9 വയസുകാരനെ ഇരുമ്പ് വടി കൊണ്ട് അടിച്ചും പീഡിപ്പിച്ചും ക്രൂരത; രണ്ടാനച്ഛനെതിരെ കേസ്
ബേക്കല്‍ പൊലീസ് സ്റ്റേഷന്‍ പരിധിയില്‍ താമസിക്കുന്ന കുട്ടിയുടെ പരാതിയിലാണ് കേസ്;
ബേക്കല്‍: 9 വയസുകാരനെ ഇരുമ്പ് വടി കൊണ്ടും ഇരുമ്പ് ചട്ടി കൊണ്ടും അടിച്ച് പരിക്കേല്‍പ്പിക്കുകയും പീഡിപ്പിക്കുകയും ചെയ്തുവെന്ന പരാതിയില്‍ രണ്ടാനച്ഛനെതിരെ പൊലീസ് കേസെടുത്തു. ബേക്കല്‍ പൊലീസ് സ്റ്റേഷന്‍ പരിധിയില്‍ താമസിക്കുന്ന കുട്ടിയുടെ പരാതിയിലാണ് കേസ്. മാതാവിനും രണ്ടാനച്ഛനും ഒപ്പം താമസിക്കുന്ന കുട്ടിയാണ് മര്‍ദ്ദനത്തിനും പീഡനത്തിനും ഇരയായത്.
കുട്ടി സ്‌കൂളില്‍ പോകുന്നതിനിടെ വഴിയാത്രക്കാരന്റെ ഫോണ്‍ വാങ്ങി മാതാവിന്റെ ബന്ധുക്കളെ വിളിച്ചാണ് താന്‍ നേരിട്ട ക്രൂരത അറിയിച്ചത്. തുടര്‍ന്ന് ബന്ധുക്കള്‍ കുട്ടിയെയും കൂട്ടി ബേക്കല്‍ പൊലീസ് സ്റ്റേഷനിലെത്തി പരാതി നല്‍കുകയായിരുന്നു. കുട്ടിയുടെ മൊഴി രേഖപ്പെടുത്തിയ ശേഷമാണ് പൊലീസ് പോക്സോ നിയമപ്രകാരം രണ്ടാനച്ഛനെതിരെ കേസെടുത്തത്.
വായ പൊത്തി പിടിച്ച് ഇരുമ്പ് ചട്ടി, ഇരുമ്പ് വടി എന്നിവ കൊണ്ട് അടിച്ച് പരിക്കേല്‍പ്പിക്കുകയും പീഡിപ്പിക്കുകയും ഭീഷണിപ്പെടുത്തി കടയില്‍ ജോലി ചെയ്യിപ്പിക്കുകയും ചെയ്തതായി പരാതിയില്‍ പറയുന്നു. പോക്സോക്ക് പുറമെ പ്രതിക്കെതിരെ ജുവനൈല്‍ ജസ്റ്റിസ് ആക്ടും ചുമത്തിയിട്ടുണ്ട്.