മംഗല്‍പാടിയിലെ താലൂക്ക് ആസ്പത്രിക്ക് പുതിയ കെട്ടിടം: പ്രവൃത്തി ഉദ്ഘാടനം നിര്‍വ്വഹിച്ചു
മംഗല്‍പാടി താലൂക്ക് ആസ്പത്രിയുടെ പുതിയ കെട്ടിടത്തിന്റെ ശിലാഫലകം എ.കെ.എം അഷ്‌റഫ് എം.എല്‍.എ അനാച്ഛാദനം ചെയ്യുന്നു
ഉപ്പള: മംഗല്‍പാടിയില്‍ സ്ഥിതി ചെയ്യുന്ന മഞ്ചേശ്വരം താലൂക്ക് ആസ്ഥാന ആസ്പത്രിക്ക് കിഫ്ബി ഫണ്ട് ഉപയോഗിച്ച് നിര്‍മ്മിക്കുന്ന ആധുനിക രീതിയിലുള്ള കെട്ടിടത്തിന്റെ നിര്‍മ്മാണോദ്ഘാടനം ആരോഗ്യ വകുപ്പ് മന്ത്രി വീണാ ജോര്‍ജ് വീഡിയോ കോണ്‍ഫറന്‍സിലൂടെ നിര്‍വ്വഹിച്ചു. എ.കെ.എം അഷ്‌റഫ് എം.എല്‍.എ അധ്യക്ഷത വഹിച്ചു. ആര്‍ദ്രം നിലവാരത്തിലുളള സൗകര്യത്തോടെ 17.47 കോടി രൂപ ചെലവില്‍ 26,000 ചതുരശ്രയടി വിസ്തീര്‍ണ്ണത്തില്‍ നിര്‍മ്മിക്കുന്ന ഇരുനില കെട്ടിടത്തില്‍ ഒ.പി, ക്യാഷ്വാലിറ്റി, മൈനര്‍ ഒ.ടി, എക്‌സ്‌റേ, അള്‍ട്രാ സൗണ്ട്, സി.ടി സ്‌കാന്‍, ഫാര്‍മസി, രണ്ട് ഒ.പി കണ്‍സള്‍ട്ടേഷന്‍ മുറികള്‍, സ്റ്റാഫ് റൂം, അന്വേഷണ-സ്വീകരണ കൗണ്ടറുകള്‍, കാത്തിരിപ്പ് കേന്ദ്രം, ഇലക്ട്രിക്കല്‍ റൂം, പൊലീസ് എയ്ഡ് പോസ്റ്റ്, ടോയ്‌ലറ്റ് എന്നീ സൗകര്യങ്ങള്‍ ഒരുക്കും. 15 മാസത്തിനകം പ്രവൃത്തി പൂര്‍ത്തീകരിക്കാനാണ് കരാര്‍. മഞ്ചേശ്വരം ബ്ലോക്ക് പഞ്ചായത്ത് പ്രസിഡണ്ട് ഷമീന ടീച്ചര്‍ സ്വാഗതം പറഞ്ഞു. ഡോ. രാമദാസ് എ.വി റിപ്പോര്‍ട്ട് അവതരിപ്പിച്ചു. മംഗല്‍പാടി പഞ്ചായത്ത് പ്രസിഡണ്ട് റുബീന നൗഫല്‍, മഞ്ചേശ്വരം പഞ്ചായത്ത് പ്രസിഡണ്ട് ജീന്‍ ലെവീന മൊന്റോറൊ, ജില്ലാ പഞ്ചായത്തംഗം ഗോള്‍ഡന്‍ അബ്ദുല്‍ റഹിമാന്‍, ബ്ലോക്ക് പഞ്ചായത്ത് വൈസ് പ്രസിഡണ്ട് പി.കെ മുഹമ്മദ് ഹനീഫ്, ബ്ലോക്ക് പഞ്ചായത്ത് ആരോഗ്യ സ്ഥിരം സമിതി അധ്യക്ഷ ഷംസീന എ., മംഗല്‍പാടി ഗ്രാമ പഞ്ചായത്ത് ആരോഗ്യ സ്ഥിരം സമിതി അധ്യക്ഷ ഇര്‍ഫാന ഇഖ്ബാല്‍ തുടങ്ങിയവര്‍ സംബന്ധിച്ചു.