ACHIEVEMENT | എല്‍.ബി.എസ് എഞ്ചിനീയറിങ് കോളേജിലെ പ്രോജക്ടുകള്‍ക്ക് മദ്രാസ് ഐ.ഐ.ടിയുടെ ധനസഹായം
കാസര്‍കോട്: മദ്രാസ് ഐ.ഐ.ടി വിപ്രോ ഫൗണ്ടേഷനുമായി സഹകരിച്ച് അഖിലേന്ത്യ അടിസ്ഥാനത്തില്‍ നടത്തുന്ന ഐഡിയസ് ടു ഇംപാക്ട് ചലഞ്ച് മത്സരത്തിലേക്ക് കാസര്‍കോട് എല്‍.ബി.എസ് എഞ്ചിനീയറിങ് കോളേജിലെ ഇലക്ട്രിക്കല്‍ വിഭാഗം സമര്‍പ്പിച്ച രണ്ട് പ്രോജക്ടുകളും 50000 രൂപ വീതമുള്ള ധനസഹായത്തിന് അര്‍ഹമായി.
അഖിലേന്ത്യ അടിസ്ഥാനത്തില്‍ നടത്തപ്പെട്ട മത്സരത്തില്‍ കേരളത്തിലെ കോളേജുകള്‍ സമര്‍പ്പിച്ച പ്രോജക്ടുകളില്‍ കാസര്‍കോട് എല്‍.ബി.എസ് എഞ്ചിനീയറിങ് അവതരിപ്പിച്ച രണ്ടു പ്രോജക്ടുകള്‍ മാത്രമാണ് ധനസഹായത്തിന് തിരഞ്ഞെടുക്കപ്പെട്ടത് എന്നത് ഈ നേട്ടത്തിന് തിളക്കമേകി.
ഡ്രോണിന്റെ സഹായത്താല്‍ വൈദ്യുതി വിതരണശൃംഗലയിലെ താപ ചിത്രമെടുക്കാനും അത് ആര്‍ട്ടിഫിഷ്യല്‍ ഇന്റലിജന്‍സിന്റെ സഹായത്താല്‍ അപഗ്രഥിച്ച് കേടുപാടുകള്‍ നേരത്തെ കണ്ടുപിടിക്കാന്‍ സഹായിക്കുന്ന ഒരു പ്രോജക്ടും, ഇലക്ട്രിക് വാഹനങ്ങളുടെ ബാറ്ററിയുടെ പുനരുപയോഗവുമായി ബന്ധപ്പെട്ട ചാര്‍ജിങ് സംവിധാനങ്ങളുടെ നിര്‍മ്മാണത്തിനുള്ള രണ്ടാമത്തെ പ്രോജക്ടും വിദഗ്ധസമിതിയുടെ പ്രശംസ പിടിച്ചു പറ്റി.
ആദ്യത്തെ പ്രോജക്ട് ഡോ.കണ്ണന്‍ എം, പ്രൊഫസര്‍ അരുണ്‍ എസ് മാത്യു എന്നിവരുടെ നേതൃത്വത്തില്‍ അര്‍ജുന്‍ പി, ശ്രീറാം എസ്, ഹരികൃഷ്ണ ടി എസ്, ഫാത്തിമ സഹ് റ എന്നീ വിദ്യാര്‍ത്ഥികളും, രണ്ടാമത്തെ പ്രോജക്ട് ഡോ. ഷീജ വി, പ്രൊഫ. ബേബി സിന്ധു, എന്നിവരുടെ നേതൃത്വത്തില്‍, അബ്ദുള്ള ഹനാന്‍, ആദില്‍ സിദാന്‍, നന്ദന എ.എസ്, റിതിക സി. എന്നീ വിദ്യാര്‍ത്ഥികളുമാണ് വികസിപ്പിച്ചത്.
കൂടാതെ എപിജെ അബ്ദുല്‍ കലാം ടെക്നോളജിക്കല്‍ യൂണിവേഴ്സിറ്റി വിദ്യാര്‍ത്ഥികളുടെ നൂതന ആശയങ്ങള്‍ക്കായി നല്‍കിവരുന്ന സി ഇ ആര്‍ ഡി ഫണ്ടിങ് ഇലക്ട്രിക്കല്‍ വിഭാഗത്തിലെ തന്നെ മറ്റ് രണ്ട് ടീമുകള്‍ക്കും ലഭ്യമായി. ഡോക്ടര്‍ അസീമിന്റെ നേതൃത്വത്തില്‍, ആതിര ഏ.വി, പ്രത്യുരാജ് വി, അജയ് കൃഷ്ണന്‍.വി, ആകാശ് ബാബു, വൈഷ്ണവി പ്രേം, രമിത്. ആര്‍.കെ എന്നീ വിദ്യാര്‍ത്ഥികളും പ്രൊഫസര്‍ ജയകുമാര്‍ എം.ന്റെ നേതൃത്വത്തില്‍ അഭിനന്ദ്. ഇ.വി അഭിനവ് കെ.കെ, അര്‍ജുന്‍ എം, ദൃശ്യാ പി.വി എന്നീ വിദ്യാര്‍ത്ഥികളുമാണ് ഫണ്ടിങ്ങിന് അര്‍ഹരായാത്.
ഇലക്ട്രിക്കല്‍ വിഭാഗത്തിലെ വിദ്യാര്‍ഥികള്‍ തുടര്‍ച്ചയായ വര്‍ഷങ്ങളില്‍ നിരവധി തവണ യൂണിവേഴ് സിറ്റിയുടെ ഗവേഷണ വിഭാഗം (സി.ഇ. ആര്‍.ഡി)ധനസഹായം നേടിയെടുത്തിട്ടുണ്ട്. ഫെബ്രുവരിയില്‍ നടന്ന എന്‍. ബി.എ അക്രഡിറ്റേഷന്‍ വിസിറ്റില്‍ ഇലക്ട്രിക്കല്‍ ഡിപ്പാര്‍ട്ട് മെന്റിലെ നൂതന പ്രോജക്ടുകളെ കുറിച്ച് വിദഗ്ധര്‍ മികച്ച അഭിപ്രായമാണ് രേഖപ്പെടുത്തിയത്.