ഐ.എന്‍.എല്‍ ജില്ലാ സെക്രട്ടറി അസീസ് കടപ്പുറത്തിന്റെ സഹോദരനും എന്‍.വൈ.എല്‍ ജില്ലാ ട്രഷററുമായ സാദിഖ് കടപ്പുറത്തിന്റെ മരണവാര്‍ത്ത മനസ്സിനെ വല്ലാതെ വിഷമിപ്പിച്ചു. ഐ.എന്‍.എല്ലിന്റെ സജീവ പ്രവര്‍ത്തകനും അതിലുപരി പാവപ്പെട്ടവര്‍ക്ക് അത്താണിയുമായിരുന്നു സാദിഖ്. നാട്ടില്‍ ആര്‍ക്കെങ്കിലും എന്തെങ്കിലും ആവശ്യം വന്നാല്‍ ആദ്യം ഓടിയെത്തുന്നവനായിരുന്നു. അവര്‍ക്ക് വേണ്ട സേവനം ചെയ്തുകൊടുക്കുകയും ചെയ്യുന്ന മഹാമനസ്‌കതയുള്ള വ്യക്തിയായിരുന്നു. ഭക്ഷണത്തിനായാലും മരുന്നിനായാലും സാമ്പത്തികമായാലും ബുദ്ധിമുട്ട് അനുഭവിക്കുന്നവരെ കണ്ണീരൊപ്പുകയും തന്റെ നെഞ്ചോട് ചേര്‍ത്തുപിടിക്കുകയും ചെയ്തിരുന്ന നിഷ്‌കളങ്ക മനസ്സായിരുന്നു സാദിഖിന്റേത്. എന്നും പുഞ്ചിരിക്കുന്ന മുഖവുമായി നാട്ടിലെ ജനങ്ങളോടൊപ്പം ഏതു പ്രവര്‍ത്തന മേഖലയിലും നിറസാന്നിധ്യമായിരുന്നു. നാട്ടിലെ സാധാരണക്കാര്‍ക്ക് വേണ്ടി ജീവിതം മാറ്റിവെച്ച് സ്വന്തം ജീവിതം മറന്നുപോയ ഉറ്റ ചങ്ങാതിയായിരുന്നു. സ്വര്‍ഗത്തിലേക്കുള്ള കവാടം സാദിഖിന് വേണ്ടി അല്ലാഹു തുറന്നു വെച്ചിരിക്കണം, കാരണം അത്രക്കും നന്മകള്‍ ചെയ്തിട്ടുണ്ട്.
മഴക്കാലമായാലും വേനല്‍ക്കാലമായാലും സാദിഖും നാട്ടുകാരും ശുചീകരണ രംഗത്തുണ്ടാവും. രാത്രിയെന്നോ പകലെന്നോ വ്യത്യാസമില്ലാതെ ഏതുനേരത്തും നാട്ടുകാരുടെ ക്ഷേമത്തിന് വേണ്ടി കൂടെയുണ്ടായിരുന്നവനാണ്. സാദിഖിന്റെ വിയോഗം ഒരു നാടിനേയും നാട്ടുകാരേയും കണ്ണീരിലാഴ്ത്തി. ഞാന്‍ പല പ്രാവശ്യമായി പലരുടെയും പ്രശ്‌നങ്ങള്‍ പറഞ്ഞപ്പോള്‍ അത് നടത്തി കൊടുത്ത വ്യക്തിയായിരുന്നു അവന്‍.
റമദാന്‍ മാസമായാല്‍ പാവപ്പെട്ട, സാധാരണക്കാരായ ഓരോ കുടുംബത്തിനും ഭക്ഷണ കിറ്റുകളും രോഗികള്‍ക്ക് മരുന്നുകളുമായി സാദിഖ് വീടുകളില്‍ കയറി ഇറങ്ങുമ്പോള്‍ അവന്റെ ഓരോ ചുവടുവെപ്പും സ്വര്‍ഗത്തിലേക്കുള്ള അടുപ്പമായിരുന്നുവെന്ന് തോന്നിപ്പോകുന്നു. ഏതു പാതിരാത്രിയിലും എന്തെങ്കിലും ആവശ്യം പറഞ്ഞ് ഒരു ഫോണ്‍ വിളി മതി, അവിടെ സാദിഖ് റെഡിയായിരുന്നു. മരണവാര്‍ത്ത അറിഞ്ഞ നിമിഷം എന്തോ മനസിലൊരു വിങ്ങല്‍. കാരുണ്യത്തിന്റെ വിളക്ക് അണഞ്ഞപ്പോള്‍ ഇരുട്ട് പരന്ന പോലെയൊരു തോന്നല്‍. അവന്‍ ചെയ്തു കൂട്ടിയ നന്മകളുടെ പ്രതിഫലമായി സ്വര്‍ഗത്തിലൊരു ഇടം ലഭിക്കട്ടെ എന്ന പ്രാര്‍ത്ഥനയോടെ...