പിന്തുടര്‍ന്ന് ശല്യം ചെയ്യുന്നതിനെതിരെ പൊലീസില്‍ പരാതി നല്‍കിയ യുവതിക്ക് കുത്തേറ്റു
അഡൂര്‍ കുറത്തിമൂലയിലെ 27കാരിക്കാണ് കുത്തേറ്റത്;
ആദൂര്‍: പിന്തുടര്‍ന്ന് ശല്യം ചെയ്യുന്നതിനെതിരെ പൊലീസില്‍ പരാതി നല്‍കിയ യുവതിയെ കുത്തി പരിക്കേല്‍പ്പിച്ചു. അഡൂര്‍ കുറത്തിമൂലയിലെ 27കാരിക്കാണ് കുത്തേറ്റത്. തിങ്കളാഴ്ച വൈകിട്ട് വീട്ടിലേക്ക് നടന്നുപോകുകയായിരുന്ന യുവതിയെ ഭര്‍ത്താവിന്റെ സുഹൃത്ത് കര്‍ണ്ണാടക മണ്ടേക്കാലിലെ പ്രതാപ് കത്തികൊണ്ട് കഴുത്തില്‍ കുത്തുകയായിരുന്നു എന്നാണ് പരാതിയില്‍ പറയുന്നത്.
യുവതി നിലവിളിച്ചതോടെ ഇയാള്‍ ഓടി രക്ഷപ്പെട്ടു. കഴുത്തിന് സാരമായി പരിക്കേറ്റ നിലയില്‍ യുവതി കാസര്‍കോട് ജനറല്‍ ആസ്പത്രിയില്‍ ചികില്‍സയിലാണ്. യുവതി ഭര്‍ത്താവില്‍ നിന്നുള്ള വിവാഹമോചനത്തിന് കേസ് ഫയല്‍ ചെയ്തിരുന്നു. ഇതറിഞ്ഞ പ്രതാപന്‍ തന്നെ നിരന്തരം ശല്യം ചെയ്യുന്നതായി കാണിച്ച് യുവതി ആദൂര്‍ പൊലീസിലും വനിതാ പൊലീസിലും പരാതി നല്‍കിയിരുന്നു.
ഇതേ തുടര്‍ന്ന് പൊലീസ് സ്റ്റേഷനില്‍ നടത്തിയ ഒത്തുതീര്‍പ്പ് ചര്‍ച്ചയില്‍ യുവതിയെ ശല്യപ്പെടുത്തില്ലെന്ന് പ്രതാപന്‍ ഉറപ്പ് നല്‍കിയതായി പറയുന്നു. ഇതിന് പിന്നാലെയാണ് യുവതിക്ക് നേരെ അക്രമം നടന്നത്. സംഭവത്തില്‍ പൊലീസ് അന്വേഷണമാരംഭിച്ചു.