ഐ.സി.എസ്.ഇ പത്താം ക്ലാസ്, ഐ.എസ്.സി പന്ത്രണ്ടാം ക്ലാസ് പരീക്ഷാഫലം പ്രഖ്യാപിച്ചു
കൗണ്‍സില്‍ ഫോര്‍ ദ ഇന്ത്യന്‍ സ്‌കൂള്‍ സര്‍ട്ടിഫിക്കറ്റ് എക്‌സാമിനേഷന്‍സ് ആണ് ഫലം പ്രസിദ്ധീകരിച്ചത്.;
ന്യൂഡല്‍ഹി: രാജ്യത്തെ ഐ.സി.എസ്.ഇ പത്താം ക്ലാസ്, ഐ.എസ്.സി പന്ത്രണ്ടാം ക്ലാസ് പരീക്ഷാഫലം പ്രഖ്യാപിച്ചു. കൗണ്‍സില്‍ ഫോര്‍ ദ ഇന്ത്യന്‍ സ്‌കൂള്‍ സര്‍ട്ടിഫിക്കറ്റ് എക്‌സാമിനേഷന്‍സ്(CISCE) ആണ് ഫലം പ്രസിദ്ധീകരിച്ചത്. https://cisce.org/ എന്ന വെബ് സൈറ്റിലോ ഡിജി ലോക്കര്‍ പ്ലാറ്റ് ഫോം വഴിയോ ഫലം ലഭ്യമാകും.
99,551 വിദ്യാര്‍ഥികളാണ് ഇത്തവണ പന്ത്രണ്ടാം ക്ലാസ് പരീക്ഷ എഴുതിയത്. ഇതില്‍ 98,578 പേര്‍ തുടര്‍പഠനത്തിന് അര്‍ഹരായി. 99.45 ശതമാനമാണ് പെണ്‍കുട്ടികളുടെ വിജയശതമാനം. ആണ്‍കുട്ടികള്‍ 98.64 ശതമാനം.
യുണീക് ഐ.ഡിയും ഇന്‍ഡക്‌സ് നമ്പറും ഉപയോഗിച്ച് വിദ്യാര്‍ഥികള്‍ക്ക് അവരുടെ ഡിജിറ്റല്‍ മാര്‍ക്ക് ഷീറ്റ് ഡൗണ്‍ലോഡ് ചെയ്യാന്‍ സാധിക്കും. ഫെബ്രുവരി 18 മുതല്‍ മാര്‍ച്ച് 27 വരെയായിരുന്നു പത്താം ക്ലാസ് പരീക്ഷ. ഫെബ്രുവരി 13 മുതല്‍ ഏപ്രില്‍ 5 വരെയായിരുന്നു പന്ത്രണ്ടാം ക്ലാസ് പരീക്ഷ.
ഫലത്തില്‍ തൃപ്തരല്ലാത്ത വിദ്യാര്‍ഥികള്‍ക്ക് ഉത്തരക്കടലാസുകള്‍ പുനഃപരിശോധിക്കാനുള്ള അവസരവും ഉണ്ട്. മേയ് നാല് ആണ് അപേക്ഷ സമര്‍പ്പിക്കാനുള്ള അവസാന തീയതി. പുനഃപരിശോധനാ ഫലത്തിലും തൃപ്തരല്ലെങ്കില്‍ പ്രസ്തുത വിഷയങ്ങളുടെ ഉത്തരക്കടലാസുകള്‍ പുനര്‍മൂല്യനിര്‍ണയത്തിന് നല്‍കാനും അവസരമുണ്ടാകും. കൂടാതെ മാര്‍ക്ക് മെച്ചപ്പെടുത്താന്‍ ആഗ്രഹിക്കുന്നവര്‍ക്ക് രണ്ട് വിഷയങ്ങളില്‍ ഇംപ്രൂവ് മെന്റ് പരീക്ഷ എഴുതാം.