ദക്ഷിണ കന്നഡയില്‍ 4398 വിദ്യാര്‍ഥികളില്‍ കാഴ്ച പ്രശ്‌നം : ആരോഗ്യ വകുപ്പ് റിപ്പോര്‍ട്ട്
പ്രതീകാത്മക ചിത്രം
മംഗളൂരു: ദക്ഷിണ കന്നഡയില്‍ ആരോഗ്യ വകുപ്പ് സ്‌കൂളുകള്‍ കേന്ദ്രീകരിച്ച് നടത്തിയ പരിശോധനയില്‍ 4398 വിദ്യാര്‍ഥികള്‍ക്ക് കാഴ്ച സംബന്ധമായ അസുഖം ഉള്ളതായി കണ്ടെത്തി. 1,106 സര്‍ക്കാര്‍ സ്‌കൂളുകളും 270 എയ്ഡഡ് സ്‌കൂളുകളും ഉള്‍പ്പെടെ 1,376 സ്‌കൂളുകളിലാണ് ആരോഗ്യവകുപ്പ് നേത്രപരിശോധന നടത്തിയത്. സര്‍ക്കാര്‍ സ്‌കൂളുകളിലെ 1,01,592 കുട്ടികളും എയ്ഡഡ് സ്‌കൂളുകളിലെ 44,359 കുട്ടികളും പരിശോധയ്ക്ക് വിധേയരായി. സ്‌ക്രീനിങ്ങില്‍ സര്‍ക്കാര്‍ സ്‌കൂളുകളിലെ 3,738 വിദ്യാര്‍ഥികള്‍ക്കും എയ്ഡഡ് സ്‌കൂളിലെ 660 വിദ്യാര്‍ഥികള്‍ക്കും കാഴ്ച പ്രശ്നങ്ങള് കണ്ടെത്തി. ഇതില്‍ സര്‍ക്കാര്‍ സ്‌കൂളിലെ 3,502 വിദ്യാര്‍ഥികള്‍ക്കും എയ്ഡഡ് സ്‌കൂളിലെ 607 വിദ്യാര്‍ഥികള്‍ക്കും കണ്ണട നല്‍കിയതായി ആരോഗ്യവകുപ്പ് അറിയിച്ചു.
സര്‍ക്കാര്‍, എയ്ഡഡ് സ്‌കൂളുകളിലെ 1 മുതല്‍ 10-ാം ക്ലാസ് വരെയുള്ള വിദ്യാര്‍ഥികളെ കേന്ദ്രീകരിച്ചായിരുന്നു പ്രാഥമിക പരിശോധന. ഈ കണക്കുകള്‍ സര്‍ക്കാര്‍, എയ്ഡഡ് സ്‌കൂളുകളിലെ വിദ്യാര്‍ത്ഥികളുടെ മാത്രം കണക്കുകളാണെന്നതാണ് പ്രധാനം, എന്നാല്‍ സ്വകാര്യ സ്‌കൂളുകളിലെ നിരവധി കുട്ടികള്‍ക്കും കണ്ണട ആവശ്യമായി വരുന്നതായാണ് റിപ്പോര്‍ട്ട്.
ഹ്രസ്വ ദൃഷ്ടിയും ദീര്‍ഘ ദൃഷ്ടിയുമാണ്ഏറ്റവും സാധാരണമായി കണ്ടുവരുന്ന കാഴ്ച പ്രശ്നങ്ങള്. ഈ പ്രശ്നങ്ങള് ഒരു പരിധി കവിഞ്ഞാല്‍, നേത്രരോഗവിദഗ്ധര്‍ കണ്ണടകള്‍ നിര്‍ദ്ദേശിക്കുന്നുണ്ട്. ചികിത്സിച്ചില്ലെങ്കില്‍, ഗുരുതരമായ കാഴ്ച പ്രശ്നങ്ങള് ഉണ്ടാകാനുള്ള സാധ്യത വര്‍ദ്ധിക്കുന്നു. മൊബൈല്‍ ഫോണ്‍ ഉപയോഗത്തിലുണ്ടായ വര്‍ധനവും കോവിഡിന് ശേഷമുള്ള സ്‌ക്രീന്‍ സമയവും നേത്രസംബന്ധമായ പ്രശ്നങ്ങള്‍ക്ക് പ്രധാന കാരണമാണെന്ന് ഒരു വിദ്യാര്‍ത്ഥിയുടെ രക്ഷിതാവ് പറഞ്ഞു
''ചില സന്ദര്‍ഭങ്ങളില്‍, കുട്ടികള്‍ കാഴ്ച വൈകല്യങ്ങളോടെ ജനിക്കുന്നു, എന്നാല്‍ ഇപ്പോള്‍, മൊബൈല്‍ ഫോണുകളുടെയും ടെലിവിഷനുകളുടെയും മറ്റ് സാങ്കേതികവിദ്യകളുടെയും അമിതമായ ഉപയോഗവും അനാരോഗ്യകരമായ ഭക്ഷണ ശീലങ്ങളും കാഴ്ച വൈകല്യങ്ങള്‍ക്ക് കാരണമാകുന്നു. കണ്ണിന്റെ ആരോഗ്യം സംരക്ഷിക്കേണ്ടത് പ്രധാനമാണ്. കുട്ടികളില്‍ കാഴ്ച പ്രശ്നങ്ങള് ഉണ്ടാകുമ്പോള്‍, ഉടന്‍ തന്നെ ഒരു നേത്രരോഗവിദഗ്ദ്ധനെ സമീപിക്കുന്നതാണ് നല്ലത്'' നേത്രരോഗവിദഗ്ദ്ധന്‍ വിശദീകരിച്ചു.