ഗതാഗത കുരുക്കും അപകടവും പതിവാകുന്നു; ദുബൈയില്‍ അതിവേഗ ട്രാക്കില്‍ വേഗത കുറച്ചാല്‍ പിഴ
ഈ ലെയ്നുകളില് പതുക്കെ വാഹനമോടിക്കുന്നത് ആശയക്കുഴപ്പമുണ്ടാക്കുകയും കൂട്ടയിടികളുടെ സാധ്യത വര്‍ദ്ധിപ്പിക്കുകയും ചെയ്യുമെന്നും മുന്നറിയിപ്പ്‌;
ദുബായ്: ഗതാഗത കുരുക്കും അപകടവും ഉണ്ടാക്കുന്നുവെന്ന കാരണത്താല്‍ ദുബൈയില്‍ അതിവേഗ ട്രാക്കിലൂടെ വേഗം കുറച്ചു പോകുന്ന വാഹനങ്ങള്‍ക്ക് പിഴ ചുമത്താനുള്ള തീരുമാനവുമായി അധികൃതര്‍. ഫാസ്റ്റ് ലെയ് നില്‍ വളരെ പതുക്കെ വാഹനമോടിക്കുന്നത് മറ്റ് വാഹന യാത്രക്കാരെ നിരാശരാക്കുക മാത്രമല്ല, ഗുരുതരമായ സുരക്ഷാ അപകടസാധ്യതയും വിളിച്ചോതുന്നു. ഇതേതുടര്‍ന്ന് ഫാസ്റ്റ് ലെയ്നുകളില് കുറഞ്ഞ പരിധിക്ക് മുകളില്‍ വേഗത നിലനിര്‍ത്താന്‍ ഡ്രൈവര്‍മാരോട് ദുബായ് പൊലീസ് ആവശ്യപ്പെട്ടു.
ഈ ലെയ്നുകളില് പതുക്കെ വാഹനമോടിക്കുന്നത് ആശയക്കുഴപ്പമുണ്ടാക്കുകയും കൂട്ടയിടികളുടെ സാധ്യത വര്‍ദ്ധിപ്പിക്കുകയും ചെയ്യുമെന്ന മുന്നറിയിപ്പും പൊതുജനങ്ങള്‍ക്ക് നല്‍കിയിട്ടുണ്ട്. ഇതുസംബന്ധിച്ച് നിരവധി വാഹന യാത്രക്കാര്‍ നിരാശ പ്രകടിപ്പിക്കുന്ന സാഹചര്യത്തിലാണ് ഇത്തരമൊരു തീരുമാനമെടുക്കാന്‍ ദുബൈ പൊലീസിനെ പ്രേരിപ്പിച്ചത്. എക്‌സ് പോസ്റ്റിലൂടെയാണ് ദുബൈ പൊലീസ് പൊതുജനങ്ങളെ ഇക്കാര്യം അറിയിച്ചത്.
മിനിമം വേഗതയ്ക്ക് മുകളില്‍ വാഹനമോടിക്കുന്നത് ഗതാഗതം സുരക്ഷിതമായി തുടരാന്‍ സഹായിക്കുമെന്ന് അതോറിറ്റി അവരുടെ പ്രസ്താവനയില്‍ ഊന്നിപ്പറഞ്ഞു. ഫാസ്റ്റ് ലെയ്നുകളില് പതുക്കെ വാഹനമോടിക്കുന്നത് മറ്റ് വാഹനങ്ങളുടെ വേഗത കുറയ്ക്കുക മാത്രമല്ല, ഡ്രൈവര്‍മാര്‍ക്ക് പെട്ടെന്ന് ബ്രേക്ക് ചെയ്യേണ്ടതോ അപ്രതീക്ഷിതമായി ലെയ്ന്‍ മാറ്റേണ്ടതോ ആയ അപകടകരമായ സാഹചര്യങ്ങളും ഉണ്ടായേക്കാം. നിരവധി ഡ്രൈവര്‍മാര്‍ ഇക്കാര്യം സ്ഥിരീകരിക്കുന്നുമുണ്ട്.
2023-ല്‍ യുഎഇ റോഡുകളില്‍ കുറഞ്ഞ വേഗ പരിധിക്ക് താഴെ വാഹനമോടിച്ചതിന് 300,147 പേര്‍ക്ക് ട്രാഫിക് വകുപ്പുകള്‍ പിഴ ചുമത്തി. ഗതാഗത അപകടങ്ങളെക്കുറിച്ചുള്ള ആഭ്യന്തര മന്ത്രാലയത്തിന്റെ സ്ഥിതിവിവരക്കണക്കുകള്‍ പ്രകാരം, മന്ദഗതിയിലുള്ള ഇത്തരം ഡ്രൈവിംഗ് നിരവധി അപകടങ്ങള്‍ക്ക് കാരണമായി.
ഫെഡറല്‍ ട്രാഫിക് നിയമമനുസരിച്ച്, കുറഞ്ഞ വേഗ പരിധിക്ക് താഴെ വാഹനം ഓടിക്കുന്നതിനും ഓവര്‍ടേക്കിംഗ് ലെയ്‌നില്‍ നിന്നോ പിന്നില്‍ നിന്നോ വരുന്ന വാഹനങ്ങള്‍ക്ക് മുന്‍ഗണന നല്‍കാത്തതിനും 400 ദിര്‍ഹം പിഴ ചുമത്തുന്നു. വലതുവശത്തെ പാതകള്‍ വേഗത കുറഞ്ഞ വാഹനങ്ങള്‍ക്കായിരുന്നു, ഇടതുവശത്തെ പാതകള്‍ വേഗത കുറഞ്ഞതും ഓവര്‍ടേക്കിംഗ് ചെയ്യുന്നതുമായ വാഹനങ്ങള്‍ക്കായിരുന്നു.
പതുക്കെ പോകുന്നത് സുരക്ഷിതമാണെന്നു കരുതുന്നവരും ഉണ്ട്. ഷെയ്ഖ് സായിദ് റോഡില്‍ ജബല്‍ അലി വരെ കുറഞ്ഞ വേഗ പരിധി 60 കിലോമീറ്ററും ഉയര്‍ന്ന വേഗ പരിധി 100 കിലോമീറ്ററുമാണ്. ഈ വേഗ പരിധി പാലിക്കാന്‍ എല്ലാ വാഹനങ്ങളും ബാധ്യസ്ഥരാണ്.
ദുബായ് പൊലീസിന്റെ ഓര്‍മ്മപ്പെടുത്തല്‍ യുഎഇ റോഡുകളിലെ ഒരു പൊതു പ്രശ്‌നം എടുത്തുകാണിക്കാന്‍ സഹായിക്കുന്നു. അവിടെ അതിവേഗ പാതകളില്‍ മന്ദഗതിയിലുള്ള ഡ്രൈവിംഗ് നിരവധി ഡ്രൈവര്‍മാരെ നിരാശരാക്കുകയും അപകടസാധ്യതകള്‍ സൃഷ്ടിക്കുകയും ചെയ്യുന്നു. ശരിയായ ലെയ്ന്‍ ഉപയോഗം നിരീക്ഷിക്കാനും അവര്‍ ഉള്ള ലെയ്‌നിന് അനുയോജ്യമായ വേഗത നിലനിര്‍ത്താനും അധികാരികള്‍ വാഹനമോടിക്കുന്നവരെ പ്രോത്സാഹിപ്പിക്കുന്നു.