നാടുകടത്തപ്പെട്ട പ്രതി കാപ്പ നിയമം ലംഘിച്ച് ജില്ലയിലെത്തി; പിന്നാലെ പൊലീസ് പിടിയിലായി
പിടികൂടിയത് കാഞ്ഞങ്ങാട് പുതിയ ബസ് സ്റ്റാന്റ് പരിസരത്ത് കറങ്ങി നടക്കുന്നതായി വിവരം ലഭിച്ചതിനെ തുടര്‍ന്ന് നടത്തിയ അന്വേഷണത്തില്‍;
കാഞ്ഞങ്ങാട്: കാപ്പ ചുമത്തി നാടുകടത്തിയ പ്രതി അനുമതി കൂടാതെ ജില്ലയില്‍ പ്രവേശിച്ചതിനെ തുടര്‍ന്ന് അറസ്റ്റ് ചെയ്തു. കല്യാണ്‍ റോഡ് മുത്തപ്പന്‍ തറയിലെ കെ സുധീഷിനെയാണ് അറസ്റ്റ് ചെയ്തത്. സുധീഷിന് ജില്ലയിലേക്ക് പ്രവേശിക്കുന്നതിന് നിയന്ത്രണം ഏര്‍പ്പെടുത്തിയിരുന്നു. ഇത് ലംഘിച്ചാണ് എത്തിയത്.
കാഞ്ഞങ്ങാട് പുതിയ ബസ് സ്റ്റാന്റ് പരിസരത്ത് കറങ്ങി നടക്കുന്നതായി വിവരം ലഭിച്ചതിനെ തുടര്‍ന്ന് നടത്തിയ അന്വേഷണത്തിലാണ് പിടികൂടിയത്. ഹൊസ് ദുര്‍ഗ്, നീലേശ്വരം പൊലീസ് സ്റ്റേഷനുകളിലായി അഞ്ചോളം ക്രിമിനല്‍ കേസുകളില്‍ പ്രതിയായ സുധീഷിനെ ഫെബ്രുവരിയിലാണ് കണ്ണൂര്‍ റേഞ്ച് ഡി.ഐ.ജി ആറ് മാസത്തേക്ക് കാപ്പ ചുമത്തി നാടുകടത്തിയത്.
ഹൊസ് ദുര്‍ഗ് ഇന്‍സ്പെക്ടര്‍ പി. അജിത്ത് കുമാറിന്റെ നേതൃത്വത്തില്‍ സബ് ഇന്‍സ്പെക്ടര്‍ പി.വി വരുണ്‍, സീനിയര്‍ സിവില്‍ പൊലീസ് ഓഫീസര്‍ സനീഷ് കുമാര്‍, സിവില്‍ പൊലീസ് ഓഫീസര്‍ അനൂപ് മാണിയാട്ട്, പി.പി രമിത്ത് എന്നിവരടങ്ങിയ സംഘമാണ് പിടികൂടിയത്.