ഏകദിനത്തില്‍ ഇന്ത്യയുടെ ഏറ്റവും ഉയര്‍ന്ന മൂന്നാമത്തെ റണ്‍ വേട്ടക്കാരനായി രോഹിത് ശര്‍മ; മറികടക്കേണ്ടത് കോലിയേയും സച്ചിനേയും

അഡ്ലെയ്ഡ്: ഏകദിനത്തില്‍ ഇന്ത്യയുടെ ഏറ്റവും ഉയര്‍ന്ന മൂന്നാമത്തെ റണ്‍ വേട്ടക്കാരനായി രോഹിത് ശര്‍മ. വ്യാഴാഴ്ച അഡ്ലെയ്ഡില്‍ ഓസ്ട്രേലിയയ്ക്കെതിരായ രണ്ടാം ഏകദിനത്തില്‍ 73 റണ്‍സ് എടുത്തതോടെയാണ് ഏകദിന റണ്‍വേട്ടയില്‍ ഇന്ത്യന്‍ താരങ്ങളില്‍ രോഹിത് ശര്‍മ മൂന്നാം സ്ഥാനത്തെത്തിയത്. ഇതോടെ സൗരവ് ഗംഗുലിയുടെ മൂന്നാം സ്ഥാനമാണ് രോഹിത് മറികടന്നത്. ഏകദിനങ്ങളില്‍ 11, 221 റണ്‍സ് എടുത്തിട്ടുള്ള ഗാംഗുലി ഇതോടെ നാലാം സ്ഥാനത്തെത്തി. 308 മത്സരങ്ങളിലെ 297 ഇന്നിംഗ്‌സുകളില്‍ നിന്നാണ് ഗാംഗുലി 11, 221 റണ്‍സ് അടിച്ചതെങ്കില്‍ 275 മത്സരങ്ങളില്‍ നിന്നാണ് രോഹിത് റണ്‍വേട്ടയില്‍ ഗാംഗുലിയെ മറികടന്നത്.

ഏകദിന റണ്‍വേട്ടയില്‍ ഗാംഗുലിയെ മറികടക്കാന്‍ 46 റണ്‍സായിരുന്നു രോഹിത്തിന് അഡ്ലെയ്ഡില്‍ ഇറങ്ങുമ്പോള്‍ വേണ്ടിയിരുന്നത്. 21-ാം ഓവറില അഞ്ചാം പന്തില്‍ ആദം സാംപയെ ബൗണ്ടറി കടത്തിയാണ് രോഹിത് ഗാംഗുലിയെ പിന്നിലാക്കിയത്.

267 ഏകദിന ഇന്നിംഗ്സുകളില്‍ നിന്ന് 48.69 ശരാശരിയില്‍ 11,249 റണ്‍സ് 38 കാരനായ രോഹിത് നേടിയിട്ടുണ്ട്, 32 സെഞ്ച്വറികളും 59 അര്‍ധസെഞ്ച്വറികളും 264 എന്ന മികച്ച സ്‌കോറും ഇതിനോടകം നേടിയിട്ടുണ്ട്. ഇനി മറികടക്കേണ്ടത് വിരാട് കോലിയേയും സച്ചിന്‍ ടെന്റുല്‍ക്കറേയുമാണ്. വിരാട് കോലി (14,181) ഉം , സച്ചിന്‍ ടെണ്ടുല്‍ക്കര്‍ (18,426) ഉം റണ്‍സ് ആണ് നേടിയത്.

റണ്‍വേട്ടയില്‍ ഗാംഗുലിയെ മറികടന്നതിനൊപ്പം ഏകദിനങ്ങളില്‍ ഓപ്പണറെന്ന നിലയില്‍ ഇന്ത്യക്കായി ഏറ്റവും കൂടുതല്‍ റണ്‍സെടുത്ത താരമെന്ന റെക്കോര്‍ഡും രോഹിത് ഗാംഗുലിയില്‍ നിന്ന് സ്വന്തമാക്കിയിരുന്നു. ഓപ്പണറായി 9146 റണ്‍സടിച്ച ഗാംഗുലിയെയാണ് രോഹിത് മറികടന്നത്. അഡ്ലെയ്ഡില്‍ ഇറങ്ങുമ്പോള്‍ ഒരു റണ്ണായിരുന്നു ഈ നേട്ടത്തില്‍ ഗാംഗുലിയെ പിന്നിലാക്കാന്‍ രോഹിത്തിന് വേണ്ടിയിരുന്നത്. ആദ്യ ഓവറില്‍ തന്നെ സിംഗിളെടുത്ത് രോഹിത് ഗാംഗുലിയെ പിന്നിലാക്കി.

രാജ്യാന്തര ക്രിക്കറ്റില്‍ ഓപ്പണറായി ഏറ്റവും കൂടുതല്‍ റണ്‍സടിച്ച അഞ്ചാമത്തെ താരമാണ് രോഹിത്. സച്ചിന്‍ ടെന്‍ഡുല്‍ക്കര്‍(15310), സനത് ജയസൂര്യ(12740), ക്രിസ് ഗെയ്ല്‍(10179), ആദം ഗില്‍ക്രിസ്റ്റ്(9200) എന്നിവരാണ് രോഹിത്തിന് മുന്നിലുള്ളത്.

വ്യാഴാഴ്ച അഡ് ലെയ്ഡ് ഓവലില്‍ നടന്ന രണ്ടാം ഏകദിനത്തില്‍ ഓസ്ട്രേലിയയ്ക്കെതിരെ (ലോകകപ്പ് ഒഴികെ) 1000 ഏകദിന റണ്‍സ് തികയ്ക്കുന്ന ആദ്യ ഇന്ത്യന്‍ കളിക്കാരനായി രോഹിത് മാറിയിരുന്നു. 21 ഏകദിനങ്ങളില്‍ 1047 റണ്‍സാണ് ഓസ്‌ട്രേലിയയില്‍ രോഹിത്തിന്റെ നേട്ടം. 20 മത്സരങ്ങളില്‍ 802 റണ്‍സടിച്ച വിരാട് കോലി രണ്ടാം സ്ഥാനത്താണ്. 25 മത്സരങ്ങളില്‍ 740 റണ്‍സടിച്ച സച്ചിന്‍ മൂന്നാം സ്ഥാനത്തുള്ളപ്പോള്‍ 21 മത്സരങ്ങളില്‍ 684 റണ്‍സടിച്ച ധോണിയാണ് നാലാമത്.