താന്‍ വിരമിച്ചതുകൊണ്ട് ആര്‍ക്കാണ് ഗുണം? ആസ്വദിക്കുന്നിടത്തോളം കാലം ക്രിക്കറ്റില്‍ തുടരുമെന്ന് മുഹമ്മദ് ഷമി
ഇന്ത്യക്കായി ഏകദിന ലോകകപ്പ് കിരീടം നേടുക എന്നതാണ് എന്റെ ഏറ്റവും വലിയ സ്വപ്‌നമെന്നും താരം;
കൊല്‍ക്കത്ത: വിരമിക്കല്‍ വാര്‍ത്തയോട് പ്രതികരിച്ച് ഇന്ത്യന്‍ പേസര്‍ മുഹമ്മദ് ഷമി. ന്യൂസ് 24ന് നല്‍കിയ അഭിമുഖത്തിലാണ് തന്റെ മുന്നോട്ടുള്ള കരിയറിനെ കുറിച്ച് ഷമി പ്രതികരിച്ചത്. അടുത്തകാലത്തൊന്നും ക്രിക്കറ്റില്‍ നിന്ന് വിരമിക്കാന്‍ ഉദ്ദ്യേശമില്ലെന്ന് വ്യക്തമാക്കിയ ഷമി താന്‍ വിരമിക്കല്‍ പ്രഖ്യാപിച്ചതുകൊണ്ട് ആര്‍ക്കാണ് ഗുണം കിട്ടുകയെന്നും ചോദിച്ചു. ക്രിക്കറ്റ് ആസ്വദിക്കുന്നിടത്തോളം കാലം രാജ്യാന്തര ക്രിക്കറ്റിലും ആഭ്യന്തര ക്രിക്കറ്റിലും തുടരുമെന്നും അദ്ദേഹം വ്യക്തമാക്കി.
അടുത്തിടെ ചേതേശ്വര്‍ പൂജാര, രവിചന്ദ്രന്‍ അശ്വിന്‍ എന്നിവരുടെ വിരമിക്കലും, ടെസ്റ്റ്, ടി20 മത്സരങ്ങളില്‍ നിന്നുള്ള വിരാട് കോഹ്ലി, രോഹിത് ശര്‍മ്മ എന്നിവരുടെ വിരമിക്കലും ആണ് ഷമിയുടെ വിരമിക്കല്‍ വാര്‍ത്തയ്ക്ക് ആക്കം കൂട്ടിയത്.
ആഭ്യന്തര സീസണ് തുടക്കമിടുന്ന ദുലീപ് ട്രോഫി ടൂര്‍ണമെന്റില്‍ നോര്‍ത്ത് സോണിനായി 34 കാരനായ ഈ ഇന്ത്യന്‍ പേസര്‍ കളിക്കാനിറങ്ങിയിരുന്നു. തുടര്‍ന്ന് ഈ വര്‍ഷം ചാമ്പ്യന്‍സ് ട്രോഫിയില്‍ ഇന്ത്യക്കായി കളിച്ച ശേഷം ഐപിഎല്ലില്‍ സണ്‍റൈസേഴ്‌സ് ഹൈദരാബാദിനായും കളിച്ചു. അതിനുശേഷം നടന്ന ഇംഗ്ലണ്ടിനെതിരായ ടെസ്റ്റ് പരമ്പരയിലേക്കുള്ള ഇന്ത്യന്‍ ടീമിലും വരാനിരിക്കുന്ന ഏഷ്യാ കപ്പിനുള്ള ടി20ഐ ടീമിലും ഷമിയെ പരിഗണിച്ചിരുന്നില്ല. ഫിറ്റ് നെസ് പ്രശ്‌നങ്ങളെ തുടര്‍ന്നാണ് ഷമിയെ പരിഗണിക്കാതിരുന്നത് എന്നായിരുന്നു റിപ്പോര്‍ട്ട്.
ഇതോടെയാണ് ഷമി വിരമിക്കാന്‍ പോവുകയാണെന്നുള്ള ഊഹാപോഹങ്ങള്‍ പ്രചരിച്ച് തുടങ്ങിയത്. ഇതിനോട് പ്രതികരിക്കുകയായിരുന്നു താരം. ഞാന്‍ വിരമിക്കാത്തതില്‍ ആര്‍ക്കെങ്കിലും പ്രശ്‌നമുണ്ടെങ്കില്‍ പറയൂ. ഞാന്‍ വിരമിക്കുന്നതുകൊണ്ട് ആര്‍ക്കാണ് ഗുണം കിട്ടുക. എനിക്ക് ക്രിക്കറ്റ് മടുക്കുമ്പോള്‍ ഞാന്‍ മതിയാക്കും. എന്നെ ടീമിലെടുത്താലും ഇല്ലെങ്കിലും കളിക്കാന്‍ ലഭിക്കുന്ന അവസരങ്ങളിലെല്ലാം കളിക്കും. ഇന്ത്യന്‍ ടീമിലെടുത്തില്ലെങ്കില്‍ ആഭ്യന്തര ക്രിക്കറ്റില്‍ കളിക്കും. എവിടെയെങ്കിലുമായി ഞാന്‍ ക്രിക്കറ്റ് കളിച്ചുകൊണ്ടേയിരിക്കും. ക്രിക്കറ്റ് മടുത്തുവെന്ന് തോന്നുമ്പോള്‍ മാത്രമെ വിരമിക്കാന്‍ ഉദ്ദ്യേശിക്കുന്നുള്ളു എന്നും ഷമി വ്യക്തമാക്കി.
ഇന്ത്യക്കായി ഏകദിന ലോകകപ്പ് കിരീടം നേടുക എന്നതാണ് എന്റെ ഏറ്റവും വലിയ സ്വപ്‌നമെന്നും ഷമി പറഞ്ഞു. 2023ല്‍ നമ്മള്‍ അതിന് തൊട്ടടുത്ത് എത്തിയതായിരുന്നു. പക്ഷെ ഫൈനല്‍ ദിവസം ഭാഗ്യം കൂടെ ഉണ്ടായില്ല. എല്ലാ മത്സരങ്ങളും ജയിച്ച് ഫൈനലിലെത്തിയപ്പോള്‍ ചെറിയൊരു പേടിയുണ്ടായിരുന്നു. എന്നാല്‍ ആരാധകരുടെ പിന്തുണ ആത്മവിശ്വാസം നല്‍കി. പക്ഷെ ഫൈനലില്‍ ഭാഗ്യം നമ്മളെ കൈവിട്ടുവെന്നും ഷമി പറഞ്ഞു. ഇംഗ്ലണ്ട് പര്യടനത്തില്‍ ഇന്ത്യന്‍ ടീമില്‍ ഇടം കിട്ടാതിരുന്ന ഷമി ഒക്ടോബറില്‍ നടക്കുന്ന വെസ്റ്റ് ഇന്‍ഡീസിനെതിരായ ടെസ്റ്റ് പരമ്പരയില്‍ ഇന്ത്യക്കായി കളിക്കാനാകുമെന്നാണ് പ്രതീക്ഷിക്കുന്നത്.