മുഹമ്മദ് സിറാജിനെതിരെ ഉയര്‍ന്ന പ്രണയ ഗോസിപ്പുകള്‍ സത്യമോ? മറുപടി നല്‍കി താരം
കഴിഞ്ഞ രണ്ടാഴ്ചയ്ക്കിടെ സമൂഹ മാധ്യമങ്ങളില്‍ ചൂടുള്ള ചര്‍ച്ചയായത് ഇന്ത്യന്‍ ക്രിക്കറ്റ് താരം മുഹമ്മദ് സിറാജിന്റെ പേരില്‍ ഉയരുന്ന പ്രണയ ഗോസിപ്പുകളാണ്. രണ്ട് ഗോസിപ്പുകളാണ് താരത്തിന് നേരെ ഉയര്‍ന്നത്. ടെലിവിഷന്‍ റിയാലിറ്റി ഷോ ബിഗ് ബോസിലൂടെ ശ്രദ്ധ നേടിയ ടിവി താരം മഹിര ശര്‍മ, പ്രശസ്ത ഗായിക ആശ ഭോസ്ലെയുടെ കൊച്ചുമകളും ഗായികയുമായ സനായ് ഭോസ്‌ലെ എന്നിവരുമായി ചേര്‍ത്തായിരുന്നു ഗോസിപ്പുകള്‍. എന്നാല്‍ മഹിര ശര്‍മയുമായി പ്രണയത്തിലാണെന്ന വാര്‍ത്ത നിഷേധിച്ച് അവരുടെ അമ്മ സാനിയ ശര്‍മ തന്നെ രംഗത്തെത്തിയിരുന്നു.
'നിങ്ങള്‍ എന്തൊക്കെയാണ് ഈ പറയുന്നത്? അതിലൊന്നും യാതൊരു വാസ്തവവുമില്ല. ആളുകള്‍ക്ക് എന്തും പറയാം. എന്റെ മകള്‍ ഒരു സെലബ്രിറ്റിയാണ്. അവളെ മറ്റാരുമായും ചേര്‍ത്ത് ഇത്തരം ഗോസിപ്പുകള്‍ വരാം. അതുകൊണ്ട് ഇതെല്ലാം വിശ്വസനീയമാകുമോ? ഈ വാര്‍ത്ത പൂര്‍ണമായും തെറ്റാണ്' - എന്നായിരുന്നു സാനിയ ശര്‍മയുടെ പ്രതികരണം.
സനായ് ഭോസ്‌ലെ സഹോദരിയെപ്പോലെയാണെന്ന് വ്യക്തമാക്കി മുഹമ്മദ് സിറാജ് തന്നെ രംഗത്തെത്തിയിരുന്നു.
പുഞ്ചിരിയോടെ പരസ്പരം മുഖത്തോട് മുഖം നോക്കിയിരിക്കുന്ന ചിത്രം സനായ് ഭോസ്‌ലെ സമൂഹ മാധ്യമങ്ങളില്‍ പങ്കുവച്ചതോട് കൂടിയാണ് ഇരുവരും തമ്മില്‍ പ്രണയത്തിലാണെന്ന വാര്‍ത്ത പ്രചരിച്ച് തുടങ്ങിയത്. ആശ ഭോസ്‌ലെ, ബോളിവുഡ് താരം ജാക്കി ഷ്‌റോഫ്, ക്രിക്കറ്റ് താരങ്ങളായ ശ്രേയസ് അയ്യര്‍, സിദ്ധേഷ് ലാഡ് തുടങ്ങിയവര്‍ക്കൊപ്പമുള്ള ചിത്രങ്ങളും സനായ് പങ്കുവച്ചെങ്കിലും, വാര്‍ത്തകളില്‍ നിറഞ്ഞത് മുഹമ്മദ് സിറാജിനൊപ്പമുള്ള ഫോട്ടോ ആയിരുന്നു.
അഭ്യൂഹങ്ങള്‍ പ്രചരിച്ച അവസരങ്ങളില്‍ ആദ്യം നിശബ്ദത പാലിച്ച ഇരുവരും, പിന്നീട് സഹോദര തുല്യരാണെന്ന് വ്യക്തമാക്കി രംഗത്തെത്തി, ഇതോടെ ഗോസിപ്പുകള്‍ക്ക് താല്‍ക്കാലിക വിരാമമായി. പിന്നാലെയാണ് ടിവി താരം മഹിര ശര്‍മയും മുഹമ്മദ് സിറാജും ഡേറ്റിങ്ങിലാണെന്ന അഭ്യൂഹം പ്രചരിച്ചത്. ഇരുവരും പരസ്പരം മനസ്സിലാക്കി വരികയാണെന്നും, സമൂഹമാധ്യമങ്ങളില്‍ പരസ്പരം ഫോളോ ചെയ്യുന്നുണ്ടെന്നും ഉള്‍പ്പെടെയുള്ള 'കണ്ടെത്തലുകളോടെ'യാണ് ഗോസിപ്പുകള്‍ക്ക് ആക്കം കൂടിയത്.