88കാരിയോട് പേരക്കുട്ടിയുടെ ക്രൂരത: ചവിട്ടിവീഴ്ത്തിയെന്നും തല ചുമരില്‍ ഇടിപ്പിച്ച് പരിക്കേല്‍പ്പിച്ചെന്നും ഹോം നഴ്സ്
സംഭവത്തില്‍ കൊച്ചുമകന്‍ റിജുവിനെതിരെ പൊലീസ് കേസെടുത്തു.;
കണ്ണൂര്‍: പയ്യന്നൂരില്‍ 88 കാരിക്ക് നേരെ പേരക്കുട്ടിയുടെ ക്രൂരത. വയോധികയെ പേരക്കുട്ടി ചവിട്ടിവീഴ്ത്തിയെന്നും തല ചുമരില്‍ ഇടിപ്പിച്ച് പരിക്കേല്‍പ്പിച്ചെന്നും കാട്ടി ഹോം നഴ്സ് പരാതി നല്‍കിയിരിക്കുകയാണ്. സംഭവത്തില്‍ കൊച്ചുമകന്‍ റിജുവിനെതിരെ പൊലീസ് കേസെടുത്തു. കണ്ടങ്കാളിയിലെ കാര്‍ത്ത്യായനിക്കാണ് മര്‍ദനമേറ്റത്.
ഇക്കഴിഞ്ഞ മെയ് 11ന് വീട്ടില്‍ വച്ചായിരുന്നു മര്‍ദനം. കൊച്ചുമകന്‍ റിജു വയോധികയെ ചവിട്ടിവീഴ്ത്തിയെന്നും തല ചുമരില്‍ ഇടിപ്പിച്ചെന്നുമാണ് ഹോം നഴ് സ് നല്‍കിയ പരാതിയില്‍ പറയുന്നത്. മര്‍ദനത്തില്‍ തലക്കും കൈക്കും പരിക്കേറ്റ കാര്‍ത്ത്യായനി പരിയാരം ഗവ മെഡിക്കല്‍ കോളജില്‍ ചികിത്സയിലാണ്.
കൂടെ താമസിക്കുന്നതിന്റെ വിരോധത്തില്‍ ആക്രമിച്ചു എന്നാണ് കേസ്. മദ്യപിച്ചെത്തിയാണ് റിജു അമ്മൂമ്മയെ തല്ലിയതെന്ന് മറ്റൊരു കൊച്ചുമകന്‍ രാഹുല്‍ പറഞ്ഞു. കുളിമുറിയില്‍ വീണതാണെന്നാണ് ആദ്യം പറഞ്ഞത്. ഡോക്ടര്‍മാര്‍ പരിശോധിച്ചപ്പോഴാണ് മര്‍ദനമേറ്റ പാടുകള്‍ കണ്ടതെന്ന് ബന്ധുക്കള്‍ പറയുന്നു. പരാതിയില്‍ കൊച്ചുമകനെതിരെ കേസെടുത്തെങ്കിലും ഇതുവരെ പൊലീസ് അറസ്റ്റ് ചെയ്തിട്ടില്ല.