്കാം. പ്രകൃതി പ്രേമികള്‍ക്കും ആഭ്യന്തര സഞ്ചാരത്തിനാവശ്യമായ സൗന്ദര്യാന്വേഷകര്‍ക്കും വാല്‍പാറ ഒരു സ്വര്‍ഗ്ഗം തന്നെയാണ്.
ഭൂമിശാസ്ത്രപരമായി വാല്‍പാറ ആനമല പര്‍വത നിരകളുടെ ഭാഗമാണ്. 1885 പ്രസിദ്ധീകരിച്ച ഇമ്പീരിയല്‍ ഗസറ്റ് ഓഫ് ഇന്ത്യയില്‍ ഈ ഭൂപ്രദേശത്തെ കുറിച്ച് പരാമര്‍ശമുണ്ട്. ഇന്ത്യയില്‍ കാണുന്ന ഒട്ടു മിക്ക വന്യ ജീവികളും ഇവിടെ വസിക്കുന്നു എന്നാണ് ഒരു പരാമര്‍ശം.
ഭാഗ്യവശാല്‍ ഈ പ്രദേശത്തെ ജൈവ വൈവിധ്യത്തിനു വലിയ നാശം സംഭവിച്ചില്ല എന്നും പറയാം. കാരണം, ഈ പ്രദേശം നാലു സംരക്ഷിത മേഖലകളാല്‍ ചുറ്റപ്പെട്ടിരിക്കുന്നു. ഇന്ദിരാഗാന്ധി വന്യജീവി സംരക്ഷണ സങ്കേതം, ചിന്നാര്‍ വന്യജീവി സംരക്ഷണ സങ്കേതം, ഇരവികുളം നാഷണല്‍ പാര്‍ക്ക്, പറമ്പികുളം വന്യജീവി സംരക്ഷണ സങ്കേതം എന്നിവയാണ് അവ.
രേഖകള്‍ പ്രകാരം 1846 മുതല്‍ ആണ് വാല്‍പാറയില്‍ തേയില തോട്ടങ്ങള്‍ക്ക് തുടക്കമിടുന്നത്. പിന്നീട് പ്രമുഖ വ്യാപാരിയായിരുന്ന രാമാസ്വാമി മുതലിയാര്‍ വന്‍തോതില്‍ തോട്ടങ്ങള്‍ വെച്ചുപിടിപ്പിച്ചു വ്യാവസായിക അടിസ്ഥാനത്തില്‍ ഉല്‍പാദനം ആരംഭിച്ചു. 1884 ല്‍ കര്‍ണാടിക് കോഫീ കമ്പനി ഇവിടെ തേയില തോട്ടങ്ങള്‍ ആരംഭിച്ചുവെങ്കിലും കച്ചവട നഷ്ടത്തെ തുടര്‍ന്ന് കമ്പനി വിഷമത്തിലായി.
പ്രിന്‍സ് ഓഫ് വെയില്‌സിന്റെ വാല്‍പാറ സന്ദര്‍ശനം പ്രമാണിച്ച് സൈനികര്‍ ഇവിടേയ്ക്ക് റോഡുകളും ഗസ്റ്റ് ഹൗസുകളും നിര്‍മ്മിക്കുകയുണ്ടായി. എന്നാല്‍ രാജകുമാരന്റെ സന്ദര്‍ശനം നടന്നില്ല. ഇക്കാലത്ത് വാല്‍പാറയുടെ ഭൂരിഭാഗ വും മദ്രാസ് സ്റ്റേറ്റിന്റെ ഭാഗം ആയിരുന്നു. ഇതിന്റെ ഒരു വലിയ ഭാഗം സര്‍ക്കാരില്‍ നിന്നും രണ്ടു സായിപ്പന്മാര്‍ 1890-ല്‍ വിലക്കുവാങ്ങി. വിന്റ് റില്‍, നൊര്‍ഡന്‍ എന്നിവരായിരുന്നു അവര്‍.
വന്‍തോതില്‍ വന ഭാഗങ്ങള്‍ തോട്ടങ്ങള്‍ ആക്കപ്പെട്ടു. ഈ പ്രദേശത്തെ കൃഷിയിടമാക്കി മാറ്റാന്‍ ഇവരെ സഹായിക്കാന്‍ ഒരു വിദഗ്ദന്‍ ഉണ്ടായിരുന്നു. സി. എ കാര്‍വര്‍ മാര്‍ഷ്. കാര്‍വര്‍ ഒരു വിദഗ്ദനായ പ്ലാന്റര്‍ മാത്രമായിരുന്നില്ല, നാട്ടിലെ തദ്ദേശവാസികളുമായി നല്ല ബസം ഉണ്ടാക്കാന്‍ കൂടി അദ്ദേഹത്തിന് കഴിഞ്ഞു. Father of anamalais എന്നും കാര്‍വര്‍ അറിയപ്പെടുന്നു.
വാല്‍പാറയിലെ തോട്ടങ്ങളുടെ സ്ഥാപകന്‍ എന്നറിയപ്പെടുന്ന കാര്‍വര്‍ തന്റെ ജീവിതത്തിന്റെ ഭൂരിഭാഗവും വാല്‍പാറയില്‍ ആണ് ചെലവഴിച്ചത്. ഒടുവില്‍ കാര്‍വര്‍ ഊട്ടിയില്‍ വെച്ച് മരണപ്പെട്ടു( 1862 - 1934). 1897 ഫെബ്രുവരി മുതല്‍ 1934 വരെ നീണ്ട 36 വര്‍ഷം വാല്‍ പാറയുടെ പ്ലാന്റേഷന്‍ വികസനത്തിന് വേണ്ടി നല്‍കിയ കാര്‍വറുടെ മനോഹരമായ സ്മാരകമാണ് ഇന്നത്തെ വാല്‍പാറ.