കെട്ടുംക്കല്ലിലെ സൂപ്പര്‍ മാര്‍ക്കറ്റില്‍ നിന്ന് ഫോണ്‍ കവര്‍ന്ന കേസില്‍ പ്രതി അറസ്റ്റില്‍
ഉപ്പള കണ്ണാടിപാറയില്‍ താമസക്കാരനായ സി.എ.സലീം ആണ് അറസ്റ്റിലായത്;
By : Online correspondent
Update: 2025-07-29 05:44 GMT
ആദൂര്‍: സൂപ്പര്‍ മാര്‍ക്കറ്റില്‍ നിന്ന് ഫോണ്‍ കവര്‍ന്ന കേസിലെ പ്രതി അറസ്റ്റില്‍. ഉപ്പള കണ്ണാടിപാറയില്‍ താമസക്കാരനായ സി.എ.സലീം(41) ആണ് അറസ്റ്റിലായത്. ആദൂര്‍ പൊലീസ് ആണ് പ്രതിയെ അറസ്റ്റ് ചെയ്തത്. ജുലായ് 18ന് ഉച്ചയ്ക്ക് രണ്ട് മണിയോടെയാണ് കെട്ടുംക്കല്ലിലെ സൂപ്പര്‍ മാര്‍ക്കറ്റില്‍ നിന്ന് 25000 രൂപ വില മതിക്കുന്ന ഫോണ്‍ മോഷണം പോയത്.
തുടര്‍ന്ന് സൂപ്പര്‍ മാര്‍ക്കറ്റ് ഉടമ ചെര്‍ക്കള കെ.കെ.പുറത്തെ മുഹമ്മദിന്റെ പരാതിയുടെ അടിസ്ഥാനത്തില്‍ കേസെടുത്ത് അന്വേഷിക്കുന്നതിനിടെയാണ് സലീം പൊലീസ് പിടിയിലായത്. മോഷ്ടിച്ച ഫോണ്‍ ചക്കര ബസാറിലെ ഒരു കടയില്‍ വില്‍പ്പന നടത്തിയതായി പ്രതി മൊഴി നല്‍കിയതായി പൊലീസ് പറഞ്ഞു. സാധനങ്ങള്‍ വാങ്ങാനെന്ന വ്യാജേന എത്തി മേശ പുറത്തിരുന്ന ഫോണുമായി പ്രതി കടന്ന് കളയുകയായിരുന്നു. സിസിടിവിയില്‍ പതിഞ്ഞ ദൃശ്യം പരിശോധിച്ചാണ് പ്രതിയെ തിരിച്ചറിഞ്ഞത്.