കാന്‍സര്‍ പ്രതിരോധ ജനകീയ കാമ്പയിന്റെ ഭാഗമായി കാഞ്ഞങ്ങാട്ട് നടന്ന ബോധവല്‍ക്കരണ പരിപാടി
കാസര്‍കോട്: കേരള സര്‍ക്കാര്‍ ആരോഗ്യ കുടുംബക്ഷേമ വകുപ്പിന്റെ നേതൃത്വത്തില്‍ മാര്‍ച്ച് 8 വരെ നടക്കുന്ന കാന്‍സര്‍ പ്രതിരോധ ജനകീയ കാമ്പയിന് (ആരോഗ്യം ആനന്ദം-അകറ്റാം അര്‍ബുദം) തുടക്കമായി. ഗര്‍ഭാശയ ഗളാര്‍ബുദം, സ്തനാര്‍ബുദം തുടങ്ങിയവ നേരത്തെ കണ്ടുപിടിക്കാനും പ്രതിരോധിക്കുന്നതിന്റെയും ഭാഗമായാണ് കാമ്പയിന് സംഘടിപ്പിക്കുന്നത്. ഇതിന്റെ ഭാഗമായി 30 വയസ്സിന് മുകളില്‍ പ്രായമുള്ള ബി.പി.എല്‍ വിഭാഗത്തില്‍പെട്ട എല്ലാ സ്ത്രീകളെയും സൗജന്യമായി സ്‌ക്രീനിംഗ് ചെയ്യുക, എ.പി.എല്‍ വിഭാഗത്തില്‍പെട്ട സ്ത്രീകളെ സ്വമേധയാ സ്‌ക്രീനിംഗ് ചെയ്യുന്നതിന് പ്രോത്സാഹിപ്പിക്കുക എന്നിവയാണ് പദ്ധതി ലക്ഷ്യമിടുന്നത്. സാമൂഹിക പങ്കാളിത്തത്തോടെ നടപ്പാക്കുന്ന പരിപാടിയില്‍ സ്ത്രീകള്‍ക്കായി സ്ത്രീകളിലൂടെ എന്ന പ്രചരണ പരിപാടി വഴി ബോധവല്‍ക്കരണ നിര്‍ണ്ണയ പരിപാടികളില്‍ സ്ത്രീകളുടെ പങ്കാളിത്തം ഉറപ്പാക്കും. പരിപാടിയുടെ ജില്ലാതല ഉദ്ഘാടനം കാസര്‍കോട് ജില്ലാ പഞ്ചായത്ത് ആരോഗ്യകാര്യ സ്ഥിരം സമിതി അധ്യക്ഷ അഡ്വ. സരിത എസ്.എന്‍ നിര്‍വഹിച്ചു. കാഞ്ഞങ്ങാട് നഗരസഭ ആരോഗ്യകാര്യ സ്ഥിരം സമിതി അധ്യക്ഷ സരസ്വതി കെ.വി അധ്യക്ഷത വഹിച്ചു. നടിയും എഴുത്തുകാരിയുമായ സി.പി. ശുഭ സംബന്ധിച്ചു. ജില്ലാ മെഡിക്കല്‍ ഓഫീസര്‍ (ആരോഗ്യം) ഡോ. രാംദാസ് എ.വി ദിനാചരണ സന്ദേശം നല്‍കി. ജില്ലാ ഇന്‍ഫര്‍മേഷന്‍ ഓഫീസര്‍ മധുസൂദനന്‍ എം., ഐ.സി.ഡി.എസ് ജില്ലാ പ്രോഗ്രാം ഓഫീസര്‍ ചിത്രലേഖ എസ്., ജില്ലാ പ്രോഗ്രാം മാനേജര്‍ ഡോ. സച്ചിന്‍ സെല്‍വ്, ജില്ലാ ആര്‍.സി.എച്ച് ഓഫീസര്‍ ഡോ. ഷാന്റി. കെ.കെ, ഡെപ്യുട്ടി ജില്ലാ മെഡിക്കല്‍ ഓഫീസര്‍ ഡോ. സന്തോഷ് കെ., സ്ത്രീകളുടെയും കുട്ടികളുടെയും ആസ്പത്രി സൂപ്രണ്ട് ഡോ. സന്തോഷ് ബി. ജില്ലാ എം.സി.എച്ച് ഓഫീസര്‍ ശോഭ എം. എന്നിവര്‍ പങ്കെടുത്തു. കാഞ്ഞങ്ങാട് ജില്ലാആസ്പത്രി സൂപ്രണ്ട് ഡോ. ജീജ എം.പി സ്വാഗതവും ജില്ലാ എജുക്കേഷന്‍ ആന്റ് മീഡിയ ഓഫീസര്‍ അബ്ദുല്‍ ലത്തീഫ് മഠത്തില്‍ നന്ദിയും പറഞ്ഞു. തുടര്‍ന്ന് കാന്‍സറും പ്രതിരോധവും എന്ന വിഷയത്തില്‍ കാഞ്ഞങ്ങാട് ജില്ലാ ആസ്പത്രി ഓങ്കോളജിസ്റ്റ് ഡോ. രാജു മാത്യു സിറിയക് ബോധവല്‍ക്കരണ സെമിനാര്‍ നയിച്ചു.