ദുബായ് നിവാസികള്‍ക്കായി പുതിയ ഫിറ്റ് നസ് സംരംഭം; 'ദുബൈ മാളത്തണ്‍' പ്രഖ്യാപിച്ച് കിരീടാവകാശി
ആഗസ്ത് മാസം മുതല്‍ ദിവസവും രാവിലെ 7 മുതല്‍ 10 വരെ താമസക്കാര്‍ക്ക് ഇവിടെ വ്യായാമം നടത്താം;
ദുബൈ: കടുത്ത ചൂടിനെ മറികടക്കാന്‍ ആഗ്രഹിക്കുന്ന ദുബായ് നിവാസികള്‍ക്കായി ഒരു പുതിയ ഫിറ്റ്‌നസ് സംരംഭം ആരംഭിച്ച് കിരീടാവകാശി ഷെയ്ഖ് ഹംദാന്‍. മാളുകളെ കായിക പാതകളാക്കി മാറ്റുന്ന 'ദുബായ് മല്ലത്തോണി' ന് ആണ് വ്യാഴാഴ്ച ഷെയ്ഖ് ഹംദാന്‍ തുടക്കമിട്ടത്.
യുഎഇയുടെ സാമൂഹിക വര്‍ഷാചരണത്തിന്റെയും ദുബൈ സോഷ്യല്‍ അജണ്ട 33, ദുബൈ ജീവിത നിലവാര നയം 33 എന്നിവയുടെയും ലക്ഷ്യങ്ങളുമായി ചേര്‍ന്നാണ് സംരംഭം നടപ്പിലാക്കുന്നത്. ആഗസ്ത് മാസം മുതല്‍ ദിവസവും രാവിലെ 7 മുതല്‍ 10 വരെ ഇവിടെ താമസക്കാര്‍ക്ക് വ്യായാമം നടത്താവുന്നതാണ്.
ദുബായ് മാള്‍, ദുബായ് ഹില്‍സ് മാള്‍, സിറ്റി സെന്റര്‍ ദെയ്ര, സിറ്റി സെന്റര്‍ മിര്‍ദിഫ്, മാള്‍ ഓഫ് ദി എമിറേറ്റ്‌സ്, ദുബായ് മറീന മാള്‍, ദി സ്പ്രിംഗ്‌സ് സൂക്ക് എന്നീ ഏഴ് പ്രധാന വാണിജ്യ കേന്ദ്രങ്ങളിലെ താമസക്കാര്‍ക്ക് നടക്കാനും ഓടാനുമുള്ള എല്ലാ സൗകര്യങ്ങളും ഇവിടെ ഒരുക്കിയിട്ടുണ്ട്.
ദുബായ് കിരീടാവകാശിയും ഉപപ്രധാനമന്ത്രിയും പ്രതിരോധ മന്ത്രിയും ദുബായ് എക്‌സിക്യൂട്ടീവ് കൗണ്‍സില്‍ ചെയര്‍മാനുമായ ഷെയ്ഖ് ഹംദാന്‍ ബിന്‍ മുഹമ്മദ് ബിന്‍ റാഷിദ് അല്‍ മക്തൂം ഓഗസ്റ്റ് മാസം മുഴുവനും രാവിലെ അനായാസമായും സുരക്ഷിതമായും ആരോഗ്യകരവും സജീവവുമായ ഒരു ജീവിതശൈലി സ്വീകരിക്കാന്‍ താമസക്കാരോട് അഭ്യര്‍ത്ഥിച്ചു.
യുവാക്കള്‍, മുതിര്‍ന്ന പൗരന്മാര്‍, താമസക്കാര്‍, കുട്ടികള്‍, ഷോപ്പിംഗ് മാള്‍ ജീവനക്കാര്‍ എന്നിവരുള്‍പ്പെടെ എല്ലാ മേഖലകളിലുമുള്ള ആളുകളെയും ലക്ഷ്യമിട്ടുള്ള സംരംഭമാണിത്. ജീവിതശൈലി വളര്‍ത്തിയെടുക്കുന്നതിന്റെ ഭാഗമായുള്ള ഈ സംരംഭത്തില്‍ ഫിറ്റ് നസ്-ട്രാക്കിംഗ് സംവിധാനങ്ങള്‍, ആരോഗ്യ അവബോധ കേന്ദ്രങ്ങള്‍, കുട്ടികള്‍ക്കായി പ്രത്യേകമായി സജ്ജീകരിച്ചിരിക്കുന്ന സ്ഥലങ്ങള്‍, ഗൈഡഡ് സ്‌ട്രെച്ചിംഗ് വ്യായാമങ്ങള്‍ തുടങ്ങി എല്ലാവിധ സൗകര്യങ്ങളും ഉണ്ട്.
ദുബായ് മാളത്തണില്‍ പങ്കെടുക്കാന്‍ ദുബായ് കിരീടാവകാശി പൊതുജനങ്ങളെ പ്രോത്സാഹിപ്പിച്ചു. ആരോഗ്യകരമായ ശീലങ്ങള്‍ ജീവിതത്തിന്റെ ഭാഗമാക്കാനും സമൂഹവുമായി ഇടപഴകുന്നതിനുമുള്ള ലളിതമായ ഒരു മാര്‍ഗമാണിതെന്ന് അദ്ദേഹം പറഞ്ഞു. ലോകത്തിലെ ഏറ്റവും മികച്ച താമസത്തിനും ജോലി ചെയ്യുന്നതിനും സന്ദര്‍ശിക്കുന്നതിനുമുള്ള സ്ഥലമാക്കി ദുബൈ നഗരത്തെ മാറ്റുന്നതില്‍ എല്ലാവരും പങ്കാളികളാണെന്നും അദ്ദേഹം പറഞ്ഞു.
ദുബായ് മാളത്തോണില്‍ സൗജന്യമായി പങ്കെടുക്കാം. www.dubaimallathon.മല എന്ന ഔദ്യോഗിക വെബ് സൈറ്റ് വഴി രജിസ്റ്റര്‍ ചെയ്യണം. രജിസ്‌ട്രേഷന്‍ കഴിഞ്ഞാല്‍, പങ്കെടുക്കുന്നവര്‍ക്ക് ഒരു ഡിജിറ്റല്‍ കാര്‍ഡ് ലഭിക്കും.
റസ്റ്റോറന്റുകളുമായും റീട്ടെയില്‍ ഔട്ട് ലെറ്റുകളുമായും സഹകരിച്ച് പ്രവര്‍ത്തിക്കാനുള്ള സൗകര്യവും ഈ സംരംഭത്തിലുണ്ട്, ഇത് സന്തുലിതവും സജീവവുമായ ജീവിതശൈലി പ്രോത്സാഹിപ്പിക്കുക, മികച്ച പോഷകാഹാര തിരഞ്ഞെടുപ്പുകള്‍ പ്രോത്സാഹിപ്പിക്കുക, ദീര്‍ഘകാല, സുസ്ഥിരമായ ആരോഗ്യകരമായ ശീലങ്ങള്‍ സ്വീകരിക്കുന്നതില്‍ ആളുകളെ പിന്തുണയ്ക്കുക എന്നിങ്ങനെയുള്ള വാഗ്ദാനങ്ങളാണ് ഉറപ്പുനല്‍കുന്നത്.
പ്രധാനപ്പെട്ട ഏഴ് മാളുകളിലെ താമസക്കാര്‍ക്ക് നടക്കാനും ഓടാനുമുള്ള എല്ലാ സൗകര്യങ്ങളോടും കൂടിയ പാത്ത് വേ ആണ് ഒരുക്കുന്നത്. സംരഭത്തിന്റെ ഭാഗമായി ദുബൈ കമ്മ്യൂണിറ്റി ഡെവലപ്മെന്റ് അതോറിറ്റി എമിറേറ്റിലെ മാളുകളുമായി സഹകരിച്ച് 'വാക്ക് ഫോര്‍ ബെറ്റര്‍ ഹെല്‍ത്ത്' പരിപാടിയും ഒരുക്കും.
എയര്‍ കണ്ടീഷന്‍, മറ്റ് അടിസ്ഥാന സൗകര്യങ്ങള്‍ എന്നിവയൊക്കെ ഉള്ളതിനാല്‍, ഷോപ്പിംഗ് മാളുകള്‍ വ്യായാമത്തിന് അനുയോജ്യമായ അന്തരീക്ഷം ഉറപ്പാക്കുന്നു. കടുത്ത ചൂടില്‍ നിന്നും സംരക്ഷണം നല്‍കുന്നു. ഇതുവഴി വര്‍ഷം മുഴുവനും താമസക്കാരെ അവരുടെ ശാരീരിക ക്ഷമത നിലനിര്‍ത്താന്‍ പ്രോത്സാഹിപ്പിക്കുന്നു.
താമസക്കാര്‍ക്കായി ദുബായ് റണ്‍ പോലുള്ള ഫിറ്റ്‌നസ് സംരംഭങ്ങളൊരുക്കുന്നതിലൂടെയും വര്‍ഷം തോറും ഓപ്പണ്‍ എയര്‍ ജിം സംഘടിപ്പിക്കുന്നതിലൂടെയും മുന്‍പും ദുബായ് കിരീടാവകാശി പേരുകേട്ടിരുന്നു.