ഗ്രാമപഞ്ചായത്ത് ഓഫീസിന് മുന്നില്‍ അമ്മയെ മകള്‍ ക്രൂരമായി ആക്രമിക്കുന്നതിന്റെ നടുക്കുന്ന ദൃശ്യങ്ങള്‍ പുറത്ത്
വീഡിയോ സോഷ്യല്‍ മീഡിയയില്‍ വൈറലായതോടെ ഉയരുന്നത് വ്യാപകമായ പൊതുജന രോഷം;
മംഗളൂരു: ഗ്രാമപഞ്ചായത്ത് ഓഫീസിന് മുന്നില്‍ അമ്മയെ മകള്‍ ക്രൂരമായി ആക്രമിക്കുന്നതിന്റെ നടുക്കുന്ന ദൃശ്യങ്ങള്‍ പുറത്ത്. നഗരത്തിന്റെ പ്രാന്തപ്രദേശത്തുള്ള മൂഡുഷെഡ്ഡെ ഗ്രാമപഞ്ചായത്ത് (ജിപി) പരിധിയില്‍ കഴിഞ്ഞദിവസമാണ് സംഭവം നടന്നത്. വീഡിയോ സോഷ്യല്‍ മീഡിയയില്‍ വൈറലായതോടെ ഇതിനെതിരെ വ്യാപകമായ പൊതുജന രോഷമാണ് ഉയര്‍ന്നത്.
മൂഡുഷെഡ്ഡെയിലെ ശിവനഗരയില്‍ താമസിക്കുന്ന അമ്മയും മകളും കലഹിക്കുന്നത് പതിവാണെന്ന് റിപ്പോര്‍ട്ടുണ്ട്. ഇതേക്കുറിച്ച് പരാതി നല്‍കാന്‍ അമ്മ മുമ്പ് കാവൂര്‍ പൊലീസ് സ്റ്റേഷനില്‍ എത്തിയിരുന്നുവെന്നും തുടര്‍ന്ന് പൊലീസ് ഇരുവരെയും സ്റ്റേഷനിലേക്ക് വിളിപ്പിച്ച് കൗണ്‍സിലിംഗ് നല്‍കി തിരിച്ചയച്ചതായും റിപ്പോര്‍ട്ടുണ്ട്.
മൂന്ന് ദിവസം മുമ്പ് മകള്‍ക്കെതിരെ പരാതി നല്‍കാന്‍ മൂഡുഷെഡ്ഡെ ഗ്രാമപഞ്ചായത്ത് ഓഫീസിലെത്തിയ അമ്മയെ മകള്‍ തള്ളിയിട്ടു. അമ്മ പ്രതികാരം ചെയ്‌തെങ്കിലും, കോപാകുലയായ മകള്‍ അമ്മയുടെ മുഖത്ത് ചെരുപ്പ് കൊണ്ട് ക്രൂരമായി ആക്രമിച്ചു. ഇതിന്റെ ദൃശ്യങ്ങള്‍ വൈറലായ വീഡിയോയില്‍ വ്യക്തമായി പതിഞ്ഞിട്ടുണ്ട്. ഗ്രാമപഞ്ചായത്ത് ഓഫീസില്‍ ഉണ്ടായിരുന്ന വ്യക്തികള്‍ പകര്‍ത്തിയ വീഡിയോ ആണ് പുറത്തുവന്നത്. വിഡിയോ ഇപ്പോള്‍ സോഷ്യല്‍ മീഡിയയില്‍ വ്യാപകമായ വിമര്‍ശനത്തിന് കാരണമായിട്ടുണ്ട്.
ഗ്രാമപഞ്ചായത്തിലെ ഏതാനും തിരഞ്ഞെടുക്കപ്പെട്ട പ്രതിനിധികളും ജീവനക്കാരും സ്ഥലത്തുണ്ടായിരുന്നതായി വീഡിയോയില്‍ കാണാം. എന്നാല്‍ ഇവര്‍ ആക്രമണം തടയുന്നതിനോ പൊലീസിനെ വിവരം അറിയിക്കുന്നതിനോ പകരം സംഭവം റെക്കോര്‍ഡ് ചെയ്യുക മാത്രമാണ് ചെയ്തതെന്നാണ് സോഷ്യല്‍ മീഡിയയിലൂടെ ഉയരുന്ന പ്രധാന വിമര്‍ശനം.
അമ്മയെയും മകളെയും അന്വേഷണത്തിനായി വിളിച്ചുവരുത്തി മകള്‍ അമ്മയെ പരസ്യമായി ആക്രമിച്ചതിന് സ്വമേധയാ കേസെടുത്ത് അന്വേഷണം നടത്തണമെന്നാണ് പലരുടേയും ആവശ്യം. അമ്മയും മകളും തമ്മിലുള്ള വഴക്കുമായി ബന്ധപ്പെട്ട് ഇതുവരെ ഒരു കേസും രജിസ്റ്റര്‍ ചെയ്തിട്ടില്ല. കൂടുതല്‍ കാഴ്ചകള്‍ നേടുന്നതിനായി വീഡിയോ റെക്കോര്‍ഡ് ചെയ്ത് പ്രചരിപ്പിച്ച വ്യക്തിക്കെതിരെ നിയമനടപടി സ്വീകരിക്കുമെന്ന് മംഗളൂരു സിറ്റി പൊലീസ് കമ്മീഷണര്‍ അറിയിച്ചു.