റോഡ് നിറയെ ആഴമുള്ള കുഴികള്‍; വാഹനങ്ങള്‍ അപകടത്തില്‍പ്പെടുന്നത് പതിവാകുന്നു; കരാവലി-മാല്‍പെ റോഡിന്റെ ശോച്യാവസ്ഥയില്‍ ദുരിതത്തിലായി യാത്രക്കാര്‍
ഇതുവഴിയുള്ള യാത്ര ജനങ്ങള്‍ക്ക് പേടിസ്വപ്നമായിരിക്കുകയാണ്.;
ഉഡുപ്പി: റോഡ് നിറയെ ആഴമുള്ള കുഴികള്‍, വാഹനങ്ങള്‍ അപകടത്തില്‍പ്പെടുന്നത് പതിവാകുന്നു, കരാവലി-മാല്‍പെ റോഡിന്റെ ശോച്യാവസ്ഥയില്‍ ദുരിതത്തിലായി യാത്രക്കാര്‍. ഇതുവഴിയുള്ള യാത്ര ജനങ്ങള്‍ക്ക് പേടിസ്വപ്നമായിരിക്കുകയാണ്. ജീവന്‍ പണയം വച്ചാണ് ഇതുവഴി വാഹനങ്ങള്‍ കടന്നുപോകുന്നത്.
സ്‌കൂളുകള്‍, ബീച്ചുകള്‍, മത്സ്യ തുറമുഖങ്ങള്‍, ഫാക്ടറികള്‍, വ്യാവസായിക യൂണിറ്റുകള്‍ എന്നിവയെ ബന്ധിപ്പിക്കുന്ന പ്രധാന റോഡാണ് ഇത്. എന്നാല്‍ ഇപ്പോള്‍ ഈ റോഡ് കുഴികളും വെള്ളക്കെട്ടും കൊണ്ട് നിറഞ്ഞിരിക്കുന്നു.
ഇരുചക്ര വാഹന യാത്രക്കാര്‍ പലപ്പോഴും അപകടത്തില്‍പ്പെടുന്നു. കാരണം കെട്ടിക്കിടക്കുന്ന വെള്ളത്തിനടിയിലുള്ള ആഴത്തിലുള്ള കുഴികള്‍ വാഹന യാത്രക്കാര്‍ക്ക് കാണാന്‍ കഴിയില്ല.മഴക്കാലം ആരംഭിച്ചതോടെ, അഴുക്കുചാല്‍ വെള്ളം റോഡില്‍ കെട്ടിക്കിടക്കുന്നതിനാല്‍ സ്ഥിതി കൂടുതല്‍ വഷളായിട്ടുണ്ട്.
റോഡിന്റെ അവസ്ഥ വളരെ പരിതാപകരമാണ്. ഗതാഗതയോഗ്യമല്ലാതായിരിക്കുന്നു. സ്‌കൂളുകള്‍ക്ക് സമീപം വെള്ളക്കെട്ടുള്ളതിനാല്‍ അതുവഴിയുള്ള യാത്ര അപകടം ക്ഷണിച്ച് വരുത്തുന്നു. മെയ് 29 ന് പുതിയ അധ്യയന വര്‍ഷം ആരംഭിക്കാനിരിക്കെ, മാല്‍പെ പ്രധാന റോഡിന്റെ ശോചനീയാവസ്ഥയെക്കുറിച്ച് ആശങ്കകള്‍ ഉയര്‍ന്നിട്ടുണ്ട്. റോഡിന്റെ ശോചനീയാവസ്ഥ വിദ്യാര്‍ത്ഥികള്‍ക്കും പൊതുജനങ്ങള്‍ക്കും ഗുരുതരമായ അപകടസാധ്യതകള്‍ സൃഷ്ടിക്കുന്നു.
റോഡിന്റെ ഇരുവശങ്ങളും വെള്ളത്തിനടിയിലായതിനാല്‍ സുരക്ഷിതമായ നടപ്പാതയില്ലാത്തതിനാല്‍ കാല്‍നടയാത്രക്കാരും വെല്ലുവിളികള്‍ നേരിടുന്നു. തുടര്‍ച്ചയായ ഗതാഗതവും ശരിയായ ഡ്രെയിനേജ് സംവിധാനത്തിന്റെ അഭാവവും ദൈനംദിന യാത്ര കൂടുതല്‍ ദുഷ്‌കരവും അപകടകരവുമാക്കുന്നു. ദിവസവും നിരവധി വാഹനങ്ങളും കാല്‍നട യാത്രക്കാരും സഞ്ചരിക്കുന്ന റോഡാണിത്.
അധികൃതര്‍ ഉടന്‍ നടപടിയെടുക്കണമെന്ന് പ്രദേശവാസികളും യാത്രക്കാരും ആവശ്യപ്പെടുന്നു. റോഡിന്റെ അവസ്ഥ വഷളായിക്കൊണ്ടിരിക്കുന്നതിനാല്‍, അടിയന്തരമായി അറ്റകുറ്റപ്പണികള്‍ നടത്തണമെന്നും അഴുക്കുചാല്‍ സംവിധാനത്തിന് പരിഹാരം കാണണമെന്നും ഇവര്‍ അധികൃതരോട് അഭ്യര്‍ഥിച്ചു.