ഒടുവില്‍ മൈം വീണ്ടും വേദിയില്‍; യുവമോര്‍ച്ച പ്രതിഷേധം: സ്‌കൂള്‍ കനത്ത പൊലീസ് വലയത്തില്‍
കാസര്‍കോട്: കുമ്പള ഗവണ്‍മെന്റ് ഹയര്‍ സെക്കന്‍ഡറി സ്‌കൂളില്‍ ഗസ്സ പ്രമേയമാക്കിയ മൈം ഷോ വീണ്ടും അരങ്ങിലെത്തി. സ്‌കൂള്‍ കലോത്സവം തിങ്കളാഴ്ച പുനരാംഭിച്ചതോടെയാണ് , അധ്യാപകര്‍ ഇടപെട്ട് നിര്‍ത്തിവെച്ച മൈം ഷോ വീണ്ടും അവതരിപ്പിച്ചത്. കനത്ത പൊലീസ് സുരക്ഷയിലാണ് മൈം ഷോ വേദിയിലെത്തിയത്. ബി.ജെ.പി ഉള്‍പ്പെടെയുള്ള സംഘടനകള്‍ മൈംഷോയ്‌ക്കെതിരെ എതിര്‍പ്പ് ഉന്നയിച്ച പശ്ചാത്തലത്തില്‍ പൊലീസ് കാവല്‍ ഏര്‍പ്പെടുത്തിയിരുന്നു. മൈം ഷോ ്അവതരിപ്പിച്ചതിന് പിന്നാലെ സ്‌കൂളിന് പുറത്ത് അമ്പതോളം വരുന്ന യുവമോര്‍ച്ച പ്രവര്‍ത്തകര്‍ പ്രതിഷേധ മാര്‍ച്ച് സംഘടിപ്പിച്ചു. പൊലീസ് തടഞ്ഞതോടെ പൊലീസും പ്രവര്‍ത്തകരും തമ്മിൽ ഉന്തും തള്ളുമുണ്ടായി.
വെള്ളിയാഴ്ചയാണ് കുമ്പള സ്‌കൂളില്‍ കലോത്സവത്തിന്റെ ഭാഗമായുള്ള മൈം അവതരണത്തിനിടെ നാടകീയ സംഭവങ്ങള്‍ അരങ്ങേറിയത്. ഗസ്സ പ്രമേയമായതിനാല്‍ അധ്യാപകര്‍ ഇടപെട്ട് മൈം ഷോ നിര്‍ത്തിവെക്കുകയായിരുന്നു. പിന്നാലെ അധ്യാപകരും വിദ്യാര്‍ത്ഥികളും വാക്കുതര്‍ക്കമാവുകയും ശനിയാഴ്ച നടക്കേണ്ട കലോത്സവം നിര്‍ത്തിവെക്കുകയായിരുന്നു.തുടര്‍ന്ന് വിദ്യാഭ്യാസ മന്ത്രി തന്നെ, മൈം നിര്‍ത്തിവെച്ച നടപടിയെ വിമര്‍ശിച്ച് രംഗത്തുവന്നു. പൊതുവിദ്യാഭ്യാസ ഡയറക്ടറോടും മന്ത്രി അടിയന്തര റിപ്പോര്‍ട്ട് തേടിയിട്ടുണ്ട്. സംഭവത്തില്‍ രണ്ട് അധ്യാപകര്‍ക്കെതിരെ നടപടി ഉണ്ടായേക്കുമെന്നാണ് സൂചന.