ഡല്‍ഹി ആള്‍ ഇന്ത്യ ഇന്‍സ്റ്റിറ്റ്യൂട്ട് ഓഫ് മെഡിക്കല്‍ സയന്‍സസില്‍ മെഡിക്കല്‍- പാരമെഡിക്കല്‍ കോഴ്‌സുകളിലേക്കുള്ള അപേക്ഷകള്‍ സ്വീകരിച്ചു തുടങ്ങി
മെയ് 7 വരെയാണ് രജിസ്‌ട്രേഷന്‍ തീയതി.;
ന്യൂഡല്‍ഹി: ആള്‍ ഇന്ത്യ ഇന്‍സ്റ്റിറ്റ്യൂട്ട് ഓഫ് മെഡിക്കല്‍ സയന്‍സസില്‍ മെഡിക്കല്‍- പാരമെഡിക്കല്‍ കോഴ് സുകളിലേക്കുള്ള അപേക്ഷകള്‍ സ്വീകരിച്ചു തുടങ്ങി. ബി.എസ്.സി, എം.എസ്.സി കോഴ്‌സുകളിലെ 2025 വര്‍ഷത്തെ പ്രവേശന പരീക്ഷകള്‍ക്കുള്ള അടിസ്ഥാന രജിസ്‌ട്രേഷന്‍ നടപടിക്രമങ്ങളാണ് ആരംഭിച്ചത്.
ബി.എസ്.സി നഴ്‌സിങ്, വിവിധ ബി.എസ്.സി പാരാമെഡിക്കല്‍ കോഴ്‌സുകള്‍, എം.എസ്.സി നഴ്‌സിങ്, എം.എസ്.സി ബയോടെക്‌നോളജി, എം.എസ്.സി പാരമെഡിക്കല്‍ കോഴ്‌സുകളാണ് ഇവിടെയുള്ളത്. മെയ് 7 വരെയാണ് രജിസ്‌ട്രേഷന്‍ തീയതി.
രണ്ടു ഘട്ടങ്ങളിലായിട്ടായിരിക്കും രജിസ്‌ട്രേഷന്‍ നടക്കുന്നത്. ബേസിക് രജിസ്‌ട്രേഷനാണ് ആദ്യ ഘട്ടം. ഇതില്‍ കോഴ് സുകളില്‍ ചേരാന്‍ ആഗ്രഹിക്കുന്നവര്‍ ഔദ്യോഗിക പോര്‍ട്ടല്‍ വഴി വിവരങ്ങള്‍ നല്‍കി രജിസ്‌ട്രേഷന്‍ പൂര്‍ത്തിയാക്കണം. ബേസിക് രജിസ്‌ട്രേഷന്‍ പൂര്‍ത്തിയാക്കി കഴിഞ്ഞാല്‍ ഫൈനല്‍ രജിസ്‌ട്രേഷന്‍ കോഡ് രൂപപ്പെടുത്താനും അപേക്ഷ ഫീസ് അടയ്ക്കാനും പരീക്ഷ കേന്ദ്രം തിരഞ്ഞെടുക്കാനും കഴിയും.
പ്രവേശന പരീക്ഷയുടെ മൂല്യനിര്‍ണയത്തിന്റെ അടിസ്ഥാനത്തില്‍ തയാറാക്കുന്ന റാങ്ക് ലിസ്റ്റിന്റെ ക്രമത്തിലായിരിക്കും വിവിധ എയിംസുകളിലേക്കുള്ള അലോട് മെന്റുകള്‍ പ്രഖ്യാപിക്കുന്നത്.