വസതിയില്‍ വിരുന്നിനെത്തിയ കോഹ്ലിയെ സ്വയം ഡ്രൈവ് ചെയ്ത് ഹോട്ടലില്‍ എത്തിച്ച് ധോണി; വിഡിയോ വൈറല്‍
'റീയൂണിയന്‍ ഓഫ് ദി ഇയര്‍' എന്ന അടിക്കുറിപ്പോടെയാണ് ധോണി- കോഹ്ലി കൂടിക്കാഴ്ചയുടെ ദൃശ്യങ്ങള്‍ പുറത്തുവന്നത്;
മുംബൈ: ദക്ഷിണാഫ്രിക്കയ്ക്കെതിരായ ഏകദിന പരമ്പരയില്‍ പങ്കെടുക്കാനായി കുടുംബത്തിനൊപ്പം ഓസ്‌ട്രേലിയയിലായിരുന്ന വിരാട് കോഹ്ലി ഇന്ത്യയില്‍ തിരിച്ചെത്തി. കെ.എല്‍. രാഹുല്‍ നയിക്കുന്ന മൂന്ന് മത്സരങ്ങളുള്ള ഏകദിന പരമ്പരയില്‍ ഇന്ത്യ ദക്ഷിണാഫ്രിക്കയെ നേരിടും. നവംബര്‍ 30 ന് റാഞ്ചിയിലാണ് ആദ്യ മത്സരം. ഡിസംബര്‍ 3 ന് റായ്പൂരിലും ഡിസംബര്‍ 6 ന് വിശാഖപട്ടണത്തും തുടര്‍ന്നുള്ള മത്സരങ്ങള്‍ നടക്കും.
റാഞ്ചിയിലെത്തിയ കോഹ്ലി ആദ്യം ചെയ്തത് സുഹൃത്തും മുന്‍ ക്യാപ്റ്റനുമായിരുന്ന എംഎസ് ധോണിയുടെ വസതി സന്ദര്‍ശിക്കുക എന്നതായിരുന്നു. ധോണിയുടെ വസതിയില്‍ നടന്ന അത്താഴ വിരുന്നില്‍ ഋഷഭ് പന്തും പങ്കെടുത്തതായി റിപ്പോര്‍ട്ടുണ്ട്. വ്യാഴാഴ്ച രാത്രി വന്‍ സുരക്ഷാ സന്നാഹത്തോടെയായിരുന്നു സന്ദര്‍ശനം. വീടിനു പുറത്ത് ഒട്ടേറെ ആരാധകര്‍ തടിച്ചുകൂടിയിരുന്നു.
അത്താഴ വിരുന്നിന് ശേഷം ധോണി പിന്നീട് സ്വയം ഡ്രൈവ് ചെയ്ത് കോഹ്ലിക്കൊപ്പം പോകുന്ന വീഡിയോ ഇപ്പോള്‍ വൈറലാണ്. 'റീയൂണിയന്‍ ഓഫ് ദി ഇയര്‍' എന്ന അടിക്കുറിപ്പോടെയാണ് ധോണി കോഹ്ലി കൂടിക്കാഴ്ചയുടെ ദൃശ്യങ്ങള്‍ പുറത്തുവന്നത്.
ടെസ്റ്റ്, ട്വന്റി20 ഫോര്‍മാറ്റുകളില്‍നിന്നു വിരമിച്ച താരം, നിലവില്‍ ഏകദിനത്തില്‍ മാത്രമാണ് കളിക്കുന്നത്. ഓസ്ട്രേലിയയ്ക്കെതിരായ ഏകദിന പരമ്പരയിലെ ആദ്യ രണ്ടു മത്സരങ്ങളിലും ഫോമിലേക്ക് എത്തിയിരുന്നില്ലെങ്കിലും മൂന്നാം മത്സരത്തില്‍ 81 പന്തില്‍ 74 റണ്‍സെടുത്ത് പുറത്താകാതെ നിന്നു. രോഹിത് ശര്‍മയ്‌ക്കൊപ്പം ചേര്‍ന്നുണ്ടാക്കിയ കൂട്ടുകെട്ട്, ഇന്ത്യന്‍ വിജയത്തില്‍ നിര്‍ണായകമാകുകയും ചെയ്തു.
ദക്ഷിണാഫ്രിക്കയ്ക്കെതിരായ വരാനിരിക്കുന്ന ഏകദിന പരമ്പരയില്‍ കെ.എല്‍. രാഹുല്‍ ടീം ഇന്ത്യയെ നയിക്കും, നിയുക്ത ഏകദിന നായകന്‍ ശുഭ്മാന്‍ ഗില്ലിന്റെ അഭാവത്തിലാണ് കെ എല്‍ രാഹുല്‍ ക്യാപ്റ്റന്‍ സ്ഥാനം ഏറ്റെടുക്കുന്നത്. കൊല്‍ക്കത്തയില്‍ ദക്ഷിണാഫ്രിക്കയ്ക്കെതിരായ ആദ്യ ടെസ്റ്റിനിടെ കഴുത്തിന് പരിക്കേറ്റ ഗില്‍ നിലവില്‍ മുംബൈയില്‍ കൂടുതല്‍ മെഡിക്കല്‍ പരിശോധനയ്ക്ക് വിധേയനായിരിക്കുകയാണ്.
പ്ലീഹയ്‌ക്കേറ്റ പരിക്കിനെ തുടര്‍ന്ന് വൈസ് ക്യാപ്റ്റന്‍ ശ്രേയസ് അയ്യര്‍ക്കും പരമ്പര നഷ്ടമാകും. സിഡ്നിയില്‍ ഓസ്ട്രേലിയയ്ക്കെതിരായ മൂന്നാം ഏകദിനത്തില്‍ അലക്സ് കാരിയെ പുറത്താക്കാന്‍ ക്യാച്ച് എടുക്കുന്നതിനിടെയാണ് അയ്യര്‍ക്ക് പരിക്കേറ്റത്.
ഗില്ലും അയ്യറും കളിക്കളത്തില്‍ ഇല്ലാത്തതിനാല്‍, ടീമിനെ നയിക്കാനുള്ള ഉത്തരവാദിത്തം കെ.എല്‍. രാഹുലിനാണ്. 88 മത്സരങ്ങളില്‍ നിന്ന് 48.31 ശരാശരിയിലും 88.41 സ്‌ട്രൈക്ക് റേറ്റിലും 3,092 റണ്‍സ് നേടിയ രാഹുല്‍, മികച്ചൊരു ഏകദിന പ്രകടനം കാഴ്ചവയ്ക്കുന്നു. ദക്ഷിണാഫ്രിക്കയ്ക്കെതിരായ ടെസ്റ്റ് പരമ്പരയില്‍ സമ്പൂര്‍ണ തോല്‍വി വഴങ്ങിയ ഇന്ത്യയ്ക്ക്, ഏകദിന പരമ്പര നിര്‍ണായകമാണ്.
ഇന്ത്യന്‍ ടീം: രോഹിത് ശര്‍മ്മ, യശസ്വി ജയ്സ്വാള്‍, വിരാട് കോഹ്ലി, തിലക് വര്‍മ്മ, കെ.എല്‍. രാഹുല്‍ (ക്യാപ്റ്റനും വിക്കറ്റ് കീപ്പറും), ഋഷഭ് പന്ത് (വിക്കറ്റ് കീപ്പര്‍), വാഷിംഗ്ടണ്‍ സുന്ദര്‍, രവീന്ദ്ര ജഡേജ, കുല്‍ദീപ് യാദവ്, നിതീഷ് കുമാര്‍ റെഡ്ഡി, ഹര്‍ഷിത് റാണ, റുതുരാജ് ഗെയ്ക്വാദ്, പ്രസിദ്ധ് കൃഷ്ണ, അര്‍ഷ്ദീപ് സിംഗ്, ധ്രുവ് ജുറെല്‍.
MS Dhoni personally drove his car to drop Virat Kohli back at the hotel after dinner.🥺❤️ pic.twitter.com/sEHdZT1EGt
— 𝐑𝐮𝐬𝐡𝐢𝐢𝐢⁴⁵ (@rushiii_12) November 27, 2025